AKP ភ្នំពេញ ថ្ងៃទី១២ ខែ សីហា ឆ្នាំ ២០២៦--គម្រោងគជ់បានប្រគល់កុំព្យូទ័រយួរដៃចំនួន ៤០ គ្រឿង និងម៉ាស៊ីនបោះពុម្ពចំនួន ៤០ គ្រឿងដល់អង្គការកសិករ និងសហគមន៍នៅខេត្តកំពង់ធំ ដែលជាផ្នែកមួយនៃផែនការចែកជូនកុំព្យូទ័រយួរដៃ និងម៉ាស៊ីនបោះពុម្ពចំនួន ១២៤ឈុត ដល់សហគមន៍ក្នុងខេត្តកំពង់ធំ ព្រះវិហារ ឧត្តរមានជ័យ និងសៀមរាប។

គួរបញ្ជាក់ថា ឧបករណ៍បច្ចេកវិទ្យាដែលចែកសម្រាប់សហគមន៍នេះត្រូវបានគេជឿជាក់ថា នឹងជួយសហគមន៍កសិកម្ម សហគមន៍កសិកម្មទំនើប សហគមន៍តំបន់ការពារធម្មជាតិ និងសហគមន៍ព្រៃឈើ ក្នុងការងារគ្រប់គ្រងហិរញ្ញវត្ថុ ការងាររដ្ឋបាល ការរៀបចំរបាយការណ៍ ទំនាក់ទំនងជាមួយអ្នកទិញ ការទទួលបានព័ត៌មានអាកាសធាតុ និងសេវាកម្មអនឡាញនានា។         

 ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងគុជ បានមានប្រសាសន៍ថា គម្រោងនេះជួយកសិករដែលមានទំហំផលិតកម្មតូច ដើម្បីសម្របខ្លួនទៅនឹងការប្រែប្រួលអាកាសធាតុ ដោយធ្វើឱ្យប្រសើរឡើងនូវផលិតកម្មកសិកម្ម កែលម្អជីវភាពរស់នៅរបស់កសិករ និងលក់កសិផលឱ្យចំណេញច្រើនជាងមុន។

លោកស្រី រេប៊ែកកា ប៊ែល តំណាងអង្គការស្បៀង និងកសិកម្មនៃសហប្រជាជាតិ ប្រចាំកម្ពុជា បានមានប្រសាសន៍ថា «ឧបករណ៍បច្ចេកវិទ្យាទាំងនេះ នឹងជួយបំពេញភាពខ្វះចន្លោះផ្នែកឌីជីថល ដោយអនុញ្ញាតឱ្យកសិករ និងអង្គការរបស់ពួកគេ ធ្វើការសម្រេចចិត្តដោយផ្អែកលើព័ត៌មានច្បាស់លាស់ជាងមុន និងអាចកសាងជីវភាពរស់នៅកាន់តែមានភាពធន់ជាងមុន នឹងការប្រែប្រួលអាកាសធាតុ»។      

ដោយឡែកលោក ម៉ៅ សារ៉ន ប្រធានសហគមន៍កសិកម្មភ្នំសន្ទុក អត្ថប្រយោជន៍នៃកុំព្យូទ័រនេះគឺ៖ «កុំព្យូទ័រយួរដៃ និងម៉ាស៊ីនបោះពុម្ពនឹងជួយសម្រួលដល់ការងារគ្រប់គ្រង និងហិរញ្ញវត្ថុរបស់សហគមន៍កសិកម្ម របស់យើង។ យើងអាចប្រើកម្មវិធីអិចសែល ដើម្បីគណនា និងរៀបចំកំណត់ត្រាហិរញ្ញវត្ថុរបស់សមាជិកបានកាន់តែត្រឹមត្រូវ និងមានតម្លាភាព ដែលនឹងបង្កើតទំនុកចិត្តកាន់តែច្រើនដល់សមាជិក។ យើងក៏អាចប្រើកុំព្យូទ័រយួរដៃដើម្បីចូលរៀនពីបច្ចេកវិទ្យាកសិកម្មថ្មីៗ ចូលរួមការបណ្តុះបណ្តាលតាមអ៊ីនធឺណិត។ល។»។

គួរបញ្ជាក់ថា ការគាំទ្រផ្នែកឌីជីថលនេះ គឺជាផ្នែកមួយនៃការងាររបស់គម្រោងគជ់ ដើម្បីជួយកសិករក្នុងការដោះស្រាយបញ្ហាប្រែប្រួលអាកាសធាតុ អាចលក់កសិផលនៅទីផ្សារដែលមានតម្លៃខ្ពស់ និងការពារធនធានធម្មជាតិ។ គម្រោងនេះគាំទ្រស្ថានីយ៍កសិឧតុនិយមចំនួន ២០ បានជួយចុះបញ្ជីស្វាយចន្ទីកំពង់ធំ និងស្វាយឧត្តរមានជ័យជាផលិតផលម៉ាកសម្គាល់ភូមិសាស្ត្រទំនិញ GI និងមានផែនការស្តារ និងការពារតំបន់ព្រៃឈើសំខាន់ៗចំនួន ៧ពាន់ ៦រយហិកតា។

ដោយទទួលបានការគាំទ្រពីមូលនិធិអាកាសធាតុបៃតង និងអនុវត្តដោយក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន និងអង្គការស្បៀង និងកសិកម្មនៃសហប្រជាជាតិ គម្រោងគជ់ នឹងជួយដល់កសិករប្រមាណជា ៤៥ម៉ឺននាក់ ត្រូវជា ១០ម៉ឺនគ្រួសារ រហូតដល់ឆ្នាំ ២០២៩៕

ដោយ មករា