AKP ភ្នំពេញ ថ្ងៃទី៧ ខែសីហា ឆ្នាំ២០២៦---លោកជំទាវ សួស រដ្ឋាវី រដ្ឋលេខាធិការតំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តា លវិជ្ជាជីវៈ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលរយៈពេលពីរថ្ងៃ ស្តីពី កាតព្វកិច្ចរបស់និយោជកក្នុងការអនុវត្តច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យការងារនៅក្នុងសិប្បកម្មផលិតឥដ្ឋ ក្បឿង ដល់ម្ចាស់សិប្បកម្មផលិតឥដ្ឋ ក្បឿងទូទាំងរាជធានី-ខេត្ត នាព្រឹកថ្ងៃទី៦ ខែសីហា ឆ្នាំ២០២៦ នៅវិទ្យាស្ថានជាតិបណ្តុះ បណ្តាលបច្ចេកទេស (NTTI) ដើម្បីលើកកម្ពស់ការយល់ដឹងដល់ម្ចាស់សិប្បកម្មផលិតឥដ្ឋ ក្បឿង ក្នុងការអនុវត្តច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យការងារ និងសន្តិសុខសង្គម ដោយផ្តោតសំខាន់លើលក្ខខណ្ឌទូទៅនៃការងារ លក្ខខណ្ឌសុវត្ថិភាពនិងសុខភាពការងារ របបសន្តិសុខសង្គម ជាពិសេសសំដៅបង្ការនិងទប់ស្កាត់ការប្រើប្រាស់ពលកម្មកុមារនៅតាមសិប្បកម្មផលិតឥដ្ឋ ក្បឿង។

ថ្លែងក្នុងពិធីបើកវគ្គបណ្តុះបណ្តាលដែលមានអ្នកចូលរួមប្រមាណ ៣៤២នាក់មកពីអធិការការងារនៃមន្ទីរការងារនិងបណ្តុះបណ្តាលវិជ្ជាជីវៈ រាជធានី-ខេត្តទាំង២៥ ម្ចាស់សិប្បកម្មផលិតឥដ្ឋ ក្បឿង និងមន្ត្រីនៃអង្គភាពជំនាញពាក់ព័ន្ធ លោកជំទាវរដ្ឋលេខាធិការ បានគូសបញ្ជាក់ថា ពលកម្មកុមារ គឺជាកិច្ចការអាទិភាពមួយដែលរាជរដ្ឋា ភិបាលកំពុងយកចិត្តទុកដាក់ក្នុងការលុបបំបាត់ ក្នុងនោះការផ្តល់កិច្ចការពារ និងការអភិវឌ្ឍកុមារ គឺជាភារកិច្ចដ៏សំខាន់មួយ ដែលតម្រូវឱ្យមានការអនុវត្តបែបពហុវិស័យបញ្ចូលគ្នា។ 

លោកជំទាវបន្តថា សកម្មភាពជាអាទិ ភាព និងសកម្មភាពបន្ទាន់ដែលត្រូវបានកំណត់រួមមាន ការរៀបចំ និងកែលម្អលិខិតបទដ្ឋានគតិយុត្ត ការលើកកម្ពស់ការយល់ដឹងសាធារណៈ ដើម្បីទប់ស្កាត់ពលកម្មកុមារ ការកសាងសមត្ថភាពស្ថាប័ន និងមន្ត្រីអនុវត្តច្បាប់ ព្រមទាំងពង្រឹងការអន្តរាគមន៍នៅមូលដ្ឋាន តាមរយៈការអប់រំ បំណិនជីវិត ការបណ្តុះបណ្តាលវិជ្ជាជីវៈ ការបង្កើតការងារ និងការការពារ ថែទាំសុខភាពកុមារ ដោយផ្តោតលើកុមាររងគ្រោះ និងកុមារងាយរងគ្រោះ។

ទន្ទឹមនេះ លោកជំទាវបានអំពាវនាវឱ្យគ្រប់ភាគីពាក់ព័ន្ធរួមគ្នាបង្ការ និងទប់ ស្កាត់ការប្រើប្រាស់ពលកម្មកុមារនៅតាមសិប្បកម្មផលិតឥដ្ឋ ក្បឿង តាមរយៈការពង្រឹងការអនុវត្តច្បាប់ ការផ្សព្វផ្សាយលិខិតបទដ្ឋាន និងលើកកម្ពស់អនុ លោមភាពការងារ ព្រមទាំងជំរុញនិយោជក អាណាព្យាបាល និងអាជ្ញាធរមូលដ្ឋានសហការការពារកុមារមិនឱ្យចូលក្នុងខ្សែច្រវាក់ផលិតកម្ម និងធានាឱ្យកុមារទទួលបានការអប់រំ និងបណ្តុះ បណ្តាលជំនាញ។ 

លោកជំទាវក៏បានស្នើឱ្យពង្រឹងការត្រួតពិនិត្យ និងតាមដានលក្ខខណ្ឌការងារ បង្កើតឱកាសការងារសមរម្យសម្រាប់យុវជន និងពង្រឹងកិច្ចសហការរវាងក្រសួង ស្ថាប័ន អង្គការដៃគូ និងវិស័យឯកជន ដើម្បីលុបបំបាត់ទម្រង់ធ្ងន់ធ្ងរនៃពលកម្មកុមារ តាមរយៈការពង្រឹងសមត្ថភាពមន្ត្រីជំនាញ ប្រព័ន្ធរាយការណ៍រហ័ស Hotline ១២៩៧, ១២៨៦ និងប្រអប់បណ្តឹងអនាមិក និងជំរុញយុទ្ធនាការ “សហគ្រាសមួយជាសហគមន៍សុខសាន្តមួយ” ដែលគ្មានការប្រើប្រាស់ពលកម្មកុមារ៕

ដោយ៖ ប៊ុនរិទ្ធ, ប្រភព៖ ក្រសួងការងារ