AKP កណ្តាល ថ្ងៃទី៦ ខែសីហា ឆ្នាំ២០២៦--រដ្ឋបាលខេត្តកណ្តាល នៅរសៀលថ្ងៃទី៥ ខែសីហា ឆ្នាំ២០២៦ បានទទួលអំណោយពី ក្រុមហ៊ុន LANJU CAMBODIA ឧបត្ថម្ភ ថ្នាំមូស ចំនួន ១០០កេស គិតជាថវិកា ចំនួន ២៥០០ ដុល្លារអាមេរិក និងទទួលអំណោយពី លោក ជា ទ្រីអាង និងលោកស្រី ព្រុំ ច័ន្ទសុផល ដែលបានឧបត្ថម្ភ ទឹកបរិសុទ្ធ ចំនួន ១ ០០០កេស សម្រាប់ជួយដល់វីរកងទ័ពជួរមុខនៅមុំបី ដែលកំពុងឈរជើងការពារអធិបតេយ្យជាតិ នៅតាមបណ្តោយព្រំដែន ។ 

ក្នុងឱកាសនោះដែរ តាងនាមរដ្ឋបាលខេត្ត ឯកឧត្តម គួច ចំរើន អភិបាលខេត្តកណ្តាលបានថ្លែងអំណរគុណចំពោះទឹកចិត្តដ៏ស្មោះសររបស់ ក្រុមហ៊ុន LANJU CAMBODIA និង លោក ជា ទ្រីអាង និងលោកស្រី ព្រុំ ច័ន្ទសុផល ដែលមានទឹកចិត្តស្នេហាជាតិ ដោយបានចំណាយនូវធនធានផ្ទាល់ខ្លួនជាសំភារៈប្រើប្រាស់ ឧបត្ថម្ភដល់ដល់វីរកងទ័ពជួរមុខនៅមុំបី ដែលកំពុងឈរជើងការពារអធិបតេយ្យជាតិ នៅតាមបណ្តោយព្រំដែន។ ចំពោះអំណោយដែលសប្បុរសជន និងបងប្អូនប្រជាពលរដ្ឋ ផ្តល់ជូនរដ្ឋបាលខេត្តកណ្តាល និងត្រូវបានបែងចែកដឹកជញ្ជូនទៅជូនកងទព័ជួរមុខភ្លាមៗ ។ 

រដ្ឋបាលខេត្តកណ្ដាល សូមបួងសួងដល់គុណព្រះរតនត្រ័យកែវទាំងបី សូមព្រះអង្គជួយប្រោះព្រំ ប្រសិទ្ធពរជ័យ បវរសួស្តីមហាប្រសើរ ជូនចំពោះ វីរៈកងទ័ពយើងនៅជួរមុខ សូមទទួលបាននូវពុទ្ធពរទាំងបួនប្រការគឺ៖ អាយុ វណ្ណៈ សុខៈ ពលៈកុំបីឃ្លៀងឃ្លាតឡើយ៕ 

ដោយ ណយ នឿន (ប្រភព៖រដ្ឋបាលខេត្តកណ្តាល)