AKP តាកែវ ថ្ងៃទី០៨ ខែសីហា ឆ្នាំ២០២៦ — ដើម្បីលើកកម្ពស់សណ្ដាប់ធ្នាប់សាធារណៈ សោភណភាព អនាម័យ បរិស្ថាន និងធានាបាននូវសុវត្ថិភាពចរាចរណ៍តាមដងផ្លូវជូនប្រជាពលរដ្ឋ លោក អ៊ុ ចំរើន អភិបាលនៃគណៈអភិបាលស្រុកទ្រាំង បានដឹកនាំក្រុមការងារចម្រុះរួមមាន លោកអភិបាលរងស្រុក មន្ត្រីការិយាល័យជំនាញពាក់ព័ន្ធ អាជ្ញាធរមូលដ្ឋាន និងកងកម្លាំងប្រដាប់អាវុធ ចុះរៀបចំសណ្ដាប់ធ្នាប់សាធារណៈ និងអប់រំណែនាំដល់បងប្អូនអាជីវករលក់ដូរតាមបណ្ដោយផ្លូវជាតិលេខ២ ក្នុងផ្សារល្វេ និងផ្សារកំពង់ជ្រៃ។ ការចុះអប់រំណែនាំដោយផ្ទាល់នេះ ធ្វើឡើងនៅក្នុងផ្សារចំនួន២ តាមបណ្ដោយផ្លូវជាតិលេខ២ គឺផ្សារល្វេស្ថិតនៅក្នុងឃុំប្រាំបីមុមននិងផ្សារកំពង់ជ្រៃស្ថិតនៅក្នុងឃុំស្មោង ស្រុកទ្រាំងខេត្តតាកែវ កាលពីព្រឹកថ្ងៃសុក្រ ៩រោច ខែទុតិយាសាឍ ឆ្នាំមមី អដ្ឋស័ក ព.ស២៥៧០ ត្រូវនឹងថ្ងៃទី០៧ ខែសីហា ឆ្នាំ២០២៦។

ក្នុងឱកាសចុះអប់រំណែនាំនោះ លោក អ៊ុ ចំរើន អភិបាលនៃគណៈអភិបាលស្រុកទ្រាំង បានធ្វើការណែនាំយ៉ាងយកចិត្តទុកដាក់ដល់បងប្អូនអាជីវករលក់ដូរ និងប្រជាពលរដ្ឋដែលប្រកបអាជីវកម្មនៅតាមដងផ្លូវ ត្រូវរៀបចំទំនិញ និងតូបលក់ដូរឱ្យមានរបៀបរៀបរយ ដោយដាច់ខាតមិនត្រូវលក់ដូររំលោភលើចិញ្ចើមផ្លូវ ឬទ្រូងផ្លូវសាធារណៈឡើយ។ ការអនុវត្តវិធានការនេះ គឺធ្វើឡើងដើម្បីសម្រួលដល់ការធ្វើដំណើរ ធានាសុវត្ថិភាពចរាចរណ៍ កាត់បន្ថយគ្រោះថ្នាក់ លើកកម្ពស់សោភណភាព អនាម័យ និងបរិស្ថាន ក្នុងមូលដ្ឋានឱ្យកាន់តែមានភាពល្អប្រសើរ។

លោក អ៊ុ ចំរើន ក៏បានអំពាវនាវដល់អាជីវករលក់ដូរ និងប្រជាពលរដ្ឋទាំងអស់ ឱ្យបន្តចូលរួមសហការជាមួយអាជ្ញាធរមូលដ្ឋាន ដោយគោរពតាមការអប់រំណែនាំរបស់អាជ្ញាធរ ត្រូវរួមគ្នាថែរក្សាអនាម័យ បរិស្ថាន និងសណ្តាប់ធ្នាប់សាធារណៈ ដើម្បីឱ្យតាមបណ្តោយផ្លូវជាតិលេខ២ មានសោភណភាព សុវត្ថិភាព និងបង្កភាពងាយស្រួលដល់ការធ្វើដំណើររបស់បងប្អូនប្រជាពលរដ្ឋ និងអ្នកដំណើរគ្រប់រូប។

លោក អ៊ុ ចំរើន បានមានប្រសាសន៍បន្តថា ការរៀបចំសណ្ដាប់ធ្នាប់សាធារណៈនេះ មិនមែនជាការរឹតត្បិតការរកស៊ីរបស់បងប្អូនឡើយ ប៉ុន្តែវាជាការរួមគ្នារៀបចំរបៀបរៀបរយឱ្យបានល្អដើម្បីទាក់ទាញម៉ូយ និងអ្នកទេសចរណ៍ឱ្យចូលមកទិញទំនិញរបស់បងប្អូនកាន់តែច្រើន ដែលជាប្រភពចំណូលដ៏ល្អសម្រាប់លើកស្ទួយជីវភាពគ្រួសាររបស់បងប្អូនកាន់តែរីកចម្រើនបន្ថែមទៀត។

លោក អ៊ុ ចំរើន បានបញ្ជាឱ្យកម្លាំងជំនាញរបស់រដ្ឋបាលស្រុកទាំងអស់ ត្រូវបន្តចុះអប់រំណែនាំដល់អាជីវករលក់ដូរទាំងអស់ជាប្រចាំ ដោយឈរលើគោលការណ៍អប់រំ និងយោគយល់គ្នាទៅវិញទៅមក ដើម្បីជៀសវាងការបង្កផលប៉ះពាល់ដល់ការធ្វើដំណើររបស់បងប្អូនប្រជាពលរដ្ឋ និងការលក់ដូរប្រចាំថ្ងៃរបស់បងប្អូនអាជីវករ៕

ដោយ៖ អ៊ុច សៀង