AKP ភ្នំពេញ ថ្ងៃទី១២ ខែសីហា ឆ្នាំ២០២៦--ក្រសួងបរិស្ថានបានធ្វើការបដិសេធ ពីការសម្លាប់សត្វព្រៃ ហើយប្រាប់ប្រជាពលរដ្ឋចូលរួមអភិរក្សសត្វដ៏កម្រសំដៅធ្វើយ៉ាងណាជួយថែរក្សាការពារឱ្យសត្វទាំងនេះ បាននៅគង់វង្សទុកសម្រាប់កូនចៅជំនាន់ក្រោយ ក្នុងប្រទេសកម្ពុជា ដើម្បីទុកសម្រាប់ទាក់ទាញវិស័យទេសចរណ៍។

គួរបញ្ជាក់ផងដែរថា សត្វចាបព្រៃវែង (Yellow-breasted Bunting) គឺជាប្រភេទសត្វស្លាបទេសន្តរប្រវេសន៍ក្នុងបញ្ជីក្រហមរបស់ IUCN ជិតផុតពូជបំផុតនៅលើពិភពលោក។ សត្វចាបព្រៃវែង ឬចាបទ្រូងលឿង (Yellow Breasted Bunting) រាប់ពាន់ក្បាល នៅតែបន្តវិលត្រឡប់មករកចំណី និងស្នាក់នៅក្នុងតំបន់ការពារធម្មជាតិ (តំបន់ដីសើម) នៅកម្ពុជា។

ក្រសួងបរិស្ថានបានឱ្យដឹងថា នាពេលថ្មីៗនេះមានវីដេអូឃ្លីបមួយ ដែលបានបង្ហោះតាមគណនីTik Tok ឈ្មោះ Virak អំពីករណីសត្វចាបព្រៃវែង បញ្ឈប់ការផ្សព្វផ្សាយសម្លាប់សត្វព្រៃ និងក៏ដូចជាលើកឡើងពីជំនឿខុសរបៀប ហើយត្រូវតែងាកមក ចូលរួមផ្សព្វផ្សាយអប់រំ ពីការការពារប្រភេទសត្វកម្រលើពិភពលោក ដែលមានវត្តមាននៅកម្ពុជា ដូចជាចាបព្រៃវែង ជាជាងជំរុញលើកទឹកចិត្តសាធារណជនបរិភោគ និងចាប់សត្វទៅវិញ។

អ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា បានលើកឡើងពី ករណី Tik Tok ខាងលើនេះ មិនបានចូលរួមផ្តល់ចំណេះដឹង និងព័ត៌មាន ដែលមានប្រយោជន៍ដល់សង្គមទេ ផ្ទុយមកវិញត្រូវតែមានការចូលរួមអប់រំ និងផ្សព្វផ្សាយការពារសត្វព្រៃ។ អ្នកផលិតមាតិកា គួរផ្សព្វផ្សាយពីតម្លៃនៃការអភិរក្ស បដិសេធជំនឿខុសឆ្គង លើការបរិភោគសត្វព្រៃ និងលើកទឹកចិត្តពលរដ្ឋឱ្យឈប់ទិញ និងឈប់ហូបសត្វព្រៃ។

សូមរំលឹកផងដែរថា មន្ត្រីជំនាញតែងតែអំពាវនាវឱ្យបញ្ឈប់ការផ្សព្វផ្សាយជំរុញឱ្យមានការជួញដូរ និងបរិភោគសត្វព្រៃលើបណ្តាញសង្គម។ ការបរិភោគសាច់សត្វព្រៃ គ្មានអត្ថប្រយោជន៍អ្វីដល់សុខភាព និងអាចបង្កគ្រោះថ្នាក់ខ្លាំងដល់សុខភាព ព្រមទាំងធ្វើឱ្យបាត់បង់សត្វព្រៃកម្រផងដែរ៕

ដោយ មករា