AKP ភ្នំពែញ ថ្ងៃទី០៥ ខែសីហា ឆ្នាំ២០២៦--កម្មវិធីស្បៀងអាហារពិភពលោក (World Food Programme - WFP) ប្រចាំប្រទេសកម្ពុជា និងក្រុមហ៊ុន ដេនសូ (DENSO Cambodia) កំពុងចាប់ដៃគូគ្នា ដើម្បីលើកកម្ពស់អាហារូបត្ថម្ភនៅកន្លែងធ្វើការ តាមរយៈការសាកល្បងបរិភោគអង្ករមីក្រូសារជាតិ ក្នុងគោលបំណងស្វែងរកលទ្ធផលជាក់ស្តែងនានា ក្នុងការកែលម្អសុខុមាលភាពអាហារូបត្ថម្ភរបស់កម្មករ កម្មការិនី។

ប្រភពពីកម្មវិធីស្បៀងអាហារពិភពលោក បានឱ្យដឹងកាលពីថ្ងៃទី០៤ ខែសីហា ឆ្នាំ២០២៦ ថា លទ្ធផលដែលទទួលបានពីការសាកល្បងនេះ នឹងត្រូវយកទៅរៀបចំជារបាយការណ៍ជាក់លាក់សម្រាប់ក្រុមហ៊ុន ដេនសូដោយមានភ្ចាប់ជាមួយការណែនាំផ្អែកលើភស្តុតាងជាក់ស្តែង ដើម្បីគាំទ្រដល់សុខភាព សុខុមាលភាពរបស់បុគ្គលិក និងគំនិតផ្តួចផ្តើមផ្នែកអាហារូបត្ថម្ភនៅកន្លែងធ្វើការនាពេលអនាគត។

គំនិតផ្តួចផ្តើមនេះ រួមបញ្ចូលជាមួយវគ្គលើកកម្ពស់ការយល់ដឹងអំពីអាហារូបត្ថម្ភ ការវាយតម្លៃចំណេះដឹង និងការប្រមូលស្ទង់មតិពីអ្នកចូលរួមអំពីការបរិភោគអង្ករមីក្រូសារជាតិទៀតផង៕

ដោយ៖ ណយ នឿន (ប្រភព៖ កម្មវិធីស្បៀងអាហារពិភពលោក)