AKP ភ្នំពេញ ថ្ងៃទី៦ ខែសីហា ឆ្នាំ២០២៦--ក្នុងរយៈពេល១០ឆ្នាំនៃការការពារសំបុកសត្វក្នុងដែនជម្រកសត្វព្រៃកែវសីមា ក្រុមការងារអភិរក្សបានរកឃើញនិងការពារសំបុកត្រយងយក្សបានចំនួន១៧សំបុក ហើយកូនត្រយងយក្សចំនួន១៨ក្បាលបានញាស់ដោយជោគជ័យ។នេះជាការបញ្ជាក់ពីអង្គការ WCS នៅរសៀលថ្ងៃទី០៥ ខែសីហា ឆ្នាំ២០២៦ ។

សត្វត្រយងយក្ស ឬឪលើក (Thaumatibis gigantea) គឺជាបក្សីជាតិរបស់ព្រះរាជាណាចក្រកម្ពុជា និងជាប្រភេទបក្សីដ៏កម្របំផុតមួយនៅលើពិភពលោក។ វារស់នៅក្នុងព្រៃល្បោះ តំបន់ដីសើមក្នុងព្រៃល្បោះ និងតំបន់ដីសើមផ្សេងៗទៀត។ ចំណីអាហារជាចម្បងរបស់វាមាន សត្វល្អិត អន្ទង់ ពស់ ក្តាម កង្កែប ខ្យង ។ល។

ដែនជម្រកសត្វព្រៃកែវសីមា គឺជាជម្រកដ៏សំខាន់មួយក្នុងចំណោមជម្រកផ្សេងទៀតនៅក្នុងប្រទេសកម្ពុជា ដែលត្រូវបានការពារយ៉ាងយកចិត្តទុកដាក់ដោយកម្មវិធីការពារសំបុកសត្វរបស់អង្គការសមាគមអភិរក្សសត្វព្រៃ (WCS) ដែលមានការគាំទ្រថវិការដោយគម្រោងរេដបូកកែវសីមា។ 

ក្នុងរយ:ពេល ១០ឆ្នាំ នៃកម្មវិធីការពារសំបុកសត្វនៅក្នុងដែនជម្រកសត្វព្រៃកែវសីមា ពួកយើងទទួលបានលទ្ធផលជាទីគាប់ចិត្តដោយសំបុកសត្វត្រយងយក្សចំនួន ១៧សំបុក ត្រូវបានរកឃើញ និងកូនសត្វត្រយងយក្សចំនួន ១៨ក្បាល ត្រូវបានញាស់ និងហើរចេញដោយជោគជ័យ។ លើសពីនេះក្នុងពេលថ្មីៗនេះ អង្គការ WCS បានរកឃើញសំបុករបស់ពួកវាចំនួនបីបន្ថែមទៀត ដែលវាមានន័យថា ការអភិរក្សសត្វត្រយងយក្សនៅក្នុងដែនជម្រកសត្វព្រៃកែវសីមាទទួលបានលទ្ធផលជាទីគាប់ចិត្ត។ ប៉ុន្តែនៅពីក្រោយភាពជោគជ័យនេះ ក៏នៅមានបញ្ហាប្រឈមមួយចំនួនដែលក្រុមការងារកំពុងជួបប្រទះរួមមាន ការបាត់បង់ និងការរេចរឹលទីជម្រក ការរំខានដល់ទីតាំងសំបុកពងកូន ការដាក់ថ្នាំបំពុល ការបរបាញ់ដោយខុសច្បាប់ និងការប្រើប្រាស់ថ្នាំគីមីកសិកម្មខុសបច្ចេកទេសដែលធ្វើឲ្យប៉ះពាល់ដល់ប្រព័ន្ធអេកូឡូស៊ីនៅតំបន់ទីជម្រករបស់ពួកវា ដែលកត្តាទាំងអស់នេះបានធ្វើឱ្យសត្វត្រយងយក្សស្ថិតក្នុងស្ថានភាពជិតផុតពូជបំផុត។

សត្វត្រយងយក្ស មានតួនាទីយ៉ាងសំខាន់ក្នុងការរក្សាតុល្យភាព និងសុខភាពនៃប្រព័ន្ធអេកូឡូស៊ីតំបន់ដីសើម និងព្រៃឈើ ដោយជួយគ្រប់គ្រងចំនួនសត្វល្អិត និងសត្វតូចៗផ្សេងទៀត។ វាក៏ជាសូចនាករដ៏សំខាន់ដែលបង្ហាញពីសុខភាពល្អនៃទីជម្រកធម្មជាតិផងដែរ។ ដូច្នេះការអភិរក្សសត្វបក្សីប្រភេទនេះនៅក្នុងប្រទេសកម្ពុជាគឺពិតជាមានតម្លៃមិនអាចកាត់ថ្ងៃបាននោះឡើយ។ 

សូមចូលរួមទាំងអស់គ្នា ទប់ស្កាត់ការកាប់រានដីព្រៃ ការជួញដូរសត្វព្រៃគ្រប់ប្រភេទ ការដាក់ថ្នាំបំពុលសត្វព្រៃ និងបដិសេធការបរិភោគសាច់សត្វព្រៃ ឬការយកសត្វព្រៃធ្វើជាសត្វចិញ្ចឹម ៕

 ដោយ ណយ នឿន (ប្រភព៖WCS)