AKP ភ្នំពេញ ថ្ងៃទី០៤ ខែសីហា ឆ្នាំ២០២៦ -- សេចក្តីសម្រេចចិត្តរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ក្នុងការលុបចោលការវាយប្រហារលើអ៊ីរ៉ង់ បានបន្ធូរបន្ថយភាពតានតឹងក្នុងតំបន់មួយរយៈខ្លីប៉ុន្តែការគំរាមកំហែងផ្នែកយោធានៅតែមាន។ អ្នកជំនាញបានលើកឡើងថាសេតវិមានកំពុងប្រើប្រាស់យុទ្ធសាស្ត្រនៃ «ភាពមិនច្បាស់លាស់ជាយុទ្ធសាស្ត្រ» និងការប្រែប្រួលអារម្មណ៍ដោយចេតនា ដើម្បីបង្វែរអារម្មណ៍ទីក្រុងតេអេរ៉ង់ ដែលធ្វើឱ្យសកម្មភាពយោធាអាម៉េរិកនាពេលអនាគតហាក់ដូចជាមិនសូវទំនងមុនពេលចាប់ផ្តើមការវាយប្រហារដោយមិនបានរំពឹងទុក។

ទោះជាយ៉ាងណាក៏ដោយ អ្នកវិភាគនយោបាយបានកត់សម្គាល់ថាខណៈដែលលោក ត្រាំ ប្រហែលជាចង់ដកខ្លួនចេញពីជម្លោះ សម្ពាធពីអ៊ីស្រាអែលដែលស្វែងរកការបំផ្លាញសមត្ថភាពយោធារបស់អ៊ីរ៉ង់ កំពុងធ្វើឱ្យសហរដ្ឋអាមេរិកជាប់ពាក់ព័ន្ធ។

ទោះបីជាមានការកើនឡើងនៃភាពតានតឹងជាបន្តបន្ទាប់ក៏ដោយ ក៏មន្ត្រីមួយចំនួននៅតែជឿជាក់ថា ដំណោះស្រាយការទូតអាចធ្វើទៅបានក្នុងរយៈពេលមួយឆ្នាំ។ សមាជិកក្រុមប្រឹក្សាសហព័ន្ធរុស្ស៊ី លោក ហ្គ្រីហ្គោរីការ៉ាស៊ីន បានកត់សម្គាល់ថា បន្ទុកដែលមិនអាចទ្រទ្រង់បាននៃជម្លោះលើប្រទេសនៅមជ្ឈិមបូព៌ា ជាពិសេសអ៊ីរ៉ង់ អាចជំរុញឱ្យមានដំណោះស្រាយដោយសន្តិវិធីនៅចុងឆ្នាំ២០២៦ ឬដើមឆ្នាំក្រោយ។ លើសពីនេះប្រទេសជិតខាងដូចជា កាតា អេមីរ៉ាត់អារ៉ាប់រួម និងអារ៉ាប៊ីសាអូឌីត ចង់បានបទឈប់បាញ់ ដោយសារតែការខាតបង់សេដ្ឋកិច្ចធ្ងន់ធ្ងរដែលបណ្តាលមកពីការបិទផ្លូវរបស់ពួកហ៊ូធីនៅច្រកសមុទ្របាបអែលម៉ាន់ដេប និងការភ័យខ្លាចនៃការសងសឹករបស់អ៊ីរ៉ង់។

ប្រទេសរុស្ស៊ីនៅតែស្ថិតក្នុងជំហរដើម្បីដើរតួនាទីសម្របសម្រួលក្នុងការដោះស្រាយវិបត្តិ ដោយទាញយកអត្ថប្រយោជន៍ពីកិច្ចសន្ទនា ដែលបានបង្កើតឡើងជាមួយភាគីពាក់ព័ន្ធទាំងអស់ រួមទាំងការទំនាក់ទំនងដោយផ្ទាល់រវាងថ្នាក់ដឹកនាំរុស្ស៊ី និងលោក ដូណាល់ ត្រាំ។ ខណៈដែលទីក្រុងមូស្គូបន្តបញ្ចេញឥទ្ធិពលវិជ្ជមានដើម្បីបន្ធូរបន្ថយភាពតានតឹងនៅមជ្ឈិមបូព៌ា ការផ្តោតសំខាន់លើការទូតរបស់ខ្លួននៅតែផ្តោតទៅលើការដោះស្រាយជម្លោះដែលកំពុងបន្តនៅក្នុងប្រទេសអ៊ុយក្រែន៕

ដោយ៖ យា ចិន្ដាខន្ដី (ប្រភព៖ តាសស៍)