AKP ភ្នំពេញ ថ្ងៃទី៥ ខែសីហា ឆ្នាំ២០២៦-- លោកជំទាវ ទុយ សិរីរតនៈ នេត្រ ភក្ត្រា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មាន បានដឹកនាំប្រតិភូអមដំណើររួមមាន លោកជំទាវ សន ម៉ារ៉ាឌី រដ្ឋលេខាធិការ និងសមាជិក សមាជិកាសមាគម ចុះសួរសុខទុក្ខ និងនាំយកសម្ភារឧបភោគបរិភោគជាច្រើនទៅឧបត្ថម្ភជូនមណ្ឌលកែប្រែទី២ (ម២) ដើម្បីចូលរួមលើកកម្ពស់សុខុមាលភាព ព្រមទាំងផ្តល់ការយកចិត្តទុកដាក់ និងភាពកក់ក្តៅដល់ជនជាប់ឃុំ ជាពិសេសក្រុមស្ត្រី និងកុមារនាព្រឹកថ្ងៃទី៥ ខែសីហា ឆ្នាំ២០២៦។

ជំនួយមនុស្សធម៌ដែលបាននាំយកទៅប្រគល់ជូននាពេលនេះ រួមមាន៖ ព្រះរាជអំណោយសម្តេចព្រះមហាក្សត្រី នរោត្តម មុនិនាថ សីហនុ៖ ទស្សនាវដ្តី និងព្រឹត្តិបត្រសរុប២៥ក្បាល។ សម្ភារ និងគ្រឿងឧបភោគបរិភោគ៖ អង្ករវីតាមីន៣០០កេស ទស្សនាវដ្តីកម្ពុជា៣០ក្បាល និងសៀវភៅធំ៨០ក្បាល។ អំណោយពីក្រុមហ៊ុន Yeo's Cambodia៖ ទឹកសណ្តែក៥០កេស ទឹកសណ្តែក Super ៥កេស និងកាហ្វេ១០កេស។ អំណោយផ្ទាល់ពីលោកជំទាវ សេង រវីរតន៍ ហួត ឃាងវ៉េង៖ សារុង និងក្រមាសម្រាប់ស្ត្រីមានផ្ទៃពោះ ព្រមទាំងសម្លៀកបំពាក់ ថវិកា និងនំសម្រាប់កុមារ។

ថ្លែងក្នុងឱកាសនោះ លោកជំទាវ ទុយ សិរីរតនៈ នេត្រ ភក្ត្រា បានបញ្ជាក់ថា សកម្មភាពមនុស្សធម៌នេះគឺកើតចេញពីស្មារតីយកចិត្តទុកដាក់ខ្ពស់របស់សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងរាជរដ្ឋាភិបាលអាណត្តិទី៧ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ស្របតាមគោលការណ៍ «មិនបោះបង់នរណាម្នាក់ឡើយ»។ ទោះបីជាជំនួយទាំងនេះមិនទាន់អាចឆ្លើយតបបានទាំងស្រុងទៅនឹងតម្រូវការជាក់ស្តែងក៏ដោយ ប៉ុន្តែវាជាការចូលរួមចំណែកសម្រាលការខ្វះខាតមួយកម្រិត និងជាការផ្តល់កម្លាំងចិត្ត ក្តីសង្ឃឹម ព្រមទាំងបង្ហាញពីការយកចិត្តទុកដាក់ពីសង្គមជាតិមកលើជនជាប់ឃុំ ដើម្បីឱ្យពួកគាត់មានអារម្មណ៍ថា មិនត្រូវបានគេបោះបង់ចោលឡើយ។

ជាមួយគ្នានេះ លោកជំទាវប្រធានកិត្តិយសក៏បានកោតសរសើរចំពោះថ្នាក់ដឹកនាំ និងមន្ត្រីពន្ធនាគារទាំងអស់ ដែលបានខិតខំលើកស្ទួយសិទ្ធិមនុស្ស និងសម្រួលលក្ខខណ្ឌរស់នៅរបស់ជនជាប់ឃុំបានយ៉ាងល្អប្រសើរ រាប់ចាប់ពីការផ្តល់របបអាហារតាមច្បាប់ ការបណ្តុះបណ្តាលជំនាញវិជ្ជាជីវៈ ការថែទាំសុខភាព ការរៀបចំបណ្ណាល័យ ទីលានហាត់ប្រាណ សួនកម្សាន្តសម្រាប់កុមារ រហូតដល់ការយកចិត្តទុកដាក់លើការរស់នៅរបស់ជនជាប់ឃុំជាភេទទីបី (LGBTQ+) ផងដែរ។

សូមជម្រាបជូនថា សមាគមនារីកម្ពុជាដើម្បីសន្តិភាព និងអភិវឌ្ឍន៍ក្រសួងព័ត៌មាន ជានិច្ចកាលតែងតែធ្វើសកម្មភាពមនុស្សធម៌ផ្ទាល់ជាច្រើនតាមរយៈកាកបាទក្រហមកម្ពុជា នៅតាមមន្ទីរពេទ្យ មណ្ឌលកុមារកំព្រា មណ្ឌលជនមានពិការភាព មណ្ឌលអប់រំកែប្រែ ព្រមទាំងនៅតាមគោលដៅជាច្រើនផ្សេងទៀតផងដែរ៕

ដោយ ទូច វលក័្ខណ (រូបថត៖ ឡុង ដេវិត)