AKP ភ្នំពេញ ថ្ងៃទី៤ ខែសីហា ឆ្នាំ២០២៦--រាជធានី​ភ្នំពេញ​បាន​ក្លាយជា​បេះដូង​នៃ «​ការទូត​សភា​» តាមរយៈ​ការត្រៀម​លក្ខណៈ​ធ្វើជា​ម្ចាស់ផ្ទះ​រៀបចំ​ព្រឹត្តិការណ៍​សកល​ និង​តំបន់​ធំៗ​ជា​បន្តបន្ទាប់ ជាពិសេស​គឺ​សន្និសីទ​ប្រធានសភា​នៃ​អន្តរ​សភា (ISC) លើក​ទី​២ ដែល​នឹង​ប្រព្រឹត្តទៅ​ចាប់ពី​ថ្ងៃទី​២៦ ដល់ថ្ងៃទី២៨ ខែសីហា ឆ្នាំ​២០២៦ ​ខាងមុខនេះ។

ព្រឹត្តិការណ៍​ជា​ប្រវត្តិសាស្ត្រ​នេះ​បាន​ទាក់ទាញ​មេដឹកនាំ​ស្ថាប័ន​នីតិប្បញ្ញត្តិ និង​ប្រធានសភា​ល្បីៗ​មកពី​ជុំវិញ​ពិភពលោក​ឱ្យមកជួបជុំ​គ្នា​នៅ​រាជធានី​ភ្នំពេញ​ដើម្បី​ជជែក​ពិភាក្សា និង​ស្វែងរក​ដំណោះស្រាយ​រួម​លើ​បញ្ហា​ប្រឈម​ជាស​កល។ ព្រឹត្តិការណ៍​ជា​ប្រវត្តិសាស្ត្រ​នេះ​ឆ្លុះបញ្ចាំង​ពី​តួនាទី​ដ៏​លេចធ្លោ​របស់​កម្ពុជា​ក្នុងការ​ដឹកនាំ​កិច្ចសន្ទនា​អន្តរជាតិ​ដើម្បី​ស្វែងរក​សន្តិភាព និង​ការអភិវឌ្ឍ​ប្រកបដោយ​ចីរភាព។

ពិតប្រាកដ​ណាស់ ​ការណ៍​ដែល​កម្ពុជា​ទទួលបាន​សិទ្ធិ​ជា​ម្ចាស់ផ្ទះ​រៀបចំ​សន្និសីទ ISC-2 នេះ​គឺ​សរ​បញ្ជាក់​យ៉ាងច្បាស់​ពីរ​បត់​ប្រវ​ត្តិ​សាស្ត្រ​ថ្មី​នៃ​វឌ្ឍនភាព​ការទូត​របស់​ជាតិ។ ពី​ប្រទេសមួយ​ដែល​ធ្លាប់តែ​ទទួល​កងកម្លាំង​រក្សា​សន្តិភាព​របស់​អង្គការសហប្រជាជាតិ (UNTAC) នា​សម័យមុន​ឥឡូវនេះ​កម្ពុជា​បាន​ក្លាយជា​អ្នករៀបចំ​ និង​ជាអ្នកដឹកនាំ​វេទិកា​សន្តិភាព​កម្រិត​ពិភពលោក​វិញ​ម្តង។​

