AKP ភ្នំពេញ ថ្ងៃទី១២ ខែសីហា ឆ្នាំ២០២៦--ក្រសួងសង្គមកិច្ច​ អតីតយុទ្ធជន​ និងយុវនីតិសម្បទា​ ចាប់ពីថ្ងៃទី១០-១១ ខែសីហា ឆ្នាំ២០២៦​ បានសហការជាមួយរដ្ឋបាលរាជធានីភ្នំពេញ ដោយមានការគាំទ្រពីអង្គការ​ World Vision International  រៀបចំវគ្គបណ្តុះបណ្តាល​ស្តីពី​នីតិវិធីប្រតិបត្តិកិច្ចការពារកុមារ ជូនដល់មន្រ្តីទទួលបន្ទុកការងារកុមារ​នៅតាមបណ្តាខណ្ឌ​ ដោយមានការចូលរួមពីលោកស្រី កែវ រ័ត្នតារា សមាជិកក្រុម​ប្រឹក្សា​រាជធានី និងជាប្រធាន គ.ក.ស.ក នៃរដ្ឋបាលរាជធានីភ្នំពេញ និង លោកស្រី តិមា វិច្ឆិកាល អភិបាលរង រាជធានីភ្នំពេញ។ 

លោកស្រី កែវ រ័ត្នតារា បានលើកឡើងថា វគ្ដបណ្ដុះបណ្ដាលនេះរៀបចំឡើងក្នុងគោលបំណងដើម្បី ផ្សព្វផ្សាយសៀវភៅណែនាំ​ស្តីពីនីតិវិធី​ប្រតិបត្តិកិច្ច​ការពារកុមារសម្រាប់រដ្ឋបាល ក្រុង ស្រុកខណ្ឌ ពង្រឹងសមត្ថភាពមន្ត្រីទទួលបន្ទុកការងារកុមារនៅតាមខណ្ឌ​ ក្នុងការកំណត់​អត្តសញ្ញាណ​ករណីអំពើហិង្សាលើកុមារ ការគ្រប់គ្រងករណី និងការបញ្ជូនកុមាររងគ្រោះទៅរកសេវាសមស្រប និងរៀបចំផែនការបណ្តុះបណ្តាលបន្តដល់ចៅសង្កាត់ អ.ក.ន.ក និងភាគីពាក់ព័ន្ធក្នុង​ការអនុវត្ត​សៀវភៅ​ណែនាំស្តីពីនីតិវិធីប្រតិបត្តិកិច្ចការពារកុមារ ។

ក្នុងវគ្គបណ្តុះបណ្តាលនេះមានការអញ្ចើញចូលរួមពីមន្ទីរ ស.អ.យ មន្ទីរកិច្ចការនារី​ អភិបាលរងនៃគណៈអភិបាលខណ្ឌ ប្រធាន គ.ក.ស.ក ខណ្ឌ  ប្រធានការិយាល័យសង្គមកិច្ច និងសុខុមាលភាពសង្គម នៃរដ្ឋបាលខណ្ឌទាំង១៤ សរុបចំនួនប្រមាណ ៦០រូប ៕

 ដោយ ណយ នឿន (ប្រភព៖ក្រសួងសង្គមកិច្ច)