AKP កណ្តាល ថ្ងៃទី៧ ខែសីហា ឆ្នាំ២០២៦--អគារសិក្សា១ខ្នង មានកម្ពស់ ៣ជាន់ នៃវិទ្យាល័យ អប់រំពិសេសក្រុងតាខ្មៅ ស្ថិតនៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល ដែលជាអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ្រ ចន្ទមុន្នី ត្រូវបានរៀបចំពិធីក្រុងពាលីបញ្ចុះបឋមសិលាបើកការដ្ឋានសាងសង់ នៅថ្ងៃទី០៧ ខែសីហា ឆ្នាំ២០២៦ ក្រោមអធិបតីភាពឯកឧត្ដម នូ សាខន ប្រធានក្រុមប្រឹក្សាខេត្តកណ្តាល និងឯកឧត្ដម គួច ចំរើន អភិបាលខេត្តកណ្ដាល។

លោក ចាន់ សារិន នាយកវិទ្យាល័យអប់រំពិសេសក្រុងតាខ្មៅ បានឱ្យដឹងថា អគារសិក្សា១ខ្នង កម្ពស់ ៣ជាន់ ទទឹង ៩ម៉ែត្រ បណ្តោយ ២៧,៥ម៉ែត្រនេះ មានបន្ទប់បណ្ណាល័យ បន្ទប់ផ្ចង់អារម្មណ៍ បន្ទប់ផ្នែកលំនឹងសិរីរាង បន្ទប់កុំព្យូទ័រ បន្ទប់រៀន និងមានសាលបណ្ដុះបណ្ដាលប្រជុំគ្រូ និងប្រជុំអាណាព្យាបាល។ អគារសិក្សានេះមានអត្ថប្រយោជន៍សម្រាប់កុមារដែលពិការភាពសតិបញ្ញា និងអូទីស្សឹម មានបំណងសិក្សាប្រវត្តិសាស្ត្រ វប្បធម៌ ប្រពៃណីទំនៀមទំនាប់ របស់ប្រទេសកម្ពុជា ពួកគាត់អាចចូលសិក្សានៅបណ្ណាល័យនេះបាន ពីព្រោះកុមារពិការភាពសតិបញ្ញា និងអូទីស្សឹម ពួកគាត់មានការចងចាំល្អណាស់ ហើយសម្រាប់កុមារដែលមានអាកប្បកិរិយា អគារសិក្សានេះមានបន្ទប់សម្រាប់ផ្ចង់អារម្មណ៍ ដើម្បីកាត់បន្ថយអាកប្បកិរិយារបស់ពួកគាត់ម្ដងៗ មានបន្ទប់លំនឹងសិរីរាង ដើម្បីរក្សាលំនឹងពួកគាត់ឱ្យបានល្អ ហើយអាណាព្យាបាលក៏អាចចូលរួមសិក្សានៅក្នុងបណ្ណាល័យនេះបានដែរ សម្រាប់សាលប្រជុំគឺដើម្បីបណ្ដុះបណ្ដាលដល់អាណាព្យាបាលដែលត្រូវការរៀនសូត្រ ថែទាំ ការយកចិត្តទុកដាក់ និងការបង្រៀនរបស់កូនៗរបស់ពួកគាត់។លោកនាយកសាលា បានថ្លែងអំណរគុណយ៉ាងជ្រាលជ្រៅបំផុតចំពោះ សម្ដេចមហាបវរធិបតី និងលោកជំទាវបណ្ឌិត ដែលតែងតែយកចិត្តទុកដាក់បំផុតចំពោះក្មួយៗ និងក្មេងៗ ដែលពិការភាពសតិបញ្ញា និងអូទីស្សឹម បានចូលរៀនគ្រប់ៗគ្នាដូចកុមារដទៃ ស្របតាមច្បាប់អប់រំជាតិ  និងគោលនយោបាយរបស់ក្រសួងអប់រំយុវជន និងកីឡា។

ក្នុងពិធីក្រុងពាលីបញ្ចុះបឋមសិលាបើកការដ្ឋានសាងសង់នេះដែរ បានរៀបចំតាមបែបព្រះពុទ្ធសាសនា ដោយរៀបចំគ្រឿងសក្ការបូជាជូនដល់ម្ចាស់ទឹកម្ចាស់ដី និងអារក្សអារ័ក្សទេវតា ដើម្បីសុំខមាទោស និងសុំការអនុញ្ញាតប្រើប្រាស់ទីតាំងសាងសង់ឱ្យបានសុខសប្បាយ។ គម្រោងសាងសង់អគារសិក្សានេះគ្រោងនឹងបញ្ចប់នៅថ្ងៃទី០៦ ខែឧសភា ឆ្នាំ២០២៧ខាងមុខនេះ ៕

ដោយ៖ ណយ នឿន (ប្រភព៖រដ្ឋបាលខេត្តកណ្តាល)