AKP ភ្នំពេញ ថ្ងៃទី៥ ខែសីហា ឆ្នាំ២០២៦-- លទ្ធផលនៅក្នុងឆមាសទី១ ឆ្នាំ២០២៦ រដ្ឋបាលរាជធានីភ្នំពេញ បានចុះត្រួតពិនិត្យរដ្ឋបាលនៅតាមទីតាំងស្នាក់នៅរួមបានចំនួន១៧៤៩១ ទីតាំង និងបានរកឃើញជនបរទេស១១៦.៧០០ នាក់ (ស្រីចំនួន ៣៤.៤៤២នាក់) ស្មើនឹង ៧៥ សញ្ជាតិ ដោយក្នុងនោះបង្ក្រាបបទល្មើសឆបោកតាមប្រព័ន្ធបច្ចេកវិទ្យាបានចំនួន១៣៩ទីតាំង និងឃាត់ខ្លួនបានចំនួន ២.៣៨៩នាក់ (ស្រី៣៥៧នាក់) ស្មើនឹង២៧សញ្ជាតិ ព្រមទាំងបានដកហូតនូវសម្ភារជាវត្ថុតាងមួយចំនួនទៀត។ នេះបើតាមការបញ្ជាក់ឱ្យដឹងពីលោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ នាថ្ងៃទី៥ ខែសីហា ឆ្នាំ២០២៦។

លោកស្រីបានបន្ដថា ក្នុងឆមាសទី១ ឆ្នាំ២០២៦នេះ អនុវត្តតាមគោលនយោបាយ ភូមិ-ឃុំ-សង្កាត់មានសុវត្ថិភាព រដ្ឋបាលរាជធានីភ្នំពេញ ដឹកនាំដោយឯកឧត្តម ឃួង ស្រេង អភិបាល និងជាប្រធានគណៈបញ្ជាការឯកភាពរាជធានីភ្នំពេញ បានយកចិត្តទុកដាក់ខ្ពស់ក្នុងការបន្តរក្សាបាននូវសន្តិសុខ សណ្តាប់ធ្នាប់សាធារណៈយ៉ាងល្អប្រសើរជូនប្រជាជនក្នុងមូលដ្ឋាន តាមរយៈការទប់ស្កាត់ និងបង្ក្រាបបទល្មើសព្រហ្មទណ្ឌ បទល្មើសគ្រឿងញៀន អំពើជួញដូរមនុស្ស សកម្មភាពក្រុមក្មេងទំនើងល្បែងស៊ីសងខុសច្បាប់។ ថ្មីៗនេះ កម្លាំងសមត្ថកិច្ចចុះបង្ក្រាបបទលើ្មស ក្មេងទំនើង ល្បែងស៊ីសងគ្រប់ប្រភេទ បានចំនួន២១៨/២៣៧ករណី ថយចុះ១៩ករណី ក្នុងនោះគណៈបញ្ជាការឯកភាពរដ្ឋបាលរាជធានីភ្នំពេញ បានម្ចាស់ការបង្ក្រាបបទល្មើសទាំងនេះសរុបចំនួន២០៩/២១៨ ករណី ស្មើនឹង៩៥,៨៧% នៃចំនួនបទល្មើសរួម និងឃាត់ខ្លួន បានចំនួន២៦៩នាក់។

លោកស្រីបានបន្តទៀតថា តាមរយៈរបាយការណ៍របស់ឯកឧត្តម ឃួង ស្រេង អភិបាលរាជធានីភ្នំពេញ ដែលបានរាយកាណ៍ជូនឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ក្នុងកិច្ចប្រជុំត្រួតពិនិត្យវឌ្ឍនភាពនៃការអនុវត្តការងារប្រចាំឆមាសទី១ ឆ្នាំ ២០២៦ របស់រដ្ឋបាលរាជធានីភ្នំពេញ នៅទីស្តីការក្រសួងមហាផ្ទៃ កាលពីថ្ងៃទី៣ ខែសីហា ឆ្នាំ២០២៦ កន្លងទៅនេះ ឯកឧត្តមអភិបាលក៏បានជម្រាបជូនអំពីវឌ្ឍនភាពនៃយុទ្ធនាការបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams) ដែលរដ្ឋបាលរាជធានីភ្នំពេញ បាននិងកំពុងអនុវត្តយ៉ាងសកម្ម និងជាប់ជាប្រចាំនូវបទបញ្ជាលេខ ០១ប.ប ចុះថ្ងៃទី០៤ ខែកក្កដា ឆ្នាំ២០២៥ របស់រាជរដ្ឋាភិបាល និងអនុក្រឹត្យលេខ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ ស្តីពីការគ្រប់គ្រងសន្តិសុខសុវត្ថិភាពតាមទីតាំងរស់នៅប្រមូលផ្តុំផងដែរ។

លោកស្រី ដោ សម្ផស្ស បានបន្តថា បើគិតចាប់ពីពេលបើកយុទ្ធនាការ នៅថ្ងៃទី១ ខែកក្កដា ឆ្នាំ២០២៥ រហូតដល់ថ្ងៃទី៣០ ខែមិថុនា ឆ្នាំ២០២៦នេះ គណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យារាជធានីភ្នំពេញ បានចុះត្រួតពិនិត្យរដ្ឋបាលនៅតាមទីតាំងស្នាក់នៅរួមបានចំនួន ១៩.៥០៤ទីតាំង និងបានរកឃើញជនបរទេសចំនួន ១៣៦.៨៣១នាក់ (ស្រីចំនួន ៤០.២៧២នាក់) ស្មើនឹង ៧៥សញ្ជាតិ ដោយក្នុងនោះបានបង្ក្រាបបទល្មើសឆបោកតាមប្រព័ន្ធបច្ចេកវិទ្យាបានចំនួន១៨៤ករណី និងឃាត់ខ្លួនបានចំនួន ៣.៦៦០នាក់ (ស្រី ៥៨២នាក់) ស្មើនឹង ២៧ សញ្ជាតិ ព្រមទាំងបានដកហូតនូវសម្ភារៈមួយចំនួនទៀត និងបានផាកពិន័យម្ចាស់ទីតាំង ដែលមានចេតនាលាក់បាំងពីវត្តមានជនបរទេសក្នុងទីតាំងរបស់ខ្លួនបានចំនួន១០៧ទីតាំង និងរកឃើញជនបរទេសចំនួន ៦៨៩នាក់ ដោយគិតជាថវិកាផាកពិន័យសរុបប្រមាណ ២.៧៥៦លានរៀល៕

ដោយ សួស សំរិត