AKP ភ្នំពេញ ថ្ងៃទី៤ ខែសីហា ឆ្នាំ២០២៦–យោងតាមកិច្ចសហប្រតិបត្តិការរវាងក្រសួងអប់រំ យុវជន និងកីឡា ជាមួយធនាគារអភិវឌ្ឍន៍អាស៊ី (ADB) ក្រោមគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC)។ ក្រសួងអប់រំ យុវជន និងកីឡា តាមរយៈគម្រោងមធ្យមសិក្សាសម្រាប់ការប្រកួតប្រជែងមូលធនមនុស្ស (SE4HC) នឹងធ្វើការជ្រើសរើសបេក្ខភាពដើម្បីទទួលអាហារូបករណ៍សិក្សាថ្នាក់បរិញ្ញាបត្រជាន់ខ្ពស់ដល់គ្រូឧទ្ទេស បុគ្គលិកអប់រំនៅវិទ្យាស្ថានជាតិអប់រំពិសេស ឬគណៈគ្រប់គ្រងចំនួន ០២កន្លែង ទៅសិក្សានៅសាកលវិទ្យាល័យក្នុងប្រទេស ជប៉ុន កូរ៉េ ឥណ្ឌា ឥណ្ឌូនេស៊ី ឬម៉ាឡេស៊ី សម្រាប់ឆ្នាំ២០២៧ តាមលក្ខខណ្ឌដូចតទៅ៖ មានសញ្ជាតិខ្មែរ អាយុក្រោម ៤៥ឆ្នាំ (គិតត្រឹមថ្ងៃទី០១ ខែមករា ឆ្នាំ២០២៧) មានសញ្ញាបត្របរិញ្ញាបត្រ (បរិញ្ញាបត្រអប់រំ ឬអប់រំពិសេសត្រូវបានលើកទឹកចិត្ត) មានសុខភាពល្អ និងអាចបំពេញការសិក្សាបានពេញលេញក្នុងរយៈពេលសិក្សា មានបទពិសោធន៍ធ្វើការលើវិស័យអប់រំពិសេស ឬអប់រំបរិយាបន្នយ៉ាងតិច ០៥ឆ្នាំ បម្រើការងារនៅវិទ្យាស្ថានជាតិអប់រំពិសេស (បេក្ខភាពជាស្ត្រីត្រូវបានលើកទឹកចិត្ត) ក្រោយរៀនចប់ត្រូវមកបម្រើការងារនៅវិទ្យាស្ថានជាតិអប់រំពិសេសឱ្យបានយ៉ាងតិច ០៥ឆ្នាំ។

បេក្ខជនដែលមានបំណងដាក់ពាក្យក្នុងគម្រោងអាហារូបរណ៍នេះ សូមបំពេញសំណុំឯកសារផ្សេងៗ និង ផ្ញើមកកាន់ កញ្ញា មាច សុខជា សមាជិកគណៈកម្មការបច្ចេកទេសវាយតម្លៃបេក្ខភាពទទួលអាហារូបករណ៍ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត តាមរយៈអ៊ីម៉ែល meachsokchea036@gmail.com ចាប់ពីពេលជូនដំណឹង រហូតដល់ថ្ងៃទី២១ ខែកញ្ញា ឆ្នាំ២០២៦ វេលាម៉ោង ៥:០០រសៀល។ សម្រាប់ព័ត៌មានបន្ថែម បេក្ខជនអាចទាក់ទងតាមរយៈទូរស័ព្ទ/តេលេក្រាមលេខ ០៨៨ ៧៧២ ២៩៧៥៕

ដោយ៖ ចាន់ សុភឿន (ប្រភព៖ ក្រសួងអប់រំ)