AKP ភ្នំពេញ ថ្ងៃទី០៦ ខែសីហា ឆ្នាំ២០២៦ -- វិមានក្រឹមឡាំងបាននិយាយកាលពីពេលថ្មីៗនេះថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានធ្វើការសន្ទនាតាមទូរស័ព្ទជាមួយប្រធានាធិបតីប្រេស៊ីល លោក ល្វីស អ៊ីណាស៊ីអូ លូឡា ដា ស៊ីលវ៉ា។

សេចក្តីថ្លែងការណ៍នេះបាននិយាយថា «តាមគំនិតផ្តួចផ្តើមរបស់ភាគីប្រេស៊ីល ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានធ្វើការសន្ទនាតាមទូរស័ព្ទជាមួយប្រធានាធិបតីប្រេស៊ីល លោក ល្វីស អ៊ីណាស៊ីអូ លូឡា ដា ស៊ីលវ៉ា»។

សេចក្តីថ្លែងការណ៍នេះបានសរសេរថា ប្រធានាធិបតីទាំងពីរបានពិភាក្សាគ្នាអំពីបញ្ហាអន្តរជាតិនាពេលបច្ចុប្បន្ន រួមទាំងស្ថានភាពជុំវិញបញ្ហាអ៊ុយក្រែន ក៏ដូចជាពិភាក្សាអំពីការពង្រឹងទំនាក់ទំនងរវាងប្រទេសនានាក្នុងវិស័យផ្សេងៗ ដោយផ្តោតជាពិសេសទៅលើការពង្រីកវិស័យពាណិជ្ជកម្ម។

វិមានក្រឹមឡាំងបានបន្ថែមថា លោក ពូទីន បានថ្លែងអំណរគុណចំពោះលោក លូឡា ដា ស៊ីលវ៉ា ចំពោះកិច្ចខិតខំប្រឹងប្រែងរបស់លោកក្នុងការជួយសម្រេចបាននូវដំណោះស្រាយនយោបាយ និងការទូតនៅក្នុងប្រទេសអ៊ុយក្រែន។

សេចក្តីថ្លែងការណ៍នេះបាននិយាយថា «វាត្រូវបានព្រមព្រៀងគ្នាដើម្បីបន្តសម្របសម្រួលនៅអង្គការសហប្រជាជាតិ និងក្នុងទម្រង់សហប្រតិបត្តិការពហុភាគីផ្សេងទៀត»។

លោកប្រធានាធិបតីរុស្ស៊ីបានបញ្ជាក់ថា ប្រទេសទាំងពីរប្រកាន់ខ្ជាប់នូវវិធីសាស្រ្តដូចគ្នា ឬស្រដៀងគ្នាលើបញ្ហាជាច្រើននៃរបៀបវារៈសកលលោក៕

ដោយ៖ យា ចិន្ដាខន្ដី (ប្រភព៖ ស្ពុតនីក)