​ភ្នំពេញ​នឹង​ដើរតួ​ជាទី​កន្លែង​អព្យាក្រឹត និង​មាន​សុវត្ថិភាព​ខ្ពស់​ក្នុងការ​ទាក់ទាញ​បណ្តា​ប្រទេស​ដែលមាន​និន្នាការ​នយោបាយ​ខុសគ្នា មក​អង្គុយ​ជជែក​គ្នា​រក​ដំណោះស្រាយ​។ ​ការ​ដើរតួ​ជាទី​កន្លែង​អព្យាក្រឹត និង​មាន​សុវត្ថិភាព​ខ្ពស់​របស់​ភ្នំពេញ​គឺជា​ចំណុចខ្លាំង​បំផុត​នៃ​យុទ្ធសាស្ត្រ​ការទូត​សហប្រតិបត្តិការ​របស់​កម្ពុជា ។ សមត្ថភាព​ក្នុងការ​ប្រមូលផ្តុំ​ភាគី​ដែលមាន​និន្នាការ​នយោបាយ​ខុសគ្នា ឱ្យមក​អង្គុយ​តុ​ចរចា​ជាមួយគ្នា​បាន​ឆ្លុះបញ្ចាំង​ពី​លក្ខណៈពិសេស​មួយចំនួនរបស់កម្ពុជាដែល​ប្រកាន់ខ្ជាប់​នូវ​គោលការណ៍​រួមរស់​ដោយ​សន្តិ​សហ​វិជ្ជមាន និង​មិន​ជ្រៀតជ្រែក​កិច្ចការ​ផ្ទៃក្នុង​ដែល​បង្កើតជា​បរិយាកាស​ជឿទុកចិត្ត​សម្រាប់គ្រប់ភាគី​ជម្លោះ។ ភាពជោគជ័យ​ក្នុង​ការធានា​សុវត្ថិភាព​ដាច់ខាត​ជូន​ដល់​គណៈប្រតិភូ​ជាន់ខ្ពស់​ក្នុង​ព្រឹត្តិការណ៍​ធំៗ​កន្លងមក​(​ដូចជា​កិច្ចប្រជុំ​កំពូល​អាស៊ាន និង IPU ) គឺជា​សក្ខីកម្ម​ស្រាប់។​

​សន្និសីទ​ប្រធានសភា​នៃ​អន្តរ​សភា​លើក​ទី២ នឹង​រៀបចំ​នៅ​មជ្ឈមណ្ឌល​សន្និបាត GDT (GDT Convention Centre) លំដាប់​ផ្កាយ​ប្រាំ។  អគារ GDT Tower​ បាន​បំពាក់​នូវ​មជ្ឈមណ្ឌល​សន្និបាត​ និង​ឧបករណ៍​ទំនើ​បៗ​ដូចជា​៖ ​សាល​មហោស្រព (Grand Ballroom) ​ដែលមាន​សមត្ថភាព​អាច​ទទួលភ្ញៀវ​កិត្តិយស​បាន​រហូតដល់ ១ ០០២នាក់​ សម្រាប់​កម្មវិធី​បើក​-​បិទ​ជា​ផ្លូវការ​ និង​ពិធី​លៀង​សាយភោជន៍។ សាលប្រជុំ​ធំ (Auditorium) មាន​កៅអី​ចំនួន ២៣៤កៅអី រួមជាមួយ​ផ្ទាំង LED ខ្នាត​ធំ​ទំហំ ៦​ម៉ែត្រ និង​ប្រព័ន្ធ​សំឡេង​កម្រិត​អន្តរជាតិ​។ ​ប្រព័ន្ធ​បច្ចេកវិទ្យា​ទាន់សម័យ​ដែល​អនុញ្ញាតឱ្យ​មានការ​ប្រជុំ​ និង​ផ្សាយ​ផ្ទាល់​បែប Hybrid ជាមួយ​បណ្តា​ប្រទេស​ជុំវិញ​ពិភពលោក។ ​បន្ទប់​ប្រជុំដាច់ដោយឡែក ​ដែល​អាច​បត់បែន តាម​តម្រូវការ​ពី ៤ ទៅ ៣០នាក់ ​សម្រាប់​កិច្ចពិភាក្សា​ទ្វេភាគី​រវាង​ប្រធានសភា​នៃ​ប្រទេស​នីមួយៗ។ 

