AKP ភ្នំពេញ ថ្ងៃទី១៣ ខែសីហា ឆ្នាំ២០២៦--មន្ត្រីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជា លើកទឹកចិត្តដល់ក្រុមនិស្សិតជ័យលាភីទាំងអស់ ឱ្យបំពេញបេសកកម្មជាទូតសុឆន្ទៈតំណាងព្រះរាជាណាចក្រកម្ពុជា ក្នុងការផ្សព្វផ្សាយនូវអត្តសញ្ញាណ វប្បធម៌ និងប្រពៃណីដ៏ថ្លៃថ្លារបស់ជាតិ ព្រមទាំងរំលេចពីសមិទ្ធផលនៃសន្តិភាព ស្ថិរភាពនយោបាយ សក្តានុពលសេដ្ឋកិច្ច និងបរិយាកាសវិនិយោគដ៏ប្រពៃរបស់កម្ពុជា ទៅកាន់មជ្ឈដ្ឋានអន្តរជាតិ។

នាព្រឹកថ្ងៃព្រហស្បតិ៍ ទី១៣ ខែសីហា ឆ្នាំ២០២៦ ឯកឧត្តម គង់ វិមាន អគ្គលេខាធិការ អគ្គលេខាធិការដ្ឋាននៃ ក្រុមប្រឹក្សាអភិវឌ្ឍន៍កម្ពុជា (ក.អ.ក.) តំណាងដ៏ខ្ពង់ខ្ពស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក.អ.ក. បានទទួលជួបសម្តែងការគួរសម សំណេះសំណាល និងផ្តល់អនុសាសន៍ណែនាំលើកទឹកចិត្តដល់ ក្រុមនិស្សិតជ័យលាភីអាហារូបករណ៍រដ្ឋាភិបាលសាធារណរដ្ឋឆែក ឆ្នាំ២០២៦ មុននឹងចេញទៅបន្តការសិក្សានៅតាមសាកលវិទ្យាល័យនានា នៅក្នុងសាធារណរដ្ឋឆែក។

មានវត្តមានអញ្ជើញចូលរួមអម ឯកឧត្តមអគ្គលេខាធិការ ក្នុងជំនួបនាព្រឹកនេះរួមមាន ឯកឧត្តមអគ្គលេខាធិការរង អគ្គលេខាធិការដ្ឋាននៃ ក.អ.ក. លោក លោកស្រីតំណាងនាយកដ្ឋានចំណុះឱ្យអគ្គលេខាធិការដ្ឋាននៃ ក.អ.ក. និងមន្ត្រីពាក់ព័ន្ធមួយចំនួនផងដែរ។

ក្នុងឱកាសនៃជំនួបនេះ ឯកឧត្តមអគ្គលេខាធិការ បានសម្តែងនូវការអបអរសាទរយ៉ាងកក់ក្តៅជូនចំពោះក្រុមនិស្សិតជ័យលាភីទាំងអស់ ដែលទទួលបានឱកាសទៅបន្តការសិក្សានៅសាធារណរដ្ឋឆែក។ ឯកឧត្តម បានធ្វើការចែករំលែកនូវបទពិសោធន៍សំខាន់ៗ ពាក់ព័ន្ធនឹងការសិក្សានៅក្រៅប្រទេស ព្រមទាំងបានផ្តល់នូវអនុសាសន៍ណែនាំដល់និស្សិតទាំងអស់ ឱ្យខិតខំប្រឹងប្រែងយកចិត្តទុកដាក់រៀនសូត្រ ក្រេបជញ្ជក់យកចំណេះដឹង និងជំនាញបច្ចេកទេសទំនើបៗដែលជានិន្នាការសកល ដើម្បីនាំយកមកវិញនូវសមត្ថភាពពិតប្រាកដ សំដៅរួមចំណែកក្នុងបេសកកម្មបម្រើជាតិមាតុភូមិកម្ពុជា ឱ្យកាន់តែរីកចម្រើនរឹងមាំ បន្ទាប់ពីបញ្ចប់ការសិក្សាដោយជោគជ័យ។

ទន្ទឹមនឹងនេះ ឯកឧត្តមអគ្គលេខាធិការ បានជំរុញលើកទឹកចិត្តដល់ក្រុមនិស្សិតជ័យលាភីទាំងអស់ ឱ្យបំពេញបេសកកម្មជាទូតសុឆន្ទៈតំណាងព្រះរាជាណាចក្រកម្ពុជា ក្នុងការផ្សព្វផ្សាយនូវអត្តសញ្ញាណ វប្បធម៌ និងប្រពៃណីដ៏ថ្លៃថ្លារបស់ជាតិ ព្រមទាំងរំលេចពីសមិទ្ធផលនៃសន្តិភាព ស្ថិរភាពនយោបាយ សក្តានុពលសេដ្ឋកិច្ច និងបរិយាកាសវិនិយោគដ៏ប្រពៃរបស់កម្ពុជា ទៅកាន់មជ្ឈដ្ឋានអន្តរជាតិ ជាពិសេសដល់មិត្តរួមថ្នាក់ មិត្តរួមស្ថាប័នអប់រំ សាស្រ្តាចារ្យ និងប្រជាជននៃសាធារណរដ្ឋឆែក ដើម្បីរឹតចំណងមិត្តភាព និងកិច្ចសហប្រតិបត្តិការរវាងប្រជាជាតិទាំងពីរឱ្យកាន់តែជិតស្និទ្ធ និងរឹងមាំបន្ថែមទៀត។

ជំនួបសំណេះសំណាលនេះ បានបញ្ចប់ទៅក្នុងបរិយាកាសស្និទ្ធស្នាល និងប្រកបដោយស្មារតីលើកទឹកចិត្តខ្ពស់ ដែលឆ្លុះបញ្ចាំងពីការយកចិត្តទុកដាក់របស់ថ្នាក់ដឹកនាំរាជរដ្ឋាភិបាល និងស្ថាប័នពាក់ព័ន្ធ ក្នុងការជំរុញការអភិវឌ្ឍធនធានមនុស្សរបស់កម្ពុជាឆ្ពោះទៅកាន់ឆាកអន្តរជាតិ។

សូមជម្រាបដែរថា៖ សម្រាប់ឆ្នាំសិក្សា២០២៦នេះ ក្រុមនិស្សិតជ័យលាភីដែលទទួលបានអាហារូបករណ៍របស់រដ្ឋាភិបាលនៃសាធារណរដ្ឋឆែក មានចំនួនសរុប ១៨ នាក់ ក្នុងនោះអាហារូបករណ៍ថ្នាក់បរិញ្ញាបត្រជាន់ខ្ពស់(អនុបណ្ឌិត)ចំនួន ១៣ នាក់ និងថ្នាក់បណ្ឌិតចំនួន ៥ នាក់ នៅលើមុខជំនាញអាទិភាពសំខាន់ៗរួមមាន៖ (១) សេដ្ឋកិច្ច និងគោលនយោបាយសាធារណៈ , (២) កសិកម្មប្រកបដោយនិរន្តរភាព វិទ្យាសាស្ត្រចំណីអាហារ និងបរិស្ថាន , និង (៣) វិស្វកម្ម ព័ត៌មានវិទ្យា និងបញ្ញាសិប្បនិម្មិត ៕

ដោយ៖ ចរិយា ប្រភព៖ CDC