AKP ភ្នំពេញ ថ្ងៃទី៧ ខែសីហា ឆ្នាំ២០២៦--ក្នុងពិធីសំណេះសំណាលជាមួយសិស្សានុសិស្សថ្នាក់ទី១២ នៃវិទ្យាល័យ ហ៊ុន សែន ខ្ចៅ ក្នុងស្រុកកងមាស ខេត្តកំពង់ចាម ដែលត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ នាព្រឹកថ្ងៃទី០៧ ខែសីហា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកកងមាសបានណែនាំពួកគេឱ្យខិតខំរម្លឹកមេរៀន រៀបចំផែនការសិក្សា និងការវិភាគឱ្យបានច្បាស់លាស់ ព្រមទាំងយកចិត្តទុកដាក់ថែរក្សាសុខភាព និងសម្រាកឱ្យបានគ្រប់គ្រាន់ ជាពិសេសត្រូវមានការប្រុងប្រយ័ត្នខ្ពស់ក្នុងការបើកបរដើម្បីចៀសវាងគ្រោះថ្នាក់ចរាចរណ៍ ដែលអាចធ្វើឱ្យខកខានដល់ការប្រឡង។

ក្នុងឱកាសនេះ ឯកឧត្តមបណ្ឌិតសភាចារ្យ បានលើកឡើងពីផែនការជំរុញសិស្សានុសិស្សឱ្យជ្រើសរើសថ្នាក់វិទ្យាសាស្ត្រនៅឆ្នាំសិក្សាខាងមុខៗ តាមរយៈការផ្ដល់ប្រឹក្សា និងពិគ្រោះយោបល់ជាមួយសិស្សានុ សិស្សឱ្យបានដិតដល់ ដើម្បីតម្រង់ទិសពួកគាត់ឱ្យបន្តការសិក្សានៅកម្រិតឧត្តមសិក្សា និងចាប់យកជំនាញច្បាស់លាស់សម្រាប់អនាគត។
ក្នុងពិធីសំណេះសំណាលនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានប្រគល់ជូននូវភេសជ្ជៈ គ្រឿងឧបភោគបរិភោគ និងថវិកាលើកទឹកចិត្តដល់សិស្សានុសិស្ស និងលោកគ្រូ អ្នកគ្រូ ដើម្បីជាការគាំទ្រ និងផ្ដល់កម្លាំងចិត្តបន្ថែមសម្រាប់ការប្រឡងនាពេលខាងមុខ។

សូមជម្រាបថា ចាប់ពីឆ្នាំ២០១៧ ដល់ឆ្នាំ២០២៥ មានសិស្សវិទ្យាល័យ ហ៊ុន សែន ខ្ចៅសរុបចំនួន ៤៨១នាក់ទទួលបានអាហារូបករណ៍សិក្សាថ្នាក់ឧត្តមសិក្សា ១០០% ពីឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ដោយបានបន្តការសិក្សានៅសាកលវិទ្យាល័យជាតិគ្រប់គ្រង សាកលវិទ្យាល័យភូមិន្ទភ្នំពេញ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និងវិទ្យាស្ថានបច្ចេកវិទ្យាកម្ពុជា។ បន្ថែមពីនេះ ចាប់ពីឆ្នាំ២០១៧ ដល់ឆ្នាំ២០២៦ សិស្សថ្នាក់ទី១២ សរុបចំនួន ២២៧៤នាក់ ក៏ទទួលបានសៀវភៅសង្ខេបមេរៀន សម្ភារសិក្សា និងថវិកាឧបត្ថម្ភពីឯកឧត្តមបណ្ឌិតសភាចារ្យ ឧបនាយករដ្ឋមន្ត្រីផងដែរ៕

ដោយ៖ ចាន់ សុភឿន (ប្រភព៖ ក្រសួងអប់រំ)