AKP កែប ថ្ងៃទី៥ ខែសីហា ឆ្នាំ២០២៦-- លោកជំទាវ ស ម៉ាលីដា សោម ពិសិដ្ឋ ប្រធានគណៈកម្មាធិការសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តកែប នាព្រឹកថ្ងៃពុធ ទី៥ ខែសីហា ឆ្នាំ២០២៦ បានអញ្ជើញជាអធិបតីក្នុងកិច្ចប្រជុំបូកសរុបលទ្ធផលសកម្មភាពការងារប្រចាំឆមាសទី១ ឆ្នាំ២០២៦ និងពិធីប្រកាសទទួលស្គាល់ការកែសម្រួល និងបំពេញបន្ថែមសមាសភាពអនុគណៈកម្មាធិការសាខាសមាគមនារីខេត្តកែប ដែលបានប្រព្រឹត្តទៅនៅសាលប្រជុំសាលាខេត្តកែប។

ក្នុងឱកាសនោះ លោកជំទាវ គឹម ចន្ទី បានឡើងអានរបាយការណ៍ស្វាគមន៍ និងបង្ហាញរបាយការណ៍សង្ខេបស្តីពីលទ្ធផលសកម្មភាពការងារប្រចាំឆមាសទី១ ឆ្នាំ២០២៦។ លោកជំទាវបានឱ្យដឹងថា ដើម្បីរួមចំណែកអនុវត្តឱ្យសម្រេចទិសដៅការងាររបស់គណៈកម្មាធិការសមាគមនារីកម្ពុជាដើម្បីសន្តិភាព និងអភិវឌ្ឍន៍ ក៏ដូចជាក្រុមចលនាស្ត្រីគ្រប់លំដាប់ថ្នាក់ ឈានទៅសម្រេចគោលដៅរួម «កសាងគ្រួសារ និងសហគមន៍មានសុភមង្គលពិតប្រាកដ» សមាជិកា និងក្រុមការងារទាំងអស់បានខិតខំបំពេញភារកិច្ចយ៉ាងសកម្ម និងសម្រេចបានសមិទ្ធផលការងារជាច្រើនគួរឱ្យកត់សម្គាល់។

ថ្លែងក្នុងអង្គពិធី លោកជំទាវ ស ម៉ាលីដា សោម ពិសិដ្ឋ បាននាំយកនូវសេចក្តីនឹករលឹក និងការផ្តាំផ្ញើសួរសុខទុក្ខពីសំណាក់ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ អនុប្រធានគណបក្សប្រជាជនកម្ពុជា ប្រធានគណៈចលនាមហាជន និងជាប្រធានគណៈកម្មាធិការសមាគមនារីកម្ពុជាដើម្បីសន្តិភាព និងអភិវឌ្ឍន៍ ជូនដល់ថ្នាក់ដឹកនាំ សមាជិកា និងអង្គពិធីទាំងមូល។ លោកជំទាវក៏បានថ្លែងអំណរគុណយ៉ាងជ្រាលជ្រៅចំពោះសប្បុរសជនគ្រប់មជ្ឈដ្ឋាន ដែលតែងតែគាំទ្រទាំងស្មារតី សម្ភារ និងថវិកា ដើម្បីឱ្យសាខាសមាគមអាចបំពេញបេសកកម្មមនុស្សធម៌ និងជួយដល់ប្រជាពលរដ្ឋបានប្រកបដោយប្រសិទ្ធភាព។

យោងតាមរបាយការណ៍បូកសរុប ក្នុងរយៈពេល៦ខែដើមឆ្នាំ២០២៦ សាខាសមាគមនារីខេត្តកែប បានចុះសួរសុខទុក្ខ និងផ្តល់ជំនួយមនុស្សធម៌ដល់គ្រួសាររងគ្រោះ និងងាយរងគ្រោះចំនួន ៥៨គ្រួសារ។ ទន្ទឹមនឹងនេះ សាខាសមាគមក៏បានរួមចំណែកដោះស្រាយ និងឆ្លើយតបបញ្ហាប្រឈមនានា រួមមាន គ្រោះមហន្តរាយធម្មជាតិ ជំងឺឆ្លង ការលើកកម្ពស់ជីវភាពប្រជាពលរដ្ឋ ការថែទាំសុខភាពសាធារណៈ វិស័យអប់រំ និងការការពារបរិស្ថាន។

ទន្ទឹមនឹងនោះ លោកជំទាវប្រធានបានថ្លែងអំណរគុណដល់ឯកឧត្តមបណ្ឌិត សោម ពិសិដ្ឋ ប្រធានគណៈកម្មាធិការគណបក្សខេត្ត និងជាអភិបាលនៃគណៈអភិបាលខេត្តកែប ព្រមទាំងថ្នាក់ដឹកនាំមន្ទីរ អង្គភាព អាជ្ញាធរមូលដ្ឋានគ្រប់លំដាប់ថ្នាក់ និងសប្បុរសជនជាតិ-អន្តរជាតិ ដែលបានផ្តល់ការគាំទ្រ ការចង្អុលបង្ហាញ និងរួមចំណែកផ្នែកធនធាននានា ធ្វើឱ្យសកម្មភាពរបស់សាខាសមាគមនារីខេត្តកែបទទួលបានលទ្ធផលជាផ្លែផ្កា និងអាចបន្តបំពេញបេសកកម្មមនុស្សធម៌បម្រើប្រជាពលរដ្ឋកាន់តែមានប្រសិទ្ធភាព៕

ដោយ AKP