​សន្និសីទ​ប្រធានសភា​នៃ​អន្តរ​សភា​លើក​ទី​២(ISC-2) ដែល​នឹង​រៀបចំឡើង​នៅ​មជ្ឈមណ្ឌល​សន្និបាត GDT រាជធានី​ភ្នំពេញ​គឺជា «​ព្រឹត្តិការណ៍​ប្រវត្តិសាស្ត្រ​ថ្មី​» មួយ​របស់​កម្ពុជា​ ព្រោះនេះ​ជា​លើកដំបូង​បំផុត​ដែលស្ថាប័ន​នីតិប្បញ្ញត្តិ​កំពូល​របស់​ជាតិ​ទទួលបាន​សិទ្ធិ​ធ្វើជា​ម្ចាស់ផ្ទះ​រៀបចំ​មហា​សន្និបាតសភា​កម្រិត​ពិភពលោក​ដ៏​ធំ​បែបនេះ។ ភ្នំពេញ​នឹង​ក្លាយ​ជា​ផ្នែក​មួយ​ដ៏​សំខាន់​នៃ​ការសម្រេចចិត្ត ​និង​ការជជែកវែកញែក​គោលនយោបាយ​សកល​ដោយ​ស្វាគមន៍​ប្រធានសភា និង​ប្រតិភូ​មកពី​ជិត ៥០​ប្រទេស (ក្នុងនោះប្រមាណ ២០ប្រទេស បានបញ្ជាក់ពីការចូលរួមហើយ) ​និង​អង្គការ​អន្តរជាតិ​ធំៗ​ជាង​១០​។ ​កម្ពុជា​នឹង​ដឹកនាំ​ការតាក់តែង​កិច្ចព្រមព្រៀង និង​ការប្តេជ្ញាចិត្ត​រួមគ្នា លើ​ប្រធានបទ សន្តិភាព ស្ថិរភាព និង​ការគោរព​ច្បាប់​អន្តរជាតិ ។ ពី​ប្រទេស​ដែល​ធ្លាប់​រងគ្រោះ​ដោយសារ​សង្គ្រាម និង​ធ្លាប់​ទទួល​កងកម្លាំងរ​ក្សា​សន្តិភាព​អង្គការសហប្រជាជាតិ (UNTAC) កម្ពុជា​នាពេលនេះ​បាន​ដើរតួ​ជា «​រដ្ឋ​រៀបចំ និង​សម្របសម្រួល​សន្តិភាព​ស​កល​» វិញ។ ព្រឹត្តិការណ៍​នេះ​បង្ហាញ​ពី​ជំហាន​ដើរ​ដ៏​វែងឆ្ងាយ​ និង​ភាពចាស់ទុំ​នៃ​វិស័យ​ការទូត​របស់​សភា​កម្ពុ​ជា​ក្រោម​ការដឹកនាំ​របស់​សម្តេច​អគ្គមហា​សេនាបតី​តេ​ជោ ហ៊ុន សែន ប្រធានព្រឹទ្ធសភា។​

​ក្នុងនាម​ជា​ម្ចាស់ផ្ទះ​នៃ​ការរៀបចំ​សន្និសីទ​ប្រធានរដ្ឋសភា​នៃ​អន្ដរ​សភា​លើក​ទី២នេះ កម្ពុជា​ក៏បាន​ត្រៀមខ្លួន​រួចរាល់​ស្ទើរ ១០០ភាគរយ​ហើយ ដើម្បី​ទទួល​ស្វាគម​ន៍​ថ្នាក់ដឹកនាំ​មកពីបណ្ដា​ស្ថាប័ន​នីតិប្បញ្ញត្តិ​តាម​ប្រទេស​នានា និង​អង្គការ​អន្ដរជាតិ​ដែល​នឹង​អញ្ជើញ​មក​ចូលរួម​ក្នុង​ព្រឹ​ត្ដិ​ការណ៍​ដ៏​មាន​សារៈសំខាន់​នេះ​នៅក្នុង​ប្រទេស​កម្ពុជា​។ 

​ថ្នាក់ដឹកនាំ​ជាន់ខ្ពស់​នៃ​ស្ថាប័ន​នីតិប្បញ្ញត្តិ គឺ​ព្រឹទ្ធសភា និង​រដ្ឋសភា កាលពី​ថ្ងៃទី​២០ ខែកក្កដា ឆ្នាំ​២០២៦​កន្លងទៅ នៅ​វិមាន​ព្រឹទ្ធសភា បាន​បើក​កិច្ចប្រជុំ​រួមគ្នា​ដើម្បី​ពិភាក្សា និង​ត្រៀមលក្ខណៈ​រៀបចំ​ស​ន្និសីទប្រធានសភា​នៃ​អន្តរ​សភា​លើក​ទី២ ក្រោម​អធិបតី​ភាព ឯកឧត្តម អ៊ុច បូរ​រិ​ទ្ធ អនុប្រធាន​ទី​១ ព្រឹទ្ធសភា និង​ឯកឧត្តម​កិត្តិ​សេដ្ឋា​បណ្ឌិត ជាម យៀប អនុប្រធាន​ទី​១ រដ្ឋសភា ព្រមទាំង​មានការ​អញ្ជើញ​ចូលរួមពី​សំណាក់​សមាជិក សមាជិកា​ព្រឹទ្ធសភា រដ្ឋសភា និង​ថ្នាក់ដឹកនាំ​នៃ​អគ្គលេខាធិការដ្ឋាន​នៃ​ស្ថាប័ន​ទាំងពីរ​ជាច្រើនរូប​។ កិច្ចប្រជុំ​នេះ ធ្វើឡើង​ក្នុង​គោលបំណង​ត្រួតពិនិត្យ វាយតម្លៃ និង​រៀបចំ​ផែនការ​ការងារ​ឱ្យបាន​គ្រប់​ជ្រុងជ្រោយ ទាំង​ផ្នែក​ខ្លឹមសារ ពិធីការ និង​សន្តិសុខ សណ្តាប់ធ្នាប់ សម្រាប់​ដំណើរការ “​សន្និសីទ​ប្រធានសភា​នៃ​អន្តរ​សភា លើក​ទី​២” ដែល​ព្រះរាជាណាចក្រ​កម្ពុជា​ធ្វើជា​ម្ចាស់ផ្ទះ។​

