AKP ភ្នំពេញ ថ្ងៃទី៦ ខែសីហា ឆ្នាំ២០២៦ -- នាសន្និសីទសារព័ត៌មានស្តីពីដំណើរការប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី១០ ខែសីហា ឆ្នាំ២០២៦ នាសៀលថ្ងៃទី៦ ខែសីហា ឆ្នាំ២០២៦នេះ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងថា នៅថ្ងៃនេះក្រសួងបានចាប់ផ្តើមប្រជុំបច្ចេកទេស ដើម្បីរៀបចំការត្រៀមលក្ខណៈ និងការចាត់ចែងការប្រឡងនេះនៅតាម២៥រាជធានី-ខេត្ត ដែលនៅថ្ងៃប្រឡងនឹងមានការចូលរួមពីអង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា អាជ្ញាធររាជធានីខេត្ត អ្នកស្ម័គ្រចិត្ត ប្រមាណជា ៥,០០០នាក់ ដើម្បីទៅធ្វើការសង្កេតការណ៍នៅក្នុងការប្រឡងនេះ។

បើតាមរដ្ឋមន្ត្រីក្រសួងអប់រំ ការចូលរួមនេះគឺជាការធានាបាននូវភាពជោគជ័យនៃដំណើរការប្រឡង ខណៈដែលឥរិយាបថរបស់សិស្សមានការប្រែប្រួល មានការផ្លាស់ប្តូរលឿន ដោយក្នុងរយៈពេលប្រមាណជា ១២ ឆ្នាំកន្លងទៅនេះសិស្សមានការប្រែប្រួលលឿនខ្លាំង គឺមានន័យថាពួកគេគឺខិតខំប្រឹងប្រែងរៀនសូត្រ។ ឯកឧត្តមបានឱ្យដឹងថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ខាងមុខនេះនឹងមានដំណើរការសំណេរ ប្រព្រឹត្តទៅរយៈពេល ២ថ្ងៃ គឺថ្ងៃទី១០-១១ ខែសីហា ឆ្នាំ២០២៦ ដំណើរការកំណែ ប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៩ ខែសីហា ឆ្នាំ២០២៦ ដំណើរការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ ប្រព្រឹត្តទៅចាប់ពីថ្ងៃទី២០ ដល់ថ្ងៃទី៣០ ខែសីហា ឆ្នាំ២០២៦ ដំណើរការបោះពុម្ពលទ្ធផលប្រឡង ប្រព្រឹត្តទៅនៅថ្ងៃទី១ ខែកញ្ញា ឆ្នាំ២០២៦។ រីឯលទ្ធផលប្រឡងនឹងត្រូវប្រកាសនៅថ្ងៃទី២ ខែកញ្ញា ឆ្នាំ២០២៦ តាមមណ្ឌលសំណេរនៃរាជធានី ខេត្តទាំង២៥ ទូទាំងប្រទេស។ ការប្រឡង នេះ មានបេក្ខជនចុះឈ្មោះប្រឡងសរុប ១៥១ ២៣៨នាក់ (ស្រី ៨៤ ៧៣៥នាក់) ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៣៧ ៤៤៥នាក់ (ស្រី ២២ ១៩៣នាក់) បេក្ខជនថ្នាក់វិទ្យាសាស្ត្រសង្គម មានចំនួន ១១៣ ៧៩៣នាក់ (ស្រី ៦២ ៥៤២នាក់)៕

ដោយ៖ ចាន់ សុភឿន