AKP បាត់ដំបង ថ្ងៃ០៥ ខែសីហា ឆ្នាំ២០២៦ -- ឯកឧត្តម សុខ លូ អភិបាលខេត្តបាត់ដំបង និង ឯកឧត្តម គីម ចាងយុង ឯកអគ្គរដ្ឋទូតកូរ៉េខាងត្បូងប្រចាំនៅកម្ពុជា បានអញ្ជើញចុះហត្ថលេខាផ្ដល់ហិរញ្ញប្បទានឥតសំណងសម្រាប់គាំទ្រការអភិវឌ្ឍភូមិ ជំហាន២ របស់គម្រោងការកសាងភូមិសន្តិភាព តាមរយៈការអភិវឌ្ឍសហគមន៍ជនបទចម្រុះ ក្រោមអធិបតី ឯកឧត្តម ឆាយ ឫទ្ធីសែន រដ្ឋមន្រ្តីក្រសួងអភិវឌ្ឍន៍ជនបទ។ ពិធីចុះកិច្ចព្រមព្រៀងនេះធ្វើឡើងនៅសាលប្រជុំសាលាខេត្តបាត់ដំបង នាថ្ងៃទី០៥ ខែសីហា ឆ្នាំ២០២៦ នេះ។
មានប្រសាសន៍ក្នុងឱកាសនោះ ឯកឧត្តម សុខ លូ បានគូសបញ្ជាក់ថា គម្រោងភូមិសន្តិភាព បានចូលរួមយ៉ាងសំខាន់ក្នុងការអភិវឌ្ឍសហគមន៍ជនបទចម្រុះ ដោយផ្តោតលើអភិបាលកិច្ចល្អ ការអភិវឌ្ឍហេដ្ឋារចនាសម្ព័ន្ធជនបទ ការបង្កើនប្រាក់ចំណូលគ្រួសារ និងការធ្វើឱ្យប្រសើរឡើងនូវសុខភាព និងអនាម័យជនបទ ដែលស្ដែងឡើងតាមរយៈការសាងសង់មណ្ឌលសុខភាព មជ្ឈមណ្ឌលសិក្សា ការជីក និងស្តារស្រះសហគមន៍ ការសាងសង់ស្ថានីយផលិតទឹកស្អាត និងរោងផ្ទះសំណាញ់ជាដើម។

ឯកឧត្តម បានចាត់ទុកសមិទ្ធផលទាំងនេះជាកិច្ចសហការដ៏រឹងមាំរវាងរដ្ឋបាលខេត្ត និងក្រសួងអភិវឌ្ឍន៍ជនបទ រួមទាំងអាជ្ញាធរមូលដ្ឋាន ក្រោមហិរញ្ញប្បទានដោយ KOICA ដែលបង្ហាញឱ្យឃើញពីកិច្ចខិតខំប្រឹងប្រែងក្នុងការចូលរួមកាត់បន្ថយភាពក្រីក្រ ព្រមទាំងបង្កើននូវសកម្មភាពសេដ្ឋកិច្ចគ្រួសារ។ សមិទ្ធផលដែលទទួលបាននាពេលនេះ មិនត្រឹមតែជាសំណង់រូបវន្តប៉ុណ្ណោះទេ ប៉ុន្តែជានិមិត្តរូបនៃកិច្ចសហប្រតិបត្តិការ មិត្តភាព សាមគ្គីភាព និងទំនុកចិត្តរវាងភាគីពាក់ព័ន្ធទាំងអស់។ សមិទ្ធផលទាំងនេះនឹងរួមចំណែកក្នុងការកែលម្អលក្ខខណ្ឌរស់នៅរបស់ប្រជាពលរដ្ឋ បង្កើនឱកាសសេដ្ឋកិច្ចមូលដ្ឋាន ពង្រឹងសហគមន៍ និងលើកកម្ពស់បរិស្ថានរស់នៅប្រកបដោយសុវត្ថិភាព សន្តិភាព និងចីរភាព។

រដ្ឋបាលខេត្តបាត់ដំបងនឹងបន្តសហការយ៉ាងជិតស្និទ្ធជាមួយក្រសួងអភិវឌ្ឍន៍ជនបទ ដៃគូអភិវឌ្ឍន៍ មោហអាជ្ញាធរពាក់ព័ន្ធក្នុងការថែរក្សា គ្រប់គ្រង និងប្រើប្រាស់សមិទ្ធផលទាំងនេះឱ្យមានប្រសិទ្ធភាព និងនិរន្តរភាព ដើម្បីផ្ដល់ផលប្រយោជន៍យូរអង្វែងដល់ប្រជាពលរដ្ឋ។
សូមរំឭកថា គម្រោងការកសាងភូមិសន្តិភាពតាមរយៈការអភិវឌ្ឍសហគមន៍ជនបទចម្រុះ ឬហៅកាត់ថា «គម្រោងភូមិសន្តិភាព» គឺជាគំនិតផ្តួចផ្តើមរួមគ្នាផ្ដល់ហិរញ្ញប្បទានឥតសំណងដោយរដ្ឋាភិបាលនៃសាធារណរដ្ឋកូរ៉េ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (KOICA) ក្រោមកិច្ចសហការសម្របសម្រួលអនុវត្តផ្ទាល់ដោយក្រសួងអភិវឌ្ឍន៍ជនបទ (MRD)។ គម្រោងនេះមានរយៈពេល ៥ឆ្នាំ ដោយផ្តោតលើការអភិវឌ្ឍភូមិចំនួន៣០ នៅក្នុងខេត្តជាប់ព្រំដែនចំនួន៣ គឺខេត្តបាត់ដំបង បន្ទាយមានជ័យ និងប៉ៃលិន៕
ដោយ៖ ណយ នឿន (ប្រភព៖ រដ្ឋបាលខេត្តបាត់ដំបង)