​ឯកឧត្ដម ជា ធី​រិ​ទ្ធ អ្នកនាំពាក្យ​ព្រឹទ្ធសភា​ បញ្ជាក់ថា​​៖ «​ជារួម​យើង​បាន​ត្រៀមខ្លួន​សម្រាប់​ព្រឹ​ត្ដិ​ការណ៍​អន្ដរជាតិ ដែល​កម្ពុជា​យើង​ធ្វើជា​ម្ចាស់ផ្ទះនេះ ស្ទើរតែ ១០០ ភាគរយហើយ គឺ​រង់ចាំតែ​ដល់​ថ្ងៃ​នៃ​​ព្រឹត្តិការណ៍​ប៉ុណ្ណោះ»​។ ឯកឧត្ដម​បានឱ្យដឹង​ទៀតថា តាមរយៈ​សកម្មភាព​ដែល​កម្ពុ​ជា​ធ្វើជា​ម្ចាស់ផ្ទះ​សន្និសីទ​ប្រធានសភា​នៃ​អន្ដរ​សភា​នេះ គឺ​ឆ្លើយតប​ទៅនឹង​ទិសដៅ​របស់​សម្ដេច​តេ​ជោ ​ប្រធានព្រឹទ្ធសភា ​ដែល​បានដាក់​ទិសដៅ​ពីរ​សំខាន់ ទី​១ ការងារ​នៅក្នុង​ប្រទេស​គឺ​គណនេយ្យភាព​នៅក្នុង​អង្គ​បោះឆ្នោត​ជាមួយ​សមាជិក​ព្រឹទ្ធសភា​ និង​ទី​២ ​ការទូត​សភា​ដែលជា​ចំណុច​ដ៏​សំខាន់​ដែល​សម្ដេច​តេ​ជោ​បាន​ដាក់ចេញ​ក្នុងទិសដៅមួយ​សម្រាប់​ការបំពេញបន្ថែម​ដល់​ស្ថាប័ន​នីតិប្រតិបត្តិ ដែល​បាន​អនុវត្ដ​ក្នុង​ក្របខ័ណ្ឌ​ទំនាក់ទំនង​ការទូត​។​

​ប្រធានបទ​ស្នូល​នៃ​សន្និសីទ​នេះគឺ «​សាមគ្គីភាព​ដើម្បី​សន្តិភាព និង​វិបុលភាព​រួម​៖​ ការពង្រឹង​ច្បាប់​អន្តរជាតិ​ និង​ការដោះស្រាយ​ជម្លោះ​ដោយ​សន្តិវិធី» គឺជា​វិញ្ញាសា​នយោបាយ​ការទូត​ដ៏​មាន​សារៈ​សំខាន់បំផុត ដែល​កម្ពុជា​បានជ្រើសរើស​សម្រាប់​សន្និសីទ​ប្រធានសភា​អន្តរជាតិ​លើក​ទី​២ (ISC-2)។ ប្រធានបទ​នេះ​ឆ្លុះបញ្ចាំង​ពី​តម្រូវការ​បន្ទាន់​នៃ​សណ្តាប់ធ្នាប់​សកលលោកបច្ចុប្បន្ន​ក្នុងការប្រឆាំង​នឹង​ឯកតោភាគី​និយម និង​ការពង្រឹង​ច្បាប់​អន្តរជាតិ។ 

