AKP ភ្នំពេញ ថ្ងៃទី០៦ ខែសីហា ឆ្នាំ២០២៦ -- អាជ្ញាធរសុខាភិបាលកូរ៉េខាងត្បូង បាននិយាយកាលពីថ្ងៃពុធថា មនុស្សសរុបចំនួន ២១នាក់បានស្លាប់ដោយសារជំងឺទាក់ទងនឹងការកើនឡើងកំដៅនៅក្នុងប្រទេសកូរ៉េខាងត្បូងនៅក្នុងឆ្នាំនេះ ខណៈដែលប្រទេសនេះកំពុងតស៊ូជាមួយនឹងរលកកំដៅខ្លាំង។

យោងតាមទីភ្នាក់ងារត្រួតពិនិត្យ និងបង្ការជំងឺកូរ៉េ បានឱ្យដឹងថាចាប់តាំងពីពាក់កណ្តាលខែឧសភា អ្នកជំងឺសរុបចំនួន ២.៤៤១នាក់បានទៅបន្ទប់សង្គ្រោះបន្ទាន់សម្រាប់ជំងឺទាក់ទងនឹងកំដៅគិតត្រឹមថ្ងៃអង្គារ នៅពេលដែលអាជ្ញាធរបានដាក់ឱ្យដំណើរការប្រព័ន្ធឃ្លាំមើលជំងឺទាក់ទងនឹងកំដៅ។

ទោះបីជាមានមនុស្សតិចជាងមុនដែលបានទទួលរងនូវជំងឺទាក់ទងនឹងកំដៅនៅក្នុងឆ្នាំនេះជាងក្នុងអំឡុងពេលដូចគ្នាកាលពីឆ្នាំមុនក៏ដោយ ក៏មានមនុស្សកាន់តែច្រើនបានស្លាប់នៅក្នុងឆ្នាំនេះ ដោយចំនួនអ្នកស្លាប់លើសពីចំនួនសរុប ២០នាក់កាលពីឆ្នាំមុន។

អ្នកស្លាប់ចុងក្រោយបំផុតម្នាក់ គឺបុរសអាយុ ៦០ឆ្នាំ ដែលកំពុងធ្វើការនៅខាងក្រៅនៅកសិដ្ឋានមួយក្នុងទីក្រុងអឿមសឹង ខេត្តជុងឆឹងខាងជើងកាលពីថ្ងៃអង្គារ។

ក្នុងចំណោមករណីដែលបានរាយការណ៍នៅក្នុងឆ្នាំនេះ ការអស់កម្លាំងដោយសារកំដៅមានចំនួន ៦១,៧% បន្ទាប់មកគឺជំងឺដាច់សរសៃឈាមខួរក្បាលដោយសារកំដៅ ១៦,៨% និងរមួលក្រពើដោយសារកំដៅ១១,៥%។

ទីភ្នាក់ងារអាកាសធាតុរដ្ឋបានចេញការព្រមានបន្ថែមអំពីរលកកំដៅធ្ងន់ធ្ងរសម្រាប់តំបន់សេអ៊ូលទាំងមូលនៅព្រឹកព្រលឹមថ្ងៃពុធ ដោយដាក់តំបន់ចំនួន ៤៣% ស្ថិតនៅក្រោមកម្រិតប្រកាសអាសន្នខ្ពស់បំផុត។

យោងតាមទីភ្នាក់ងារនេះ បានឱ្យដឹងថា សីតុណ្ហភាពនៅទីក្រុងសេអ៊ូលត្រូវបានគេរំពឹងថានឹងឡើងដល់ ៣៩អង្សារសេនៅថ្ងៃព្រហស្បតិ៍នេះ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)