AKP បន្ទាយមានជ័យ ថ្ងៃទី៥ ខែសីហា ឆ្នាំ២០២៦-- លោក សេក សុខុម ប្រធានមន្ទីរព័ត៌មានខេត្តបន្ទាយមានជ័យ បានដាក់ចេញនូវបទបង្ហាញ និងអនុសាសន៍គន្លឹះយ៉ាងមុតស្រួច ដោយជំរុញឱ្យមន្ត្រីរាជការទាំងអស់ បន្តពង្រឹងគុណភាពមាតិកាឌីជីថល និងបង្កើនការទប់ស្កាត់ព័ត៌មានក្លែងក្លាយ (Fake News) ឱ្យបានទាន់ពេលវេលា ដើម្បីការពារសេចក្តីសុខសាន្ត និងការយល់ច្រឡំរបស់សាធារណជន។

ការលើកឡើងនេះត្រូវបានធ្វើឡើងក្នុងកិច្ចប្រជុំបូកសរុបរបាយការណ៍លទ្ធផលការងារប្រចាំខែកក្កដា និងកំណត់ទិសដៅការងារត្រូវអនុវត្តបន្ត កាលពីរសៀលថ្ងៃអង្គារ ទី៤ ខែសីហា ឆ្នាំ២០២៦ នៅសាលប្រជុំមន្ទីរព័ត៌មានខេត្តបន្ទាយមានជ័យ ដោយមានការអញ្ជើញចូលរួមពីអនុប្រធានមន្ទីរ ប្រធាន អនុប្រធានការិយាល័យទាំង៥ និងមន្ត្រីរាជការចំណុះឱ្យមន្ទីរជាច្រើនរូប។

ក្នុងកិច្ចប្រជុំដ៏មានសារៈសំខាន់នេះ លោក សេក សុខុម បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការទាំងអស់ ដែលបានបំពេញភារកិច្ចយ៉ាងសកម្មក្នុងការផ្សព្វផ្សាយព័ត៌មានពិត លឿនរហ័ស និងទាន់ហេតុការណ៍ ជូនដល់សាធារណជនក្នុងខែកន្លងមក។ ដើម្បីជំរុញប្រសិទ្ធភាពការងារជំនាញឱ្យកាន់តែមានកម្រិតខ្ពស់ថែមទៀត លោកប្រធានមន្ទីរបានដាក់ចេញនូវអនុសាសន៍គន្លឹះស៊ីជម្រៅត្រូវ ពង្រឹងគុណភាព និងភាពសម្បូរបែបនៃមាតិកាព័ត៌មានមន្ត្រីជំនាញត្រូវយកចិត្តទុកដាក់ខ្ពស់លើការផលិតមាតិកាឱ្យកាន់តែមានភាពសម្បូរបែប ដោយត្រូវឆ្លុះបញ្ចាំងឱ្យបានស៊ីជម្រៅពីវឌ្ឍនភាពនៃការអភិវឌ្ឍន៍ សន្តិសុខ សណ្តាប់ធ្នាប់សាធារណៈ និងជីវភាពរស់នៅជាក់ស្តែងរបស់ប្រជាពលរដ្ឋក្នុងខេត្ត។ មន្ត្រីព័ត៌មានត្រូវតាមដាន និងក្តាប់ឱ្យបានជិតស្និទ្ធបំផុតនូវរាល់ព័ត៌មានមិនពិត ឬព័ត៌មានបំពុលសង្គមដែលអាចបង្កការភ័ន្តច្រឡំ ដើម្បីធ្វើការបកស្រាយ និងឆ្លើយតបបានទាន់ពេលវេលាដោយមានមូលដ្ឋានច្បាស់លាស់។ មន្ត្រីរាជការទាំងអស់ត្រូវបន្តខិតខំអភិវឌ្ឍសមត្ថភាពបន្ថែមទៀតលើផ្នែកបច្ចេកវិទ្យា និងប្រព័ន្ធផ្សព្វផ្សាយទំនើបៗ ដើម្បីដើរឱ្យទាន់ការវិវត្តនៃសង្គមឌីជីថលសម័យថ្មី។ថ្នាក់ដឹកនាំការិយាល័យទាំងអស់ ត្រូវដឹកនាំដោយឈរលើស្មារតីទទួលខុសត្រូវខ្ពស់ ព្រមទាំងបង្កើនកិច្ចសហការជិតស្និទ្ធរវាងការិយាល័យទាំង៥ ដើម្បីធានាឱ្យដំណើរការការងារប្រព្រឹត្តទៅដោយរលូន និងមានប្រសិទ្ធភាពខ្ពស់។

ជាមួយគ្នានោះ លោក សេក សុខុម បានបង្ហាញក្តីសង្ឃឹមយ៉ាងមុតមាំថា ថ្នាក់ដឹកនាំ និងមន្ត្រីរាជការទាំងអស់ នឹងបន្តប្តេជ្ញាចិត្តខ្ពស់ក្នុងការអនុវត្តតាមទិសដៅទាំងនេះ ដើម្បីសម្រេចបាននូវសមិទ្ធផលថ្មីៗបន្ថែមទៀត ឆ្លើយតបយ៉ាងល្អប្រសើរតាមបទបញ្ជា និងគោលនយោបាយរបស់ក្រសួងព័ត៌មាន ក៏ដូចជារដ្ឋបាលខេត្តបន្ទាយមានជ័យ៕

ដោយ ឈុន សារ៉ាត