ប្រធានបទ​នេះ​ជំរុញ​ឱ្យ​សភា​នៃ​ប្រទេស​នីមួយៗ​ប្រើប្រាស់​អំណាចនីតិប្បញ្ញត្តិ ដើម្បី​ពង្រឹង​ការអនុវត្ត​ច្បាប់​អន្តរជាតិ​ឡើងវិញ ការពារ​នីតិរដ្ឋ និង​គោរព​អធិបតេយ្យភាព រវាង​រដ្ឋ និង​រដ្ឋ​ដើម្បី​ធានាបាន​នូវ​ស្ថិរភាព​យូរអង្វែង។ 

បន្ថែមពីនេះ ប្រធានបទ​នេះ​ក៏​ឆ្លុះបញ្ចាំង​ពី​ទស្សនវិស័យ​របស់ សម្តេច​តេ​ជោ ហ៊ុន សែន ​ដែល​បាន​សង្កត់ធ្ងន់ថា​៖ «​សន្តិភាព និង​វិបុល​ភាព ​មិនអាច​កើតឡើង​តាមរយៈ​ការបង្ខិតបង្ខំ ឬ​ការបង្កើត​ភាព​ឯកច្ឆន្ទ​ដោយ​បង្ខំ​នោះទេ»​។ ផ្ទុយទៅវិញ​វា​ត្រូវតែ​បង្កើតឡើង​ដោយ «​ការគោរព​គ្នា ការយោគយល់​គ្នា​ និង​ការដោះស្រាយ​ជម្លោះ​ដោយ​សន្តិវិធី»។ ការបង្កើន​តួនាទី​របស់​តំណាងរាស្ត្រ​ក្នុងការ​ធ្វើជា​ស្ពាន​ចម្លង​វប្បធម៌ សន្តិ​សហ​វិជ្ជមាន និង​ការបែងចែក​ផលប្រយោជន៍​សេដ្ឋកិច្ច​ប្រកបដោយ​បរិ​យាប​ន្នជារឿងចាំបាច់ដែលត្រូវជំរុញ។​

​ឯកឧត្ដម​អ្នកនាំពាក្យ​ព្រឹទ្ធសភា​បាន​បន្ថែមថា ​ស្ថាប័ន​នីតិប្បញ្ញត្ដិ ​បាន​ចូលរួមចំណែកយ៉ាងសំខាន់​នៅក្នុង​ការពង្រីក​នូវ​កិត្យានុភាព ​ក៏ដូចជា​ទំនាក់ទំនង​របស់​កម្ពុ​ជា​នៅលើ​ឆាក​អន្ដរជាតិ។ ​ឯកឧត្ដម​បាន​សង្កត់​ធ្ងន់​ថា​៖ «​នេះ​គឺជា​ការឆ្លុះបញ្ចាំង​យ៉ាងច្បាស់ និង​ស្របទៅនឹង​ទិសដៅ​របស់​ សម្ដេច​តេ​ជោ​ប្រធានព្រឹទ្ធសភា​សម្រាប់​បរិបទ​នៅក្នុង​ប្រទេស​កម្ពុជា ក្នុងការ​ចូលរួមចំណែក​ក្នុង​ព្រឹ​ត្ដិ​ការណ៍​ជា​ប្រ​វ​ត្ដិ​សាស្ដ្រ​​នេះ​»​។​

