AKP ភ្នំពេញ ថ្ងៃទី០៤ ខែសីហា ឆ្នាំ២០២៦ -- អ្នកនាំពាក្យក្រសួងការបរទេសអ៊ីរ៉ង់ លោក អេស្មាអ៊ីល បាហ្គាអ៊ី (Esmaeil Baghaei) បានមានប្រសាសន៍កាលពីថ្ងៃចន្ទថា ការចរចារវាងប្រទេសអ៊ីរ៉ង់ និងអូម៉ង់ ផ្តោតលើការឈានដល់កិច្ចព្រមព្រៀងមួយ ស្តីពីការកំណត់ផ្លូវ «បណ្ដោះអាសន្ន»ដើម្បីធានាសុវត្ថិភាពនៃការដឹកជញ្ជូនទំនិញនៅក្នុងច្រកសមុទ្រហ័រមូស។

លោក បាហ្គាអ៊ី បានថ្លែងនៅក្នុងសន្និសីទសារព័ត៌មានប្រចាំសប្តាហ៍មួយនៅទីក្រុងតេអេរ៉ង់ថា «ការចរចាត្រូវបានផ្តោតលើគំនិតដែលថា ផ្លូវភាគខាងត្បូងឆ្លងកាត់ដែនទឹករបស់ប្រទេសអូម៉ង់ និងផ្លូវភាគខាងជើងដែលឆ្លងកាត់ដែនទឹករបស់ប្រទេសអ៊ីរ៉ង់ នឹងប្រែក្លាយទៅជាផ្លូវកម្រិតមធ្យម»។

លោកបាននិយាយថា ការចរចានេះផ្តោតលើច្រករបៀងទៅមកមិនមែនផ្លូវពីរ ឬបីដាច់ដោយឡែកពីគ្នានោះទេ ហើយផ្លូវកម្រិតមធ្យមនឹងត្រូវបានប្រើប្រាស់ជាបណ្តោះអាសន្ន រហូតដល់ផ្លូវអចិន្ត្រៃយ៍មួយត្រូវបានបញ្ចប់។

លោក បាហ្គាអ៊ី បានមានប្រសាសន៍ថា ការបិទផ្លូវទឹកនេះមិនមែនបណ្តាលមកពីភាពខុសគ្នារវាងអ៊ីរ៉ង់ និងអូម៉ង់នោះទេ ប៉ុន្តែមកពី«ការឈ្លានពានយោធា» របស់សហរដ្ឋអាមេរិក-អ៊ីស្រាអែល ប្រឆាំងនឹងអ៊ីរ៉ង់ដោយលោកបានបន្ថែមថា ស្ថានភាពនៃច្រកសមុទ្រនេះនឹងនៅដដែលដរាបណាទីក្រុងវ៉ាស៊ីនតោនបន្តសកម្មភាព «ព្យាបាទ» របស់ខ្លួនប្រឆាំងនឹងប្រទេសនេះ។

យោងតាមទីភ្នាក់ងារសារព័ត៌មានផ្លូវការ IRNA បានឱ្យដឹងថា ថ្លែងនៅក្នុងកិច្ចប្រជុំគណៈរដ្ឋមន្ត្រីមួយនៅទីក្រុងតេអេរ៉ង់កាលពីថ្ងៃអាទិត្យរដ្ឋមន្ត្រីការបរទេសអ៊ីរ៉ង់ លោក សេយេដ អាប់បាស់ អារ៉ាកជី (Seyed Abbas Araghchi) បាននិយាយថា ការចរចារវាងអ៊ីរ៉ង់ និងអូម៉ង់កំពុងស្ថិតក្នុងដំណាក់កាលចុងក្រោយ។

លោក បាហ្គាអ៊ី ក៏បាននិយាយនៅក្នុងសន្និសីទសារព័ត៌មានផងដែរថាប្រទេសនេះនឹងចាត់វិធានការចាំបាច់គ្រប់យ៉ាង ដើម្បីឱ្យអ៊ុយក្រែនទទួលខុសត្រូវចំពោះការវាយប្រហារថ្មីៗនេះលើនាវាអ៊ីរ៉ង់។

នៅថ្ងៃទី២៥ ខែកក្កដា ប្រធានាធិបតីអ៊ុយក្រែន លោក វូឡូឌីមៀ ហ្សេលេនស្គី (Volodymyr Zelensky) បាននិយាយថា កងកម្លាំងប្រទេសរបស់លោកបានវាយប្រហារនាវាចម្បាំងរុស្ស៊ី និងនាវាដែលប្រើសម្រាប់ដឹកជញ្ជូនទំនិញយោធាដែលមានទំនាក់ទំនងជាមួយអ៊ីរ៉ង់នៅក្នុងសមុទ្រកាសព្យែន។

អ៊ីរ៉ង់បានរឹតបន្តឹងការគ្រប់គ្រងរបស់ខ្លួនលើច្រកសមុទ្រនៅថ្ងៃទី២៨ខែកុម្ភៈ ដោយហាមឃាត់ការឆ្លងកាត់ដោយសុវត្ថិភាពនៃនាវាដែលជាកម្មសិទ្ធិរបស់ ឬជាប់ពាក់ព័ន្ធជាមួយអ៊ីស្រាអែល និងសហរដ្ឋអាមេរិក បន្ទាប់ពីការវាយប្រហាររួមគ្នារបស់ពួកគេលើទឹកដីអ៊ីរ៉ង់៕

ដោយ៖ មូល មិនា (ប្រភព៖ ស៊ីនហួ)