AKP ព្រះសីហនុ ថ្ងៃទី៩ ខែសីហា ឆ្នាំ២០២៦--លោក អ៉ី ធារិន អភិបាល នៃគណៈអភិបាលស្រុកព្រៃនប់បានអញ្ជើញសំណេះសំណាលជាមួយបេក្ខជនប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០២៥-២០២៦ សម័យប្រឡងថ្ងៃទី១០ និង១១ ខែសីហា ឆ្នាំ២០២៦ ដែលមកពីវិទ្យាល័យចំនួន ៦ ក្នុងនោះមកវិទ្យាល័យស្រុកកំពង់សិលា វិទ្យាល័យស្រុកស្ទឹងហាវ វិទ្យាល័យស្រុកព្រៃនប់ និងវិទ្យាល័យក្រុងកំពង់សោម នារសៀលថ្ងៃអាទិត្យទី៩ ខែសីហា ឆ្នាំ២០២៦នេះ ។

លោក អ៉ី ធារិន អភិបាលស្រុកព្រៃនប់ បានផ្តល់នូវគំនិត ចំណេះដឹងថ្មីបន្ថែមទៀតដល់បេក្ខជនត្រូវបញ្ចេញសមត្ថភាព របស់ខ្លួនដែលបានខិតខំសិក្សារយពេល ១២ឆ្នាំកន្លង មក។
  
លោក អភិបាលស្រុកបានបន្តថា ក្រោមការយក ចិត្តទុកដាក់ និងការណែនាំរបស់ ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ ផ្តល់ការឧបត្ថម្ភគាំទ្រដល់បេក្ខជនប្រឡងសញ្ញាបតមធ្យមសិក្សាទុតិយភូមិក្នុងឆ្នាំសិក្សា២០២៥-២០២៦ ដោយបានរៀបចំផ្តល់ជូនកន្លែងស្នាក់នៅចំនួន ២យប់ និងអាហារ ៦ពេល និងការផ្ញើកង់ម៉ូតូដោយឥតគិតថ្លៃថែមទៀតផង ដើម្បីជួយសម្រួលដល់ការប្រឡងរបស់ក្មួយៗសិស្សានុសិស្សមកពីវិទ្យាល័យចំនួន ៦រួមមាន៖
១. វិទ្យាល័យ ហ៊ុន សែន វាលរេញ
២. វិទ្យាល័យ ហ៊ុន សែន ព្រៃនប់
៣. វិទ្យាល័យ ហ៊ុន សែន ស្ទឹងហាវ
៤. វិទ្យាល័យតេជោសែន បឹងតាព្រហ្ម
៥. វិទ្យាល័យ ទួលកែវ
៦. វិទ្យាល័យ ហ៊ុន សែន កំពង់សីលា ដែលត្រូវមកប្រឡងនៅមណ្ឌលប្រឡងចំនួន២ ក្នុងស្រុកព្រៃនប់៖ ក្នុងនោះមណ្ឌលថ្នាក់វិទ្យាសាស្ត្រ ស្ថិតនៅសាលាបឋមសិក្សា ហ៊ុន សែន វាលរេញ និងមណ្ឌលថ្នាក់វិទ្យាសាស្ត្រ សង្គម នៅវិទ្យាល័យ ហ៊ុន សែន វាលរេញ ស្រុកព្រៃនប់។

ទន្ទឹមនោះរដ្ឋបាលស្រុកព្រៃនប់ ក៏បានធ្វើការអំពាវនាវ ១.សម្រាប់អ្នកធ្វើដំណើរតាមដងផ្លូវជាតិលេខ៤ សូមបងប្អូនប្រជាពលរដ្ឋ និងអ្នកបើកបរយានយន្តគ្រប់ប្រភេទមេត្តាបន្ថយល្បឿន និងបង្កើនការប្រុងប្រយ័ត្នខ្ពស់ក្នុងការបើកបរឆ្លងកាត់តំបន់ជុំវិញមណ្ឌលប្រឡង ដើម្បីធានាសុវត្ថិភាព និងជៀសវាងការបង្កសំឡេងរំខានដល់បេក្ខជនប្រឡង។ ២. សប្បុរសជន និងសាធារណជនប្រសិនបើមាន បំណងចូលរួមជួយឧបត្ថម្ភ សម្ភារផ្សេងៗជូនដល់បេក្ខជនប្រឡង និងក្រុមការងារ អាចទំនាក់ទំនងជួយឧបត្ថម្ភតាមរយៈរដ្ឋបាលស្រុកព្រៃនប់។ 

ទន្ទឹមនោះ លោក អភិ បាលស្រុកព្រៃនប់ សូមជូនពរដល់បេក្ខជនទាំងអស់ទទួលបានសុខភាពល្អ គោរពវិន័យ និងបទបញ្ជាផ្ទៃក្នុងនៃការប្រឡងសញ្ញាបត្រមធ្យមសិក្សាទុតិយភូមិ នាពេលខាងមុខទទួល បានលទ្ធផលល្អគ្រប់គ្នា និងទទួលបាននិទ្ទេសល្អគ្រប់ៗគ្នា ៕

ដោយ ងូ សុមុនី