​សម្តេច​អគ្គមហាសេនាបតី​តេ​ជោ ហ៊ុន សែន ប្រធានព្រឹទ្ធសភា​នៃ​ព្រះរាជាណាចក្រ​កម្ពុជា​ គឺជា​តួអង្គ​យុទ្ធសាស្ត្រ និងជា​អ្នក​ផ្តួចផ្តើម​ដ៏​សំខាន់បំផុត​ក្នុងការ​បង្កើតឱ្យមានសន្និសីទ​ប្រធានសភា​នៃ​អន្តរ​សភា​លើក​ទី​២(ISC-2) នេះ​ឡើង​នៅលើ​ទឹកដី​កម្ពុជា​។​ កិច្ចប្រជុំ ISC-2 នេះ​កើតឡើង​ពី​កិច្ចពិភាក្សា​ និង​ការយល់ព្រម​របស់​សម្តេច​តេ​ជោ ហ៊ុន សែន តប​តាម​ការស្នើសុំ​របស់​ប្រធានព្រឹទ្ធសភា​នៃ​សាធារណរដ្ឋ​អ៊ីស្លាម ប៉ា​គី​ស្ថាន​កាលពីដើមឆ្នាំ​២០២៦​។ តាមរយៈ​បទពិសោធ​នយោបាយ ​និង​ការទូត​រាប់​ទសវត្សរ៍ សម្តេច​តេ​ជោ​បានប្រែក្លាយ​គំនិត​ផ្តួចផ្តើម​នេះ​ឱ្យទៅជា​ព្រឹត្តិការណ៍​អន្តរជាតិ​ផ្ដុំ​ដោយ​មេដឹកនាំ​សភា​នៃ​ប្រ​ទេស​ជិត ៥០ មកជួបជុំ​គ្នា​នៅ​ភ្នំពេញ។ សម្តេច​តេ​ជោ​មាន​ចក្ខុវិស័យ​ច្បាស់លាស់​ថា​​​ស្ថាប័ន​នីតិប្បញ្ញត្ដិ (​ទាំង​ព្រឹទ្ធសភា និង​រដ្ឋសភា​) មិន​មែនមាន​តួនាទី​ត្រឹមតែ​អនុម័ត​ច្បាប់​ក្នុងស្រុក​នោះទេ ប៉ុន្តែ​ត្រូវតែ​ដើរតួ​ជាកម្លាំងចលករ​ដ៏​សកម្ម​ក្នុងការ​តាក់តែង​គោលនយោបាយ និង​ដោះស្រាយ​វិបត្តិ​សកលលោក។ ការជំរុញ​ឱ្យមានកិច្ចប្រជុំ​នេះ​គឺ​ដើម្បី​បង្កើត​វេទិកា​អន្តរ​ភាសា​មួយ​ដ៏​រឹងមាំ ដែល​អនុញ្ញាត​ឱ្យអំណាច​នីតិប្បញ្ញត្តិ​អាចជួយ​បំពេញបន្ថែម​គាំទ្រ និង​ជំរុញ​ឱ្យ​ការទូត​របស់​រដ្ឋាភិបាល​កាន់​តែមាន​ប្រសិទ្ធភាព និង​មាន​ទម្ងន់​លើ​ឆាក​អន្តរជាតិ ។ ក្នុងនាម​ជា​មគ្គុទ្ទេសក៍​ឯក​ដែល​បាន​នាំមក​នូវ​សន្តិភាព​ពេញលេញ​នៅ​កម្ពុជា សម្តេច​តេ​ជោ​បានរៀបចំ​ប្រធានបទ​ស្នូល​ផ្ដោតលើ «​សាមគ្គីភាព​ដើម្បី​សន្តិភាព និង​វិបុលភាព​រួម​» ដើម្បី​ចែករំលែក​បទពិសោធនៃ​ការចរចា និង​ការដោះស្រាយ​ជម្លោះ​ដោយ​សន្តិវិធី ទៅកាន់​ពិភព​លោក។ 

​វត្តមាន​ដ៏​កុះករ​របស់​គណៈប្រតិភូ​មកពី​ប្រទេស​ជាច្រើននៅទូទាំងពិភពលោក ​ក្នុងនោះមាន ​ប្រធានសភា និង​អនុ​ប្រធានសភា​នៃ​ប្រទេស​ជា​សមាជិក និង​អ្នកជំនាញ​ផ្នែក​តាក់តែង​ច្បាប់​មកពី​តំបន់​អាស៊ី​ប៉ាស៊ីហ្វិក អឺរ៉ុប មជ្ឈិមបូព៌ា និង​បណ្តា​ប្រទេស​សំខាន់ៗ​ជុំវិញ​ពិភពលោក តំណាង​មកពី​អង្គការ​សភា​នានា ​ដូចជា​មហាសន្និបាត​អន្តរ​សភា​អាស៊ាន (AIPA) និង​សហភាព​អន្តរ​សភា (IPU) ជាដើម ​តំណាង​មកពី​ស្ថាប័ន​ក្រោម​ឱវាទ​នៃ​អង្គការសហប្រជាជាតិ (UN) និង​អង្គការ​មិនមែន​រដ្ឋាភិបាល​អន្តរជាតិ​ដែល​ដើរតួ​ជា​អ្នកសង្កេតការណ៍ និង​ជាអ្នកផ្តល់​ធាតុ​ចូល​លើ​ប្រធានបទ​សន្តិភាព និង​ចីរភាព គឺជា​ចំណុច​ស្នូល​ដ៏​សំខាន់បំផុត​ដែល​បញ្ជាក់​ពី​ឥទ្ធិពល​និងជោគជ័យ​នៃ​សន្និសីទ​ប្រធានសភា​នៃ​អន្តរ​សភា​លើក​ទី​២ (ISC-2) នៅកម្ពុជា។ វត្តមាន​របស់​ប្រតិភូ​អន្តរជាតិ​ដ៏​ច្រើន​កុះករ​ដែល​នឹង​ស្នាក់នៅ និង​ប្រជុំ​ដោយ​សុវត្ថិភាព នៅ​ភ្នំពេញ​គឺជា​យុទ្ធនាការ​ផ្សព្វផ្សាយដ៏​មាន​ឥទ្ធិពល​បំផុត​ទៅកាន់​ពិភពលោក​អំពី ​«​សុខសន្តិភាព និង​ស្ថិរភាព​នយោបាយ​» ជាក់ស្តែង​របស់​កម្ពុជា។​

