AKP កំពង់ធំ ថ្ងៃទី២ ខែសីហា ឆ្នាំ២០២៦ --ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងជាអនុប្រធានអចិន្ត្រៃយ៍នៃគណៈកម្មការការពារ ទប់ស្កាត់និងបង្ក្រាបបទល្មើសធនធានធម្មជាតិខេត្តកំពង់ធំ កាលពីថ្ងៃទី១ ខែសីហា ឆ្នាំ២០២៦ បានអញ្ជើញជួបសំណេះសំណាលសាកសួរសុខទុក្ខប្រគល់ភារកិច្ច និងឧបត្ថម្ភស្បៀងអាហារ គ្រឿងឧបភោគបរិភោគទឹកពិសាបរិសុទ្ធ និងប្រេងឥន្ធនៈ ជូនដល់កងកម្លាំងចម្រុះ ការពារទប់ស្កាត់និងបង្ក្រាបបទល្មើសធនធានធម្មជាតិ នៅទីបញ្ជាការស្រាលចំនួន២ គោលដៅ ដែលកំពុងបំពេញភារកិច្ចក្នុងដែនជម្រកសត្វព្រៃបឹងពែរ ស្ថិត​នៅ​ក្នុង​ឃុំ​សសាគ្រាម ស្រុក​ប្រាសាទ​បល្ល័ង្ក​ ខេត្តកំពង់ធំ។

លោក ហួត​ តូ​ មន្ត្រីស្ថាប័នបរិស្ថាន អនុប្រធានទីបញ្ជាការស្រាលប្រចាំ​តំបន់​ជាំ​ក្របីនិងលោក​ កន​ ធីន ​មន្ត្រីស្ថាប័នបរិស្ថាន ប្រចាំការនៅទីបញ្ជាការស្រាលតំបន់ភ្នំ​ប្រង់ស្ថិតនៅក្នុងឃុំសង្គ្រាម ស្រុកប្រាសាទបល្ល័ង្កបានឡើងរាយការណ៍អំពីលទ្ធផលសំខាន់ៗមួយចំនួន ដែលទីបញ្ជាការស្រាលសម្រេចបានក្នុងរយៈពេលកន្លងទៅ និងបានបញ្ជាក់ជូនអំពីបញ្ហាប្រឈមមួយចំនួនក្នុងការអនុវត្តភារកិច្ច និងបានសំណូមពរ​នូវ​បញ្ហា​មួយ​ចំនួន​ជូនដល់គណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំនិងស្ថាប័នពាក់ព័ន្ធដើម្បីធ្វើការដោះស្រាយ។

ឧត្តមសេនីយ៍ទោ សោម ស៊ុន បានថ្លែងនូវការកោតសរសើរចំពោះកងកម្លាំងចម្រុះទាំងអស់ដែលបានសហការគ្នាបានល្អក្នុងការបំពេញភារកិច្ចតាមបទបញ្ជារបស់ឯកឧត្តម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ដោយក្នុងរយៈពេលកន្លងទៅនេះ​ កងកម្លាំងចម្រុះរបស់យើង បានខិត​ខំ​បប្រឹងប្រែងទប់ស្កាត់ការពារនិងបង្ក្រាបបទល្មើសកាប់ទន្ទ្រានព្រៃឈើរបស់រដ្ឋយកដីធ្វើជាកម្មសិទ្ធិក្នុងដែនជម្រកសត្វព្រៃបឹងពែរទទួលបានលទ្ធផលល្អប្រសើរគួរជាទីមោទនៈដោយគ្មានការលួចកាប់ទន្ទ្រានជាថ្មី ហើយដីព្រៃឈើដែលបានលួចកាប់ទន្ទ្រានបណ្ដាឆ្នាំកន្លងទៅបានដុះលូតលាស់ព្រៃឈើធម្មជាតិឡើងវិញជាបណ្ដើរៗហើយ។

ឧត្តមសេនីយ៍ទោ សោម ស៊ុន បានប្រគល់ភារកិច្ចដល់កងកម្លាំងចម្រុះទាំងអស់ត្រូវបន្តរួមគ្នាការពារព្រៃឈើ ដែលជាធនធានធម្មជាតិក្នុងដែនជម្រកសត្វព្រៃបឹងពែរឱ្យបានដោយត្រូវប្រើប្រាស់កងកម្លាំងយាមល្បាតជាប្រចាំ មិនឱ្យមានការលួចកាប់ព្រៃឈើដែលជាធនធានធម្មជាតិយកដីរបស់រដ្ឋធ្វើជាកម្មសិទ្ធិជាថ្មីទៀតបានជាដាច់ខាត។ ជាមួយគ្នានោះដែរ ត្រូវគ្រប់គ្រង ការពារតំបន់មួយចំនួនតូចដែលបានលួចកាប់ទន្ទ្រានក្នុងពេលថ្មីៗកន្លងទៅប្រមាណពី ៣ទៅ៥ហិកតានៅតំបន់ត្រពាំងតាយស់ និងត្រពាំងកន្សែងឱ្យបានល្អ ដើម្បីរក្សាឱ្យព្រៃធម្មជាតិបានដុះលូតឡើងវិញ សម្រាប់​កូន​ចៅ​យើង​នៅ​ជំនាន់​ក្រោយ​ៗទៀត​។

នៅក្នុងឱកាសនោះ ឧត្តមសេនីយ៍ទោ សោម ស៊ុន បាននាំយកនូវស្បៀងអាហារ គ្រឿងឧបភោគបរិភោគ ទឹកពិសាបរិសុទ្ធ និងប្រេងឥន្ធនៈ មួយចំនួន ដែលជាអំណោយរបស់ឯកឧត្តមនួនផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ប្រគល់ជូនកងកម្លាំងចម្រុះនៅទីបញ្ជាការស្រាលទាំងពីរគោលដៅដើម្បីបន្តសកម្មភាពក្នុងភារកិច្ចដែលបានប្រគល់ជូនឱ្យទទួលបានជោគជ័យ​ថ្មីៗ​បន្ថែម​ទៀត​៕

ដោយ ស៊ុម វណ្ណា