AKP ភ្នំពេញ ថ្ងៃទី០៥ ខែសីហា ឆ្នាំ២០២៦ -- មួយសប្តាហ៍បន្ទាប់ពីគ្រោះរញ្ជួយដីកម្រិត ៧,១រ៉ិចទ័របានវាយប្រហារខេត្តគូម៉ាម៉ូតុរបស់ប្រទេសជប៉ុននៅថ្ងៃទី២៨ ខែកក្កដា ប្រជាជនជាង ៨.០០០នាក់នៅតែស្ថិតក្នុងជម្រកបណ្តោះអាសន្នប្រហែល ១៥០កន្លែង ដោយមានអគារប្រហែល ១២.០០០ខ្នងរងការខូចខាត។ ចំនួនអ្នកស្លាប់មានចំនួន ៣៨នាក់ រួមទាំងមនុស្ស ៧នាក់បានស្លាប់នៅក្នុងការផ្ទុះមួយនៅផ្សារទំនើបអ៊ីអន បន្ទាប់ពីកម្មករត្រូវបានបញ្ជូនត្រឡប់ទៅខាងក្នុងវិញដើម្បីយកប្រាក់ពីការលក់ — ដែលជំរុញឱ្យមានការសុំទោសពីក្រុមហ៊ុន និង ៩នាក់ផ្សេងទៀតស្លាប់នៅរោងចក្រក្រដាស់នីបផុន។

កិច្ចខិតខំប្រឹងប្រែងស្តារឡើងវិញមានភាពតានតឹងយ៉ាងខ្លាំង ខណៈដែលសីតុណ្ហភាពឡើងដល់ ៤០អង្សាសេ រួមជាមួយនឹងការដាច់ទឹកយ៉ាងទូលំទូលាយដែលប៉ះពាល់ដល់ប្រជាជនចំនួន ៤៥.០០០គ្រួសារ។ អាជ្ញាធរកំពុងស៊ើបអង្កេតការស្លាប់ដែលសង្ស័យថាជាជំងឺដាច់សរសៃឈាមខួរក្បាលដោយសារកម្ដៅរបស់ប្រជាជនម្នាក់ដែលកំពុងស្ថិតនៅក្នុងយានយន្តមួយ ខណៈដែលជំរុញយ៉ាងសកម្មដល់អ្នកជម្លៀសឱ្យផ្លាស់ទៅសណ្ឋាគារ និងលំនៅដ្ឋានបន្ទាប់បន្សំ។ ទន្ទឹមនឹងនេះ ការដឹកជញ្ជូននៅតែត្រូវបានរំខាន ដោយផ្នែកសំខាន់ៗនៃផ្លូវល្បឿនលឿនគ្យូស្ស៊ុ និងគ្យូស្ស៊ុ ស្ស៊ីនកាន់សេន ត្រូវបានផ្អាក។

ជាការឆ្លើយតប នាយករដ្ឋមន្ត្រីជប៉ុន លោកស្រី សាណាអេ តាកាអ៊ីជឈិ បានត្រួតពិនិត្យតំបន់នេះ និងបានប្រកាសពីផែនការដើម្បីកំណត់ព្រឹត្តិការណ៍នេះថាជា «គ្រោះមហន្តរាយធ្ងន់ធ្ងរបំផុត» ដើម្បីជំរុញការឧបត្ថម្ភធនសម្រាប់ការកសាងឡើងវិញ។ គណៈរដ្ឋមន្ត្រីរបស់លោកស្រីក៏បានអនុម័តថវិកាបម្រុងសង្គ្រោះបន្ទាន់ចំនួន ២៤,២ពាន់លានយ៉េន (១៥០លានដុល្លារអាម៉េរិក) ដើម្បីគាំទ្រដល់ប្រតិបត្តិការផ្តល់ជំនួយ លំនៅដ្ឋានបណ្តោះអាសន្ន និងការជួសជុលហេដ្ឋារចនាសម្ព័ន្ធផងដែរ៕

ដោយ៖ យា ចិន្ដាខន្ដី (ប្រភព៖ AA-AKP)