AKP ភ្នំពេញ ថ្ងៃទី៦ ខែសីហា ឆ្នាំ២០២៦--សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច បាន និងកំពុងដើរតួនាទីយ៉ាងសំខាន់ក្នុងការបណ្តុះបណ្តាលធនធានមនុស្សផ្នែកច្បាប់ រដ្ឋបាលសាធារណៈ សេដ្ឋកិច្ច និងផ្នែកផ្សេងៗទៀត ដើម្បីបម្រើឱ្យការអភិវឌ្ឍសេដ្ឋកិច្ច និងសង្គមនៅកម្ពុជា។ នេះបើតាមការលើកឡើងរបស់ ឯកឧត្តម សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា ក្នុងពិធីប្រគល់សញ្ញាបត្រដល់និស្សិតជ័យលាភីកម្រិតបរិញ្ញាបត្រ និងបរិញ្ញាបត្រជាន់ខ្ពស់ សរុប ៤.០០១នាក់  និងពិធីសម្ពោធជានិមិត្តរូបអគារសិក្សាមួយខ្នងកម្ពស់ ៦ជាន់របស់សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាមជ្ឈមណ្ឌលសន្និបាត និងពិព័រណ៍កោះពេជ្រ ព្រឹកថ្ងៃទី០៦ ខែសីហា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ឯកឧត្តមរដ្ឋលេខាធិការបានឱ្យដឹងថា គិតចាប់ពីឆ្នាំ១៩៨២ ដល់បច្ចុប្បន្ននេះ សិក្ខាកាម និងនិស្សិត បានបញ្ចប់ការសិក្សាជាស្ថាពរសរុប ៧៤.៣៣៧នាក់ ក្នុងនោះនិស្សិតបរទេសមាន ២៦៨នាក់។ និស្សិតជ័យលាភីទាំងនោះកំពុងបម្រើការងារនៅតាមក្រសួង ស្ថាប័នរដ្ឋ វិស័យឯកជន អង្គការមិនមែនរដ្ឋាភិបាលជាតិ និងអន្តរជាតិ និងខ្លះទៀតកំពុងប្រកបអាជីវកម្មផ្ទាល់ខ្លួនប្រកបដោយសមត្ថភាព សេចក្តីថ្លៃថ្នូរ និងកិត្តិយស។ បច្ចុប្បន្ននេះ សាកលវិទ្យាល័យមានក្រុមប្រឹក្សាភិបាល គណៈគ្រប់គ្រង មន្ត្រី បុគ្គលិក គ្រូ សាស្ត្រាចារ្យ ក្របខ័ណ្ឌនិងជាប់កិច្ចសន្យាជាតិ អន្តរជាតិសរុប ៨៧៣នាក់ និងមាននិស្សិតកំពុងបណ្តុះបណ្តាលសរុប ២០.០១៦នាក់។ ក្នុងនោះមាននិស្សិតបរទេសចំនួន ៩៣នាក់ ដែលរួមមាន ជនជាតិបារាំង ៤៥នាក់ ឡាវ ៣៧នាក់ អេស្ប៉ាញ ហ្គាតេម៉ាឡា កូរ៉េ ចិន វៀតណាម ហៃទី និងប្រទេសផ្សេងៗទៀត។

ឯកឧត្តម សាន វឌ្ឍនា បានអះអាថា ដើម្បីធានាបាននូវការបណ្តុះបណ្តាលប្រកបដោយគុណភាព និងនិរន្តរភាព សាកលវិទ្យាល័យបានអនុវត្តយន្តការធានាគុណភាពអប់រំ ជាពិសេសបានពង្រឹងប្រព័ន្ធវាយតម្លៃគុណភាពអប់រំជាប្រចាំ ដោយអនុវត្តតាមស្តង់ដារធានាគុណភាពអប់រំសម្រាប់គ្រឹះស្ថានឧត្តមសិក្សា និងកំពុងធ្វើកិច្ចសហប្រតិបត្តិការជាមួយបណ្តាសាកលវិទ្យាល័យបរទេសនៅបណ្តាប្រទេសមួយចំនួន ដោយមានអនុស្សរណៈនៃការយោគយល់គ្នាចំនួន៤៥ ដើម្បីផ្លាស់ប្តូរបទពិសោធន៍និស្សិត មន្ត្រី និងសាស្ត្រាចារ្យ លើការសិក្សា ការបង្រៀន ការស្រាវជ្រាវ និងកម្មវិធីបណ្តុះបណ្តាលនានា ក្នុងគោលបំណងលើកកម្ពស់គុណភាពអប់រំឱ្យបានកាន់តែប្រសើរ៕

ដោយ៖ ចាន់ សុភឿន