AKP កំពង់ចាម ថ្ងៃទី៦ ខែសីហា ឆ្នាំ២០២៦--ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានលើកឡើងថា ការគ្រប់គ្រង និងការពារដីសាធារណៈរបស់រដ្ឋ ជាពិសេសដីដែលជាប្រភពទឹកធម្មជាតិ រួមទាំង ដីចំណីទន្លេ ព្រែក និងបឹងបួរ គឺដើម្បីធានាបាននូវការថែរក្សាការពារបរិស្ថាន និងសណ្តាប់ធ្នាប់សម្រាប់រៀបចំធ្វើការអភិវឌ្ឍប្រកបដោយចីរភាព។

ឯកឧត្តមអភិបាលខេត្តបថ្លែងបែបនេះ ក្នុងឱកាសអញ្ជើញដឹកនាំកិច្ចប្រជុំគណៈកម្មាធិការរៀបចំដែនដី និងនគរូបនីយកម្មថ្នាក់ខេត្ត នាព្រឹកថ្ងៃទី៦ ខែសីហា ឆ្នាំ២០២៦នេះ ដោយមានការអញ្ជើញចូលរួមពីសំណាក់ អភិបាលរងខេត្ត នាយក នាយករងរដ្ឋបាល ប្រធាន-អនុប្រធានមន្ទីរ-អង្គភាពជំនាញពាក់ព័ន្ធជុំវិញខេត្ត អភិបាល អភិបាលរងក្រុង-ស្រុក និងមន្ត្រីពាក់ព័ន្ធជាច្រើនរូប។

ឯកឧត្តម អ៊ុន ចាន់ដា បានណែនាំដល់អាជ្ញាធរដែនដី និងមន្ទីរ-អង្គភាពពាក់ព័ន្ធ ត្រូវធ្វើការផ្ទៀងផ្ទាត់ស្ថានភាពជាក់ស្តែងនៃការកាន់កាប់ដីចំណីទន្លេ ព្រែក និងបឹងបួរ និងចាត់វិធានការទប់ស្កាត់ការទន្ទ្រានកាន់កាប់ដីសាធារណៈរបស់រដ្ឋដោយខុសច្បាប់ឱ្យបានម៉ឺងម៉ាត់ រួមទាំងធ្វើការអប់រំផ្សព្វផ្សាយដល់ប្រជាពលរដ្ឋអំពីច្បាប់រៀបចំដែនដី និងផលប៉ះពាល់នៃការរំលោភបំពានដីចំណីទឹក។

ទោះបីខេត្តកំពង់ចាម បានសម្រេចជោគជ័យក្នុងការចុះបញ្ជី និងចែកប័ណ្ណកម្មសិទ្ធិដីធ្លីលក្ខណៈជាប្រព័ន្ធជូនប្រជាពលរដ្ឋរួចរាល់យ៉ាងណាក្តី អាជ្ញាធរគ្រប់លំដាប់ថ្នាក់របស់ខេត្ត ត្រូវតែបន្តយកចិត្តទុកដាក់ខ្ពស់លើការគ្រប់គ្រង ដីសាធារណៈរបស់រដ្ឋឱ្យបានគង់វង្ស៕

ដោយ ឆាយ ម៉ុត