AKP បន្ទាយមានជ័យថ្ងៃទី៤ខែសីហាឆ្នាំ២០២៦--រដ្ឋបាលខេត្តបន្ទាយមានជ័យ នៅព្រឹកថ្ងៃអង្គារ ទី៤ ខែសីហា ឆ្នាំ២០២៦ នេះ បានរៀបចំកិច្ចប្រជុំផ្សព្វផ្សាយសេច ក្ដីណែនាំស្ដីពី «ការរៀបចំ និងកសាងកម្មវិធីវិនិយោគបីឆ្នាំរំកិល (២០២៧- ២០២៩)» ដើម្បីតម្រង់ទិស និងបង្កើនប្រសិទ្ធភាពក្នុងការរៀបចំផែនការអភិវឌ្ឍន៍ខេត្ត ឲ្យចំគោលដៅ និងឆ្លើយតបបានកាន់តែល្អប្រសើរទៅនឹងតម្រូវការចាំបាច់របស់ប្រជាពលរដ្ឋនៅមូលដ្ឋាន។

កិច្ចប្រជុំនេះបានប្រព្រឹត្តទៅនៅសាលប្រជុំ (ក) សាលាខេត្តបន្ទាយមានជ័យ ក្រោមអធិបតីភាព លោក ឈឿន ក្រៃយ៉ុង អភិបាលរងខេត្ត តំណាង ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ដោយមានការអញ្ជើញចូលរួមពីសំណាក់ ឯកឧត្តម លោកជំទាវ សមាជិកក្រុមប្រឹក្សាខេត្ត លោក- លោកស្រី នាយករងរដ្ឋបាល ប្រធាន-អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបីប្រភេទ អភិបាលក្រុង-ស្រុក ព្រមទាំងមន្ត្រីជំនាញពាក់ព័ន្ធជាច្រើនរូប។

ក្នុងឱកាសនោះ លោក ឈឿន ក្រៃយ៉ុង បានមានប្រសាសន៍ គូសបញ្ជាក់យ៉ាងស៊ីជម្រៅអំពីសារៈសំខាន់នៃ «កម្មវិធីវិនិយោគបីឆ្នាំរំកិល» ដែលជាឧបករណ៍ផែនការយុទ្ធសាស្ត្រដ៏សំខាន់ ក្នុងការបែងចែកធនធាន និងគៀរគរថវិកា ដើម្បីអភិវឌ្ឍសេដ្ឋកិច្ច-សង្គម និងហេដ្ឋារចនាសម្ព័ន្ធក្នុងខេត្តឲ្យមានចីរភាព។

លោកអភិបាលរងខេត្ត បានផ្ដល់អនុសាសន៍ណែនាំ និងក្រើនរំលឹកដល់មន្ទីរ អង្គភាព និងអាជ្ញាធរក្រុង-ស្រុកទាំងអស់ នូវចំណុចគន្លឹះសំខាន់ៗមួយចំនួនត្រូវយកចិត្តទុកដាក់ ការរៀបចំគម្រោងវិនិយោគនីមួយៗ ត្រូវសិក្សាស្រាវជ្រាវ និងដកស្រង់ចេញពីបញ្ហាប្រឈម ឬតម្រូវការជាក់ស្តែងរបស់ប្រជាពលរដ្ឋនៅមូលដ្ឋានជាចម្បង ចៀសវាងការធ្វើផែនការដែលមិនឆ្លើយតបនឹងសេចក្តីត្រូវការចំពោះមុខ។

គ្រប់មន្ទីរ-អង្គភាពជំនាញ ត្រូវធ្វើការជិតស្និទ្ធជាមួយអាជ្ញាធរក្រុង-ស្រុ ក-ឃុំ-សង្កាត់ ដើម្បីចៀសវាងការរៀបចំគម្រោងជាន់គ្នា និងដើម្បីធានាថា គ្រប់គម្រោងទាំងអស់ត្រូវបានបញ្ចូលទៅក្នុងផែនការរួមរបស់ខេត្តយ៉ាងមានប្រសិ ទ្ធភាព។

ត្រូវចាត់ថ្នាក់គម្រោងអាទិភាពខ្ពស់ដែលជះឥទ្ធិពលវិជ្ជមានខ្លាំងដល់ជីវភាព រស់នៅ ការលើកកម្ពស់សេដ្ឋកិច្ច និងការកាត់បន្ថយភាពក្រីក្ររបស់ប្រជាពលរដ្ឋ។ ការកសាង និងអនុវត្តកម្មវិធីវិនិយោគ ត្រូវប្រកាន់ខ្ជាប់នូវគោលការណ៍ច្បាប់ លិខិតបទដ្ឋានគតិយុត្ត និងការគ្រប់គ្រងថវិកាឲ្យមានតម្លាភាព ដើរទន្ទឹមនឹងការតាមដាន វាយតម្លៃផលប៉ះពាល់ជាប្រចាំ។

លោក ឈឿន ក្រៃយ៉ុង ក៏បានជំរុញឱ្យតំណាងមន្ទីរ-អង្គភាព និងមន្ត្រីជំនាញពាក់ព័ន្ធទាំងអស់ យកចិត្តទុកដាក់ស្តាប់ការផ្សព្វផ្សាយ និងសេចក្តីណែនាំបច្ចេកទេសក្នុងកិច្ចប្រជុំនេះ ដើម្បីយកទៅអនុវត្តរៀបចំឯកសារគម្រោងវិនិយោគបីឆ្នាំរំកិល (២០២៧-២០២៩) របស់អង្គភាពខ្លួន ឲ្យបានត្រឹមត្រូវ គ្រប់ជ្រុងជ្រោយ និងទាន់ពេលវេលាដែលបានកំណត់៕

ដោយ ៖ឈុនសារ៉ាត