AKP ភ្នំពេញ ថ្ងៃទី១២ ខែសីហា ឆ្នាំ២០២៦ -- យោងតាមទិន្នន័យរបស់រដ្ឋាភិបាលកុងហ្គោចុងក្រោយបំផុត បានឱ្យដឹងថា យ៉ាងហោចណាស់មានមនុស្សចំនួន ២.០០០នាក់បានស្លាប់ក្នុងចំណោមករណីដែលបានបញ្ជាក់នៅក្នុងការផ្ទុះឡើងនៃជំងឺអេបូឡានៅប្រទេស ដែលជាការកើនឡើងលឿនបំផុតក្នុងកំណត់ត្រា។

ទិន្នន័យដែលបានចេញផ្សាយកាលពីយប់ថ្ងៃចន្ទរហូតដល់ថ្ងៃអង្គារបានបង្ហាញថា ការផ្ទុះឡើងនៃជំងឺនេះបានកត់ត្រាករណីឆ្លងសរុបចំនួន៤.៣៨១ករណី រួមទាំងការស្លាប់ចំនួន ២.០១១នាក់។ អ្នកជំងឺសរុបចំនួន៧០៤នាក់កំពុងសម្រាកព្យាបាល និងដាក់ឱ្យធ្វើចត្តាឡីស័ក។

ចំនួនអ្នកស្លាប់ដ៏គួរឱ្យភ័យខ្លាចនេះ បានកើតឡើងជិតបីខែចាប់តាំងពីការផ្ទុះឡើងនៃជំងឺនេះត្រូវបានប្រកាសនៅថ្ងៃទី១៥ ខែឧសភា។ ខណៈដែលវាត្រូវចំណាយពេលប្រហែល ៩សប្តាហ៍សម្រាប់ការផ្ទុះឡើងនៃជំងឺនេះដើម្បីកត់ត្រាការស្លាប់ចំនួន ១.០០០នាក់ វាត្រូវចំណាយពេលត្រឹមតែ៣សប្តាហ៍ប៉ុណ្ណោះដើម្បីកត់ត្រាការស្លាប់បន្ថែមចំនួន ១.០០០នាក់ ដែលបញ្ជាក់ពីការត្អូញត្អែរពីអ្នកឆ្លើយតបថា ជំនួយមិនបានទៅដល់តំបន់ដាច់ស្រយាលបានលឿនគ្រប់គ្រាន់នោះទេ។

ការផ្ទុះឡើងនៃជំងឺអេបូឡាមិនដូចករណីមុនៗភាគច្រើនទេ ពីព្រោះមេរោគ Bundibugyo ដ៏កម្រដែលបង្កជំងឺនេះមិនមានវ៉ាក់សាំង ឬការព្យាបាលដែលត្រូវបានអនុម័តនោះទេ។ អង្គការសុខភាពពិភពលោក បាននិយាយកាលពីពេលថ្មីៗនេះថា វាបានចាប់ផ្តើមនៅក្នុងខែកុម្ភៈ មុនពេលអាជ្ញាធរបានរកឃើញវានៅក្នុងតំបន់ដាច់ស្រយាល និងងាយរងគ្រោះបំផុតមួយរបស់ប្រទេសកុងហ្គោ។

មេរោគអេបូឡាដំបូងគេដែលត្រូវបានកំណត់អត្តសញ្ញាណ គឺនៅឆ្នាំ១៩៧៦ នៅជិតទន្លេអេបូឡា នៅក្នុងតំបន់ដែលឥឡូវហៅថា ប្រទេសកុងហ្គោ។ ការផ្ទុះឡើងនាពេលបច្ចុប្បន្ននេះ គឺជាការផ្ទុះឡើងលើកទី១៧ និងធំបំផុតដែលប្រទេសនៅអាហ្វ្រិកកណ្តាលមួយនេះ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)