AKP ពោធិ៍សាត់ ថ្ងៃទី៨ ខែសីហា ឆ្នាំ២០២៦ --អនុវត្តន៍តាមផែនការពហុវិស័យ និងផែនការ យុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១១ អគ្គលេខាធិការដ្ឋាននៃអាជ្ញាធរជាតិប្រយុទ្ឋប្រឆាំងគ្រឿងញៀន​ ចាប់តាំងថ្ងៃទី៦-៧ ខែសីហា ឆ្នាំ២០២៦ បានសហការជាមួយក្រសួងទេសចរណ៍ មន្ទីរទេសចរណ៍ខេត្តពោធិ៍សាត់ ដើម្បីចូលរួមចុះផ្សព្វផ្សាយអប់រំពីគ្រោះថ្នាក់នៃគ្រឿងញៀនដល់ប្រតិបត្តិករ និងបុគ្គលិកបម្រើការនៅតាមមូលដ្ឋានអាជីវកម្មសេវាកម្មទេសចរណ៍ ក្នុងក្រុងពោធិ៍សាត់ ខេត្តពោធិ៍សាត់ បានចំនួន១៩ទីតាំង គ្របដណ្តប់ចំនួនមនុស្ស ១៣៧នាក់។ ការចុះផ្សព្វផ្សាយនេះ បានធ្វើឡើងនាថ្ងៃទី៧ ខែសីហា ឆ្នាំ២០២៦ នៅខេត្តពោធិ៍សាត់។

លោក មីលីយ៉ា សុវត្ថិធី អនុប្រធានមន្ទីរទេសចរណ៍ខេត្តពោធិ៍សាត់ បានស្វាគមន៍និងបង្ហាញពីសភាពការណ៍ទេសចរណ៍នៅក្នុងខេត្ត ក៏ដូចជាកិច្ចខិតខំប្រឹងប្រែងលើកកម្ពស់ប្រសិទ្ធភាពការងារប្រយុទ្ធប្រឆាំងគ្រឿងញៀនដើម្បីធានាសុវត្ថិភាពនិងទាក់ទាញអ្នកទេសចរណ៍ឱ្យមកលេងខេត្តពោធិ៍សាត់ នៃដងទន្លេសាបមួយនេះ។ លោកបានបន្តថា មន្ទីរទេសចរណ៍ខេត្ត នឹងបន្តអនុវត្តនៅរាល់គោលនយោបាយទាក់ទាញទេសចរណ៍រដូវកាលបៃតង។

ថ្លែងក្នុងនាម ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ក្នុងឱកាសនោះលោក សំ សេង នាយករងវិទ្យាស្ថានទេសចរណ៍ តំណាងក្រុមការងារប្រយុទ្ធប្រឆាំងគ្រឿងញៀន ក្រសួងទេសចរណ៍ បានផ្សព្វផ្សាយផែនការលេខ ០១ ផក ចុះថ្ងៃទី១៣ ខែកុម្ភ: ឆ្នាំ២០២៦ ស្តីពីផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាលលើកទី១១ ។

ក្នុងឱកាសនោះ ឯកឧត្តម ឧត្តមសេនីយ៍ឯក លឹម តុងហួត ប្រធានផ្សព្វផ្សាយ អប់រំ និងទំនាក់ទំនងសាធារណៈ នៃអាជ្ញាធរជាតិប្រយុទ្ធប្រឆាំងគ្រឿងញៀន បានពាំនាំការថ្លែងអំណរគុណ និងកោតសសើររបស់ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជូនដល់គ្រប់សមាសភាពនៃវិស័យទេសចរណ៍ ដែលបានចូលរួមយ៉ាងសកម្មក្នុងការងារប្រយុទ្ធប្រឆាំងគ្រឿងញៀន។ ឯកឧត្តម ឧត្តមសេនីយ៍ឯកបានបន្ថែមថា គោលបំណងនៃការផ្សព្វផ្សាយនាពេលនេះ គឺពង្រឹងការចូលរួមរបស់វិស័យឯកជនជួយបង្ការ ទប់ស្កាត់ការរីករាលបញ្ហាគ្រឿងញៀន តាមរយ:ការផ្តល់នូវខិតបណ្ណ សៀវភៅច្បាប់ស្តីពីការត្រួតពិនិត្យគ្រឿងញៀន ស្ទីកឃ័រណែនាំឱ្យទៅទទួលសេវាព្យាបាលដោយផ្អែកលើសហគមន៍ នៅមូលដ្ឋានសុខាភិបាល និងបំផុសការប្រើប្រាស់ App NoDrug ។

ជាមួយគ្នានេះ ឯកឧត្តម ឧត្តមសេនីយ៍ឯក លឹម តុងហួត ក៏បានថ្លែងបញ្ជាក់ជូនថា ការចូលរួមជួយពីម្ចាស់ទីតាំងអាជីវកម្មសេវាកម្មទេសចរណ៍ក្នុងការងារប្រយុទ្ធប្រឆាំងគ្រឿងញៀនគឺជាការជួយខ្លួនឯង ការពារបាននូវសុវត្ថិភាពបុគ្គលិក និងសហគមន៍ពីបញ្ហា
គ្រឿងញៀន។

សូមបញ្ជាក់ថា ខេត្តពោធិ៍សាត់ មានកន្លែង ព្យាបាលអ្នកញៀនគ្រឿងញៀនចំនួនពីរកន្លែង គឺនៅមន្ទីរពេទ្យបង្អែកខេត្តពោធិ៍សាត់ និងមន្ទីរពេទ្យបង្អែកស្រុកបាកាន៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន