AKP បន្ទាយមានជ័យ ថ្ងៃទី៧ ខែសីហា ឆ្នាំ២០២៦--ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានដាក់ចេញនូវបទបញ្ជាយ៉ាងម៉ឺងម៉ាត់ និងស្មារតីទទួលខុសត្រូវខ្ពស់ដល់ថ្នាក់ ដឹកនាំ មន្ត្រីរាជការ និងកងកម្លាំងប្រដាប់អាវុធទូទាំងស្រុកភ្នំស្រុក ដោយផ្ដោតលើការរឹតបន្តឹងសន្តិសុខសណ្ដាប់ធ្នាប់សាធារណៈ និងការបង្កើនប្រសិទ្ធភាពសេវាសាធារណៈជូនប្រជាពលរដ្ឋឲ្យកាន់តែខិតជិតមូលដ្ឋាន។   

ប្រសាសន៍ក្រើនរម្លឹក និងការតម្រង់ទិសប្រកបដោយខ្លឹមសារស៊ីជម្រៅនេះ បានធ្វើឡើងក្នុងឱកាសដែលឯកឧត្តមអភិបាលខេត្ត អញ្ជើញជាអធិបតីភាពក្នុងពិធីប្រកាសចូលកាន់មុខតំណែងជា អភិបាលនៃគណៈអភិបាលស្រុកភ្នំស្រុក របស់លោកស្រី ចំរើន ដាណេ ជំនួសលោក ជូបុត្រ ដែលត្រូវទទួលភារកិច្ចថ្មីនៅរដ្ឋបាលខេត្ត។

ព្រឹត្តិការណ៍នេះត្រូវបានគេចាត់ទុកជា «របត់ប្រវត្តិសាស្ត្រថ្មី» សម្រាប់ខេត្តបន្ទាយមានជ័យ ដែលមានថ្នាក់ដឹកនាំជាអភិបាលស្រុកស្ត្រីជាលើកដំបូង និងជាការបង្ហាញពីការផ្តល់ឱកាសដល់យុវជនឆ្នើមក្នុងការដឹកនាំមូលដ្ឋាន។    

ទាក់ទងនឹងការងារសន្តិសុខសណ្ដាប់ ធ្នាប់ ឯកឧត្តម អ៊ុ រាត្រី បានសង្កត់ធ្ងន់ថា អាជ្ញាធរ និងសមត្ថកិច្ចគ្រប់លំដាប់ថ្នាក់ត្រូវរួមគ្នាលុបបំបាត់បទល្មើសឲ្យបានជាអតិបរមា ជាពិសេសបាតុភាពដែលប៉ះពាល់ ដល់ជីវភាព និងសុវត្ថិភាពរស់នៅរបស់ប្រជាពលរដ្ឋ។

ឯកឧត្តមបានបញ្ជាក់យ៉ាងច្បាស់ថា«ត្រូវបង្ក្រាប និងលុបបំបាត់ឲ្យអស់នូវល្បែងស៊ីសង ការជួញដូរមនុស្ស បទល្មើសនេសាទ គ្រឿងញៀន ក្មេងទំនើង និងជាពិសេសរាល់ទម្រង់នៃបទល្មើសឆបោកតាមប្រព័ន្ធអនឡាញ (Online Scams) ដែលកំពុងគំរាមកំហែងដល់ពលរដ្ឋ។»   

ទន្ទឹមនឹងនេះ ឯកឧត្តមបានជំរុញឲ្យអភិបាលស្រុកថ្មី និងកងកម្លាំងប្រដាប់អាវុធ ត្រូវបន្តអនុវត្ត «គោលនយោបាយភូមិ-ឃុំ-សង្កាត់មានសុវត្ថិភាព» លក្ខណៈ ៧យ៉ាង ឲ្យមានប្រសិទ្ធភាពខ្ពស់ ដើម្បីធានាសន្តិភាព និងស្ថិរភាពក្នុងមូលដ្ឋាន។

លើសពីការងារសន្តិសុខ ឯកឧត្តមអភិ បាលខេត្តបានដកស្រង់នូវគោលការណ៍នៃសេវាសាធារណៈ ដើម្បីឲ្យរដ្ឋបាលស្រុក និងការិយាល័យច្រកចេញចូលតែមួយយកទៅអនុវត្តជាបន្ទាន់នោះត្រូវធានាដោះស្រាយរាល់សំណើ និងតម្រូវ ការស្របច្បាប់របស់ប្រជាពលរដ្ឋឲ្យចេញជាលទ្ធផលជាក់ស្តែង។ កាត់បន្ថយនីតិវិធីអូសបន្លាយពេល និងឆ្លើយតបភ្លាមៗស្របតាមតម្រូវការប្រញាប់ប្រញាល់របស់ពលរដ្ឋ។ ត្រូវគោរពតម្លៃសេវាដែលកំណត់ដោយច្បាប់ដាច់ខាត ដោយបំបាត់ចោលនូវវប្បធម៌ការិយាល័យធិបតេយ្យ និងអំពើជិះជាន់ផ្សេងៗ។   

ដើម្បីបង្ខិតសេវាឲ្យកាន់តែ ធ្វើឱ្យមានតម្លាភាព ឯកឧត្តមបានណែនាំឲ្យពង្រឹងសមត្ថភាព និងសីលធម៌វិជ្ជាជីវៈរបស់មន្ត្រីច្រកចេញចូលតែមួយនៅស្រុក ព្រមទាំងជំរុញការដាក់ឲ្យដំណើរការយន្តការច្រកចេញចូលតែមួយនៅតាមរដ្ឋបាលឃុំបន្ថែមទៀត។     

ជាមួយនេះឯកឧត្តម អ៊ុ រាត្រី បានជំរុញឲ្យរដ្ឋបាលស្រុកភ្នំស្រុកបន្តអនុវត្តកម្មវិធីកំណែទម្រង់គន្លឹះៗរបស់រាជរដ្ឋាភិបាល រួមមានកំណែទម្រង់រដ្ឋបាលសាធារណៈ វិមជ្ឈការ និងវិសហមជ្ឈការ កំណែទ ម្រង់ហិរញ្ញវត្ថុសាធារណៈ និងប្រព័ន្ធយុត្តិធម៌ ដើម្បីបង្កើតឱកាសថ្មីៗសម្រាប់កំណើនសេដ្ឋកិច្ច។

ឯកឧត្តមបានផ្តាំផ្ញើឲ្យរដ្ឋបាលស្រុកយកចិ ត្តទុកដាក់លើការអនុវត្តផែនការអភិវឌ្ឍន៍ ៥ឆ្នាំ និងកម្មវិធីវិនិយោគ ៣ឆ្នាំរំកិល ដោយចេះកំណត់គម្រោងអាទិភា ពចាំបាច់ និងកៀរគរធនធានពីសប្បុរសជន និងដៃគូអភិវឌ្ឍន៍នានា ដើម្បីប្រែក្លាយមូលដ្ឋានឲ្យមានការរីកចម្រើនលើគ្រប់វិស័យប្រកបដោយចីរភាព។    
សូមបញ្ជាក់ថា ពិធីនេះបានប្រារព្ធឡើងក្រោមអធិបតីភាព ឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុ រាត្រី អភិបាលខេត្ត និងមានការចូលរួមពីអ្នកតំណាងរាស្ត្រ មន្ត្រីរាជការ កងកម្លាំងប្រដាប់អាវុធ និងអាជ្ញាធរមូលដ្ឋានយ៉ាងច្រើនកុះករ៕

ដោយ ៖ឈុនសារ៉ាត