​សន្និសីទ​ប្រធានសភា​នៃ​អន្តរ​សភា​លើក​ទី​២ (ISC-2)នៅ​រាជធានី​ភ្នំពេញគឺ​ជា​ព្រឹត្តិការណ៍​ជា​ប្រវត្តិសាស្ត្រ​មិន​ត្រឹមតែ​បង្ហាញ​ពី​សមត្ថភាព​ដឹកនាំ​ដ៏​ខ្ពង់ខ្ពស់​របស់​កម្ពុជា​ប៉ុណ្ណោះ ទេ ​ប៉ុន្តែ​ថែមទាំង​បាន​បន្សល់ទុក​នូវ កេរដំណែល​នយោបាយ​ការទូត​ដ៏​មានតម្លៃ​សម្រាប់​ជាតិ​ទៅ​ថ្ងៃ​អនាគត។ កិច្ចប្រជុំ​នឹង​អនុម័ត​លើ «​សេចក្តីថ្លែងការណ៍​ភ្នំពេញ​» ដែលជា​ឯកសារ​យុទ្ធសាស្ត្រ​រួមមួយស្តីពី ការប្តេជ្ញាចិត្ត​ពង្រឹង​យន្តការ​ពហុភាគី​និ​យម ​និង​លើកកម្ពស់​តួនាទី​ការ​ទូត​សភា​ក្នុងការ​ដោះស្រាយ​ទំនាស់​ដោយ​សន្តិវិធី។ 

ឯកសារ​ប្រវត្តិសាស្ត្រ​នេះ​នឹងត្រូវ​យកទៅ​ប្រើប្រាស់​ជា​មូលដ្ឋានគ្រឹះ និង​ជា​ត្រីវិស័យ​សម្រាប់​សភា​នៃ​ប្រទេស​ជិត ៥០ ក្នុងការតាក់តែង​គោលនយោបាយ​គាំទ្រ​សន្តិភាព និង​ច្បាប់​អន្តរជាតិ​ទូទាំង​សកលលោក ។ ជោគជ័យ​នៃ​កិច្ចប្រជុំ​នេះ​នឹង​ជួយ​ឱ្យ​កម្ពុជា​ពង្រឹង​ខ្លួន ពី​ប្រទេស​ដែល​ធ្លា​ប់រង​សង្គ្រាម​ទៅជា «មជ្ឈមណ្ឌល​ការទូត និងការចរចា​សន្តិភាព​ដ៏​គួរឱ្យ​ទុកចិត្ត» មួយ​នៅ​ទ្វីបអាស៊ី។ ​ព្រឹត្តិការណ៍​នេះ​បាន​លើកកម្ពស់​មុខមាត់​រប​ស់​ស្ថាប័ន​នីតិប្បញ្ញត្តិ​កម្ពុជា ​ក្រោម​ការដឹកនាំ​របស់ ​សម្តេច​តេ​ជោ ហ៊ុន សែន ឱ្យ​កាន់​តែមាន​ឥទ្ធិពល​លើឆាក​អន្តរជាតិ៕

​ដោយ បាន ច័ន្ទ​តារា​រិ​ទ្ធ​

​