AKPកំពង់ចាមថ្ងៃទី ១០ ខែ សីហា ឆ្នាំ២០២៦--នៅព្រឹកថ្ងៃទី១០ ខែសីហា ឆ្នាំ២០២៦ នេះ ការដំណើរការនៃការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡង៖ ១០ សីហា ២០២៦ បានចាប់ផ្តើមបើកជាផ្លូវការ នៅទូទាំងប្រទេស ។ 

នៅ ខេត្តកំពង់ចាម ឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម  ឯកឧត្តម ឡៅ ឈាវអ៊ាវ អនុរដ្ឋលេខាធិការក្រសួងអប់រំយុវជន និងកីឡា និងជាប្រធាន គណៈមេប្រ យោគទូទាំងប្រទេស ប្រចាំខេត្តកំពង់ចាម និង ឯកឧត្តម ម៉ឹង សូដាឬទ្ធិ ឧបការីនៃអង្គភាពប្រឆាំងអំពើពុករលួយ (អ.ប.ព.)  បានអញ្ជើញកាត់បើកវិញ្ញាសាប្រឡង សញ្ញាបត្រមធ្យមសិក្សាទុតិយភូមិ នៅវិទ្យាល័យ ព្រះសីហនុ ស្ថិតក្នុងក្រុងកំពង់ចាម ។

នៅក្នុងឱកាសនោះ ឯកឧត្តម អ៊ុន ចាន់ដា អភិបាល នៃគណៈខេត្តកំពង់ចាម បានថ្លែងលើកទឹកចិត្តដល់សិស្សាទាំងអស់ ត្រូវតាំងចិត្តខ្ពស់ ក្នុងការធ្វើ កិច្ចការរបស់ខ្លួន និង គោរពនូវបទបញ្ជានៃការប្រឡង។រាល់សំណួរចម្លើយ  ត្រូវតែមកចិត្តទុកដាក់ខ្ពស់ អ្វីដែលចេះត្រូវ ធ្វើជាមុន ។ត្រូវចាំថាអ្វីដែលយើងបានខិតខំពីមុន យកមកបញ្ចេញឲ្យអស់ពីសមត្ថភាពក្នុងពេលប្រឡងនេះ ដើម្បីប្រជែងយកឱ្យបាននូវពិន្ទុល្អ»និងដោយឈរលើគោលការណ៍ អ្នកចេះគឺជាប់នឹងសូមជូនពរ​ក្មួយៗ ជាប់ក្នុងការប្រលងបាក់ឌុបទាំងអស់គ្នា។។ក្នុងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) រយៈពេល២ថ្ងៃនេះ គឺនៅថ្ងៃទី ១០ ១១  ខែសីហា ឆ្នាំ២០២៦ ។

តាមការបញ្ជាក់របស់ប្រធានមន្ទីរអប់រំ យុវជន និងកីឡាខេត្តកំពង់ចាម បានឲ្យដឹងថា បេក្ខជនក្នុងខេត្ត ដែលបានដាក់ពាក្យប្រឡងសញ្ញាបត្រមធ្យមសិក្សាទុតិយភូមិ នាឆ្នាំ២០២៦ នេះ ខេត្តកំពង់ចាម មានបេក្ខជនចំនួនសរុប ៩.៧៣៦នាក់ ក្នុងនោះបេក្ខជនស្រី ៥.៧៣៤នាក់ ។ខេត្តមានមណ្ឌលប្រលងមានចំនួន ១៦មណ្ឌល ក្នុងនោះ មាន៖ វិទ្យាសាស្រ្តចំនួន ៥មណ្ឌល និងវិទ្យាសាស្ត្រសង្គមចំនួន ១១មណ្ឌល៕

ដោយ ៖ឆាយ ម៉ុត