AKP ភ្នំពេញ ថ្ងៃទី០៤ ខែសីហា ឆ្នាំ២០២៦ -- រដ្ឋជាសមាជិកអង្គការOPEC+ ចំនួនប្រាំពីរ បានសម្រេចចិត្តកាលពីពេលថ្មីៗនេះ ដើម្បីបង្កើនកូតាផលិតកម្មប្រេងរបស់ពួកគេចំនួន ១៨៨.០០០បារ៉ែលក្នុងមួយថ្ងៃនៅក្នុងខែកញ្ញា ដែលជាដំណាក់កាលចុងក្រោយនៃការបន្ធូរបន្ថយការកាត់បន្ថយដោយស្ម័គ្រចិត្តដែលបានធ្វើឡើងនៅឆ្នាំ២០២៣។

អ្នកជំនាញបានណែនាំថា សម្ព័ន្ធភាពនេះទំនងជានឹងបន្តបង្កើនកូតាដោយបរិមាណប្រចាំខែតិចតួច (ប្រហែល ២០០.០០០ ទៅ២៣០.០០០បារ៉ែលក្នុងមួយថ្ងៃ) ដើម្បីលើកកម្រិតផលិតកម្មបន្តិចម្តងៗដោយមិនបង្កឱ្យមានការភ័យស្លន់ស្លោក្នុងទីផ្សារភាគហ៊ុន ឬការប្រែប្រួលតម្លៃខ្លាំង។

បច្ចុប្បន្ននេះ ជម្លោះនៅមជ្ឈិមបូព៌ាដែលកំពុងបន្ត និងការបិទច្រកសមុទ្រហ័រមុស បានរារាំងរដ្ឋជាសមាជិកជាច្រើននៅមជ្ឈិមបូព៌ាពីការផលិតនៅជិតកូតាដែលបានបែងចែករបស់ពួកគេ។ ទោះជាយ៉ាងណាក៏ដោយ អ្នកវិភាគបានពន្យល់ថា ការពង្រីកកូតាឥឡូវនេះ គឺជាការរៀបចំជាយុទ្ធសាស្ត្រ ដែលនៅពេលដែលស្ថិរភាពក្នុងតំបន់ត្រឡប់មកវិញ ហើយការដឹកជញ្ជូនតាមផ្លូវសមុទ្របើកឡើងវិញ ប្រទេសទាំងនេះនឹងអាចបង្កើនផលិតកម្មដើម្បីទាមទារចំណែកទីផ្សារឡើងវិញ និងទូទាត់សងការខាតបង់ថ្មីៗដោយមិនធ្វើឱ្យទីផ្សារពិភពលោកភ្ញាក់ផ្អើលភ្លាមៗនោះទេ។

ក្នុងរយៈពេលខ្លី អ្នកវិភាគទីផ្សារបានកត់សម្គាល់ថា ការផ្គត់ផ្គង់ប្រេងឆៅនៅតែទាបជាងកម្រិតគោលដៅរបស់អង្គការ OPEC+ ដែលធ្វើឱ្យតម្លៃប្រេងឆៅ Brent មានការគាំទ្រយ៉ាងខ្លាំងលើសពី ៨០ដុល្លារអាម៉េរិកក្នុងមួយបារ៉ែល ដោយសារតែហានិភ័យនៃការដឹកជញ្ជូនជាបន្តបន្ទាប់តាមរយៈច្រកសមុទ្រហ័រមុស និងច្រកសមុទ្របាបអ៊ែល-ម៉ាន់ដេប។ ការបង្កើនកម្រិតផលិតកម្មនេះក៏ជួយការពារជំហរទីផ្សារនាពេលអនាគតរបស់សមាជិកសម្ព័ន្ធមិត្តដែលនៅសេសសល់ផងដែរ ជាពិសេសនៅក្នុងពន្លឺនៃការចាកចេញពីកិច្ចព្រមព្រៀងរបស់ UAE៕

ដោយ៖ យា ចិន្ដាខន្ដី (ប្រភព៖ តាសស៍)