AKP ភ្នំពេញ ថ្ងៃទី៦ ខែសីហា ឆ្នាំ២០២៦--ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ចុះពិនិត្យការបម្រើសេវាផ្នែកសុខភាពផ្លូវចិត្ត និងការបំពានគ្រឿងញៀន នៅមណ្ឌលសុខភាពទឹកវិល ខេត្តសៀមរាប ដោយឥតគ្រោងទុក កាលពីរសៀលថ្ងៃទី៥ ខែសីហា ឆ្នាំ២០២៦។

ក្នុងការចុះពិនិត្យនេះ ឯកឧត្តមសាស្រ្តាចារ្យរដ្ឋមន្រ្តីបានកត់សម្គាល់ឃើញថា បុគ្គលិកនៅមណ្ឌលសុខភាព សកម្មភាពសកម្មល្អ ការទទួលបដិសណ្ឋារកិច្ចសមរម្យ សំដីសំដៅល្អ ក្រមសីលធម៌ល្អ ការសាកសួរព័ត៌មានមានលក្ខណៈប្រសើរ និងការពន្យល់ច្បាស់ ការរៀបចំហេដ្ឋារចនាសម្ព័ន្ធបានល្អសមរម្យ។ បន្ថែមពីនេះ ឯកឧត្តមសាស្រ្តាចារ្យរដ្ឋមន្រ្តីបានណែនាំត្រូវបង្កើនការយកចិត្តទុកដាក់ លើការបម្រើផ្នែកសេវាសុខភាពផ្លូវចិត្ត និងការបំពានគ្រឿងញៀន ហើយត្រូវបន្តឱ្យមានសកម្មភាពសកម្មបែបនេះបន្តទៀត រួមទាំងការអប់រំពីវិធីសាស្រ្តកាត់ពីគ្រឿងញៀន និងលើកទឹកចិត្តក្រុមគ្រូពេទ្យ ត្រូវបន្តបណ្តុះបណ្តាលបន្ថែម ដើម្បីសហការគ្នាជាមួយគ្រូពេទ្យឯកទេសនៅមន្ទីរពេទ្យជាតិ។

ក្នុងឱកាសនោះ ឯកឧត្តមសាស្រ្តាចារ្យរដ្ឋមន្រ្តីបានទទួលមតិត្រឡប់ពីប្រជាពលរដ្ឋ ដែលមកទទួលសេវាសុខាភិបាលនៅមណ្ឌលសុខភាព ឃើញថា គ្រូពេទ្យមានការយកចិត្តទុក សំដីសំដៅល្អ ជឿជាក់ការព្យាបាលរបស់គ្រូពេទ្យ និងក្រមសីលធម៌ល្អ៕

ដោយ ទេស ច័ន្ទសុធារី (ប្រភព៖ ក្រសួងសុខាភិបាល)