AKP បន្ទាយមានជ័យ ថ្ងៃទី៦ ខែសីហា ឆ្នាំ២០២៦– កម្ពុជា-កូរ៉េ សម្ពោធដាក់ឱ្យប្រើប្រាស់មណ្ឌលសុខភាពម៉ាឡៃ និងសមិទ្ធផលជនបទចម្រុះ តម្លៃរាប់លានដុល្លារ បម្រើប្រជាពលរដ្ឋ នៅភូមិវាលហាត់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។

ក្នុងបរិយាកាសដ៏អធិកអធម និងសប្បាយរីករាយក្រៃលែង នៃកិច្ចខិតខំប្រឹងប្រែងប្រែក្លាយតំបន់អតីតសមរភូមិឱ្យទៅជា “ភូមិមានការអភិវឌ្ឍប្រកបដោយនិរន្តរភាព” ពិធីសម្ពោធដាក់ឱ្យប្រើប្រាស់ជាផ្លូវការ «អគារមណ្ឌលសុខភាពម៉ាឡៃ និងសមិទ្ធផលនានារបស់គម្រោងការកសាងភូមិសន្តិភាព តាមរយៈការអភិវឌ្ឍសហគមន៍ជនបទចម្រុះ» ត្រូវបានប្រារព្ធឡើងយ៉ាងឱឡារិក នាព្រឹកថ្ងៃព្រហស្បតិ៍ ទី៦ ខែសីហា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ និង ឯកឧត្តម Kim Chang Yong ឯកអគ្គរដ្ឋទូតសាធារណរដ្ឋកូរ៉េប្រចាំនៅព្រះរាជាណាចក្រកម្ពុជា។

ពិធីនេះប្រារព្ធឡើងនៅភូមិវាលហាត់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ ដោយមានការអញ្ជើញចូលរួមពីថ្នាក់ដឹកនាំក្រសួង ស្ថាប័នពាក់ព័ន្ធ ឯកឧត្តមអភិបាលខេត្ត តំណាងទីភ្នាក់ងារ KOICA ដៃគូអភិវឌ្ឍន៍ កងកម្លាំងប្រដាប់អាវុធ និងប្រជាពលរដ្ឋសរុបចំនួន ៦១៦រូប។

ថ្លែងក្នុងឱកាសដ៏មានសារសំខាន់នេះ ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានគូសបញ្ជាក់យ៉ាងមុតមាំថា សមិទ្ធផលទាំងឡាយដែលបានសម្ពោធនាពេលនេះ គឺជាសក្ខីភាពបញ្ជាក់យ៉ាងច្បាស់អំពីផ្លែផ្កានៃកិច្ចសហប្រតិបត្តិការអន្តរជាតិដ៏ល្អប្រសើររវាងរាជរដ្ឋាភិបាលកម្ពុជា និងសាធារណរដ្ឋកូរ៉េ តាមរយៈទីភ្នាក់ងារ KOICA។

«សមិទ្ធផលមណ្ឌលសុខភាពម៉ាឡៃ និងហេដ្ឋារចនាសម្ព័ន្ធសហគមន៍ជនបទចម្រុះទាំងអស់នេះ មិនត្រឹមតែជួយសម្រាលទុក្ខលំបាក និងលើកកម្ពស់ការថែទាំសុខភាពប្រជាពលរដ្ឋប៉ុណ្ណោះទេ ប៉ុន្តែវារួមចំណែកយ៉ាងសកម្មក្នុងការផ្លាស់ប្តូរមុខមាត់ថ្មីដល់តំបន់អតីតសមរភូមិ ឱ្យក្លាយជាសហគមន៍រស់រវើក មានសេដ្ឋកិច្ចរឹងមាំ និងស្របទៅនឹងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា»។

