AKP បន្ទាយមានជ័យ ថ្ងៃទី៩ ខែសីហា ឆ្នាំ២០២៦--ឯកឧត្ដម កែ គឹមយ៉ាន សមាជិកគណៈអចិន្ត្រៃយ៍ គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋាន ខេត្តបន្ទាយមានជ័យ បានសម្តែងនូវសេចក្តីកោតសរសើរ និងថ្លែងអំណរគុណដោយសេចក្តីស្រលាញ់យ៉ាងជ្រាលជ្រៅបំផុត ចំពោះបងប្អូនជនរួមជាតិទាំងអស់ ដែលតែងតែផ្តល់នូវជំនឿជាក់ និងការគាំទ្រយ៉ាងធំធេងឥតងាករេ ចំពោះការដឹកនាំរបស់គណបក្សប្រជាជនកម្ពុជា នៅគ្រប់អាណត្តិនៃរាជរដ្ឋាភិបាល។ការថ្លែងនេះត្រូវបានធ្វើឡើងនាព្រឹកថ្ងៃអាទិត្យ ទី៩ ខែសីហា ឆ្នាំ២០២៦ ក្នុងឱកាសដែលឯកឧត្ដម បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសំណេះសំណាលជាមួយមន្រ្តីគណបក្សក្រុង សង្កាត់ សាខាបក្សភូមិ យុវជនគណបក្សក្រុងសិរីសោភ័ណ មន្រ្តីគណបក្សមូលដ្ឋាន និងសាខាគណបក្សមន្ទីរ អង្គភាពជុំវិញខេត្តបន្ទាយមានជ័យ។

នៅក្នុងពិធីដ៏មានអត្ថន័យនេះ ឯកឧត្ដម កែ គឹមយ៉ាន បានវាយតម្លៃខ្ពស់ចំពោះកិច្ចខិតខំប្រឹងប្រែងដោយមិននឿយហត់របស់អាជ្ញាធរដែនដី និងកងកម្លាំងមានសមត្ថកិច្ចគ្រប់លំដាប់ថ្នាក់ សមាជិក សមាជិកាគណបក្ស វិស័យឯកជន វិស័យសាសនា ព្រមទាំងប្រជាពលរដ្ឋទាំងអស់ក្នុងខេត្តបន្ទាយមានជ័យ ដែលបានរួមគ្នាយ៉ាងសកម្មក្នុងការអនុវត្តកម្មវិធីនយោបាយរបស់គណបក្ស និងរាជរដ្ឋាភិបាល។ ពិសេសជាងនេះទៅទៀត ឯកឧត្ដមបានគូសបញ្ជាក់ដោយកោតសរសើរពីស្មារតីសាមគ្គីភាពជាតិនិយមដ៏រឹងមាំ ក្នុងការរួមសុខទុក្ខជាមួយគ្នា ដោះស្រាយការលំបាកជូនប្រជាពលរដ្ឋភៀសសឹកនៅតាមព្រំដែនកម្ពុជា-ថៃ និងការប្រយុទ្ធតតាំងការពារទឹកដីប្រឆាំងនឹងកងទ័ពឈ្លានពានថៃ នាពេលកន្លងមក ប្រកបដោយវីរភាពខ្ពង់ខ្ពស់។

ទន្ទឹមនឹងនេះ ឯកឧត្តម កែ គឹមយ៉ាន បានរំលេចថា កម្ពុជាក្រោមការដឹកនាំប្រកបដោយថាមពល ប៉ិនប្រសព្វ និងទស្សនវិស័យច្បាស់លាស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដោយបានបន្តអនុវត្តយ៉ាងស្មោះស្ម័គ្រនូវមាគ៌ានយោបាយរបស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជាប្រធានព្រឹទ្ធសភា បានធ្វើឱ្យប្រទេសជាតិរក្សាបានយ៉ាងរឹងមាំនូវស្ថិរភាពនយោបាយ និងការអភិវឌ្ឍលើគ្រប់វិស័យ។ ជាលទ្ធផលជាក់ស្តែង សេដ្ឋកិច្ចកម្ពុជាក្នុងឆមាសទី១ ឆ្នាំ២០២៦ នេះ នៅតែបន្តសម្រេចបាននូវកំណើនវិជ្ជមានប្រមាណ ៤,២% ដែលជាសក្ខីភាពបង្ហាញពីភាពធន់ និងការរីកចម្រើនទៅមុខយ៉ាងលឿន។

ដើម្បីបន្តរក្សានូវសមិទ្ធផលទាំងនេះ ឯកឧត្តម កែ គឹមយ៉ាន បានផ្តល់អនុសាសន៍ និងការណែនាំជាយុទ្ធសាស្ត្រដល់មន្ត្រី អាជ្ញាធរដែនដី និងសមាជិក សមាជិកាគណបក្សទាំងអស់ ត្រូវការពារដាច់ខាតនូវសុខសន្តិភាព ថែរក្សាឱ្យបានជាដាច់ខាតនូវស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈ ដែលជាគ្រឹះដ៏សំខាន់សម្រាប់ការអភិវឌ្ឍ។ការពារជាតិ សាសនា ព្រះមហាក្សត្រ ប្តេជ្ញាការពារអធិបតេយ្យភាពជាតិ បូរណភាពទឹកដី និងគាំទ្រយ៉ាងពេញទំហឹងចំពោះរាជរដ្ឋាភិបាលស្របច្បាប់។ពង្រឹងសន្តិសុខមូលដ្ឋាន បន្តជំរុញ និងអនុវត្តគោលនយោបាយ «ភូមិ ឃុំ សង្កាត់ មានសុវត្ថិភាព» ឱ្យកាន់តែមានប្រសិទ្ធភាពខ្ពស់ ដើម្បីធានាសុខសុវត្ថិភាពជូនប្រជាពលរដ្ឋនៅគ្រប់មូលដ្ឋាន៕

ដោយ ឈុន សារ៉ាត