AKP បន្ទាយមានជ័យ ថ្ងៃទី១ខែសីហាឆ្នាំ២០២៦ -- រាជរដ្ឋាភិបាលតាមរយៈក្រសួងកសិកម្ម រុក្ខាប្រមាញ់ និងនេសាទ នៅតែបន្តជំរុញយ៉ាងសកម្មនូវការកាត់បន្ថយភាពងាយរងគ្រោះ និងការលើកកម្ពស់កម្រិតជីវ ភាពរបស់ប្រជាពលរដ្ឋនៅមូលដ្ឋាន។

ជាក់ស្តែង នារសៀលថ្ងៃទី៣១ ខែកក្ក ដា ឆ្នាំ២០២៦ នេះ កិច្ចប្រជុំពិភាក្សាស្តីពី «វឌ្ឍនភាពនៃការវាយតម្លៃការអនុវត្តគម្រោង EMPOWER» ត្រូវបានរៀបចំឡើងនៅសាលប្រជុំនៃមន្ទីរកសិ កម្ម រុក្ខាប្រមាញ់ និងនេសាទខេត្តបន្ទាយ មានជ័យ ក្រោមអធិបតីភាពរបស់ ឯក ឧត្តម ស្រី វុឌ្ឍីអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានអនុវត្តគម្រោង EMPOWER ប្រចាំក្រុងសិរីសោភ័ណ។

កិច្ចប្រជុំដ៏មានសារៈសំខាន់នេះ ក៏