ជាការឆ្លើយតប ឯកឧត្តម Kim Chang Yong ឯកអគ្គរដ្ឋទូតសាធារណរដ្ឋកូរ៉េ បានសម្តែងនូវក្តីសោមនស្សរីករាយ និងមោទនភាពជាខ្លាំងចំពោះវឌ្ឍនភាព និងលទ្ធផលការងាររយៈពេល ៥ឆ្នាំកន្លងមកនេះ នៃការអនុវត្តគម្រោង “ភូមិសន្តិភាព” នៅក្នុងខេត្តគោលដៅទាំងបី។
រដ្ឋាភិបាល និងប្រជាជនកូរ៉េ តាមរយៈ KOICA មានមោទនភាពក្រៃលែងដែលបានរួមចំណែកផ្នែកហិរញ្ញប្បទានឥតសំណង ដើម្បីកសាងមូលដ្ឋានគ្រឹះសេដ្ឋកិច្ច សង្គមកិច្ច និងលើកកម្ពស់គុណភាពជីវិតរបស់ប្រជាពលរដ្ឋនៅតំបន់ជនបទកម្ពុជា។

យើងខ្ញុំជឿជាក់ថា សមិទ្ធផលទាំងនេះនឹងបន្តស្ថិតស្ថេរគង់វង្ស និងផ្តល់ផលប្រយោជន៍អត្ថប្រយោជន៍យូរអង្វែងដល់កូនចៅជំនាន់ក្រោយ និងជាស្ពានពង្រឹងចំណងមិត្តភាពកម្ពុជា-កូរ៉េ ឱ្យកាន់តែរឹងមាំទ្វេដង។

 គប្បីបញ្ជាក់ផងដែរថា គម្រោង “ភូមិសន្តិភាព” គឺជាហិរញ្ញប្បទានឥតសំណងរបស់សាធារណរដ្ឋកូរ៉េ តាមរយៈ KOICA និងសម្របសម្រួលអនុវត្តផ្ទាល់ដោយក្រសួងអភិវឌ្ឍន៍ជនបទ។ គម្រោងនេះបាននិងកំពុងអនុវត្តយ៉ាងសស្រាក់សស្រាំក្នុងភូមិគោលដៅចំនួន ៣០ ស្ថិតក្នុងខេត្តបាត់ដំបង ខេត្តប៉ៃលិន និងខេត្តបន្ទាយមានជ័យ។ គោលដៅចម្បងគឺការប្រែក្លាយតំបន់អតីតសមរភូមិឱ្យទៅជាតំបន់អភិវឌ្ឍន៍ប្រកបដោយបរិយាបន្ន ទាំងផ្នែកសេដ្ឋកិច្ច សង្គមកិច្ច និងវប្បធម៌។

សម្រាប់សមិទ្ធផលនានាដែលត្រូវបានកាត់ខ្សែបូដាក់ឱ្យប្រើប្រាស់ជាផ្លូវការនៅឃុំម៉ាឡៃនាថ្ងៃនេះ រួមមាន
អគារមណ្ឌលសុខភាពទំហំ ១៥ម x ១៥ម បង្គន់បរិយាបន្នចំនួន ៣បន្ទប់ និងកន្លែងលាងដៃ ១កន្លែង។
ឡដុតសំរាមនិងកាកសំណល់វេជ្ជសាស្ត្រ ១កន្លែងប្រព័ន្ធចម្រោះទឹកស្អាត ធុងស្តុកទឹកចំណុះ ១០ ០០០លីត្រ និងអណ្តូងស្នប់។
មជ្ឈមណ្ឌលសិក្សាសហគមន៍ ស្រះទឹកសហគមន៍ បណ្ណាល័យ និងទីចាត់ការ។ ផ្លូវបេតុងអារម៉េ និងស្ថានីយផលិតទឹកពិសាប៊ីដុងចំណុះ ២០លីត្រ។

ពិធីសម្ពោធនេះ មិនត្រឹមតែជារដ្ឋបាលកិច្ចការអភិវឌ្ឍន៍ធម្មតានោះទេ ប៉ុន្តែវាគឺជាសក្ខីភាពនៃក្តីសង្ឃឹម សាមគ្គីភាព និងការបោះជំហានយ៉ាងមុតស្រួចឆ្ពោះទៅសម្រេចបាននូវចក្ខុវិស័យរួមរបស់ជាតិគឺ «កម្ពុជាជាប្រទេសមានប្រាក់ចំណូលខ្ពស់នៅឆ្នាំ២០៥០»៕

ដោយ៖ ឈុន សារ៉ាត