AKP កំពង់ធំ ថ្ងៃទី៤ ខែសីហា ឆ្នាំ២០២៦--លោក អ៊ឹម សួស្តី បានលើកឡើងថា ប្រព័ន្ធធារាសាស្ត្រថ្មីៗទៀតនៅស្រុកស្ទោងនឹងបង្កើនជីវភាពពលរដ្ឋក្នុងមូលដ្ឋានឱ្យកាន់តែប្រសើរឡើង។

លោក អ៊ឹម សួស្តី អនុប្រធាននាយកដ្ឋាន សហគមន៍កសិករប្រើប្រាស់ទឹក នៃក្រសួងធនធានទឹក និងឧតុនិយមបានលើកឡើងដូច្នេះនៅក្នុងកិច្ចប្រជុំពិភាក្សា ជាមួយអាជ្ញាធរពាក់ព័ន្ធស្ដីពីការកសាង និងស្ដារប្រព័ន្ធធារាសាស្ត្រថ្មីៗបន្ថែមទៀតសម្រាប់ស្រុកស្ទោង ខេត្តកំពង់ធំ នៅអគាររដ្ឋបាលស្រុកស្ទោង នាព្រឹកថ្ងៃអង្គារ ទី៤ ខែសីហា ឆ្នាំ២០២៦។

លោក អ៊ឹម សួស្ដី បានសង្កត់ធ្ងន់ថា ការអភិវឌ្ឍ និងការពង្រីកប្រព័ន្ធធារាសាស្ត្រថ្មីៗនៅក្នុងស្រុកស្ទោង ខេត្តកំពង់ធំ គឺជាជំហានដ៏សំខាន់ ឆ្លើយតបបានទាន់ពេលវេលា និងមានតម្លៃធំធេងណាស់សម្រាប់ជីវភាពរស់នៅរបស់បងប្អូនប្រជាពលរដ្ឋក្នុងមូលដ្ឋាន ព្រោះសមិទ្ធផលទាំងនេះផ្តល់ផលប្រយោជន៍ និងផលវិជ្ជមានជាច្រើនផ្នែករួមគ្នាគឺ ធានាសន្តិសុខទឹក៖ មានប្រភពទឹកគ្រប់គ្រាន់សម្រាប់ធ្វើស្រែចម្ការ និងដាំដំណាំបានច្រើនរដូវ (ទាំងវស្សា និងប្រាំង) ដែលជួយបង្កើនទិន្នផល និងប្រាក់ចំណូលគ្រួសារសម្រាប់ទីតាំងថ្មីៗបន្ថែមទៀត។ កាត់បន្ថយហានិភ័យគ្រោះធម្មជាតិ៖ ដើរតួនាទីជាប្រព័ន្ធរំដោះទឹក និងការពារការលិចលង់ដោយជំនន់ទឹកភ្លៀងជាយថាហេតុ ការពារទ្រព្យសម្បត្តិ និងដំណាំកសិកម្មរបស់កសិករ។ សម្រួលការធ្វើដំណើរ និងដឹកជញ្ជូន៖ ខ្នងទំនប់ឬភ្លឺកសិដ្ឋានបានប្រែក្លាយជាផ្លូវគមនាគមន៍ថ្មី សម្រួលដល់ការដឹកជញ្ជូនកសិផលទៅកាន់ទីផ្សារបានឆាប់រហ័ស និងចំណាយតិច។ លើកកម្ពស់អេកូទេសចរណ៍ និងបរិស្ថាន៖ ការអភិរក្ស និងអភិវឌ្ឍអាងទឹក៣០កញ្ញា ឱ្យទៅជាតំបន់អេកូទេសចរណ៍ មិនត្រឹមតែថែរក្សាបរិស្ថានប៉ុណ្ណោះទេ ប៉ុន្តែថែមទាំងបង្កើតឱកាសការងារ និងមុខរបរថ្មីៗជូនពលរដ្ឋក្នុងតំបន់ទៀតផង។

លើសពីនេះការកសាងទំនប់ស្ទាក់កទឹកស្ទឹងតូច(ស្ទឹងនាងសល្ងាច) នឹងអាចស្តុកទឹករាប់លានម៉ែត្រគុបបន្ថែមទៀត ក្នុងការផ្គត់ផ្គង់ការស្រោចស្រពធ្វើស្រែស្រូវរបស់កសិករនៅក្នុងឃុំកំពង់ចិនជើង ឃុំប្រឡាយ និងឃុំម្សាក្រង ជាច្រើនពាន់ហិតតាប្រកបដោយសុវត្ថិភាព។ ការផ្លាស់ប្តូរទាំងនេះនឹងក្លាយជាសសរស្តម្ភយ៉ាងរឹងមាំក្នុងការជំរុញសេដ្ឋកិច្ចគ្រួសារ និងសហគមន៍ក្នុងស្រុកស្ទោងឱ្យកាន់តែរីកចម្រើន និងចីរភាព៕

ដោយ ស៊ុម វណ្ណា