AKP កំពង់ធំ ថ្ងៃទី៩ ខែសីហា ឆ្នាំ២០២៦--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានប្រចាំការនិងជាប្រធានលេខាធិការដ្ឋានសមាគមអតីតយុទ្ធជននិងនិវត្តជនកម្ពុជាខេត្តកំពង់ធំកាលពីរសៀលថ្ងៃទី០៨ខែសីហាឆ្នាំ២០២៦បានទៅសំណេះសំណាលសាកសួរសុខទុក្ខនិងនាំយកនូវស្បៀងអាហារ គ្រឿងឧបភោគបរិភោគ ឧបត្ថម្ភជូនបងប្អូនអតីតយុទ្ធជនពិការ ដោយសារសង្គ្រាមដែលជីវភាពលំបាកខ្វះខាតនៅសង្កាត់ដំរីជាន់ខ្លាក្រុងស្ទឹងសែនខេត្តកំពង់ធំ ។

ឱកាសនោះ ឧត្តមសេនីយ៍ទោ សោម ស៊ុន បានពាំនាំនូវការផ្តាំផ្ញើសាកសួរសុខទុក្ខ ពីសំណាក់សម្ដេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជាសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម នួន ផារ័ត្ន អភិបាលខេត្ត ប្រធានសមាគមអតីតយុទ្ធជន និងនិវត្តជនកម្ពុជាខេត្តកំពង់ធំ ដែលជានិច្ចកាលសម្ដេច ឯកឧត្តមនិងលោកជំទាវ តែងតែប្រគល់ភារកិច្ចដល់គណៈកម្មាធិការសមាគមអតីតយុទ្ធជននៅគ្រប់ថ្នាក់ត្រូវជួយមើលថែទាំពីសុខទុក្ខនិងជីវភាពរស់នៅរបស់បងប្អូនអតីតយុទ្ធជននិងវិវត្តជនឱ្យបានល្អប្រសើរនិងបានសូមជូនពរដល់បងប្អូនទាំងអស់ព្រមទាំងក្រុមគ្រួសារ សូមទទួលបាននូវសុខភាពល្អ អាយុយឺនយូរ និងពុទ្ធពរទាំងបួនប្រការ កុំបីឃ្លៀងឃ្លាតឡើយ ។

លោក ថោង ធីម តំណាងអតីតយុទ្ធជនពិការ ដោយសារសង្គ្រាមស៊ីវិលនៅកម្ពុជាទាំង៥គ្រួសារបានថ្លែងនូវការគោរពដឹងគុណចំពោះសម្ដេចតេជោ ហ៊ុន សែន ប្រធានសមាគមអតីតយុទ្ធជនកម្ពុជានិងសម្ដេចកិត្តិព្រឹទ្ធបណ្ឌិត ព្រមទាំងសម្ដេចមហាបវរធិបតី ហ៊ុន ម៉ាណែតនិងលោកជំទាវដែលតែងតែយកចិត្តទុកដាក់ពីសុខទុក្ខនិងជីវភាពរស់នៅរបស់អតីតយុទ្ធជនដែលធ្លាប់មានគុណបំណាច់ចំពោះជាតិមាតុភូមិ។ជាក់ស្ដែងនៅខេត្តកំពង់ធំ តាមរយៈឧត្តមសេនីយ៍ទោ សោម ស៊ុន  តំណាងគណៈកម្មាធិការសមាគមអតីតយុទ្ធជន និងនិវត្តជនកម្ពុជាខេត្តកំពង់ធំ សម្ដេចលោកបានចាត់ចែងសាងសង់ផ្ទះសម្បែងផ្ដល់សម្បទានដីសង្គមកិច្ច និងឧបត្ថម្ភគ្រឿងឧបភោគបរិភោគជាបន្តបន្ទាប់ជូនដល់អតីតយុទ្ធជននៅគ្រប់មូលដ្ឋានក្នុងខេត្តកំពង់ធំ។ បងប្អូនអតីតយុទ្ធជនពិតជាមិនអាចបំភ្លេចនូវគុណូបរៈដ៏ធំធេងនេះបានឡើយ​ហើយ​យើង​ខ្ញុំ​ទាំង​អស់​គ្នា​ជា​អតីតយុទ្ធជនពិការទាំង៥គ្រួសារនេះបានទទួលផ្ទះអំណោយដ៏ថ្លៃថ្លារបស់សម្តេចតេជោ រួចហើយដែរ ។

ក្នុងឱកាសនោះឧត្តមសេនីយ៍ទោ សោម ស៊ុនបានប្រគល់ជូននៅស្បៀងអាហារគ្រឿងឧបភោគបរិភោគ ដែលជាអំណោយរបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ជូនដល់អតីតយុទ្ធជនពិការដោយសារសង្គ្រាមទាំង៥គ្រួសារដោយក្នុងមួយគ្រួសារទទួលបាននូវអង្ករចំនួន២៥គីឡូក្រាម មីជាតិចំនួន១កេស ទឹកត្រីទឹកស៊ីអ៊ីវចំនួន២យួរ ត្រីខកំប៉ុងចំនួន១យួរនឹងបានផ្ដល់ថវិកា​ជូនដល់គ្រួសារ​អតីត​យុទ្ធ​ជន​ពិការ​ដែល​ស្វាមី​របស់​គាត់​មាន​ជំងឺ​កំពុង​សម្រាក​ព្យាបាល​នៅ​មន្ទីរពេទ្យ​ពេទ្យ​បង្អែក​ខេត្តកំពង់​ធំ​៕

ដោយ ស៊ុម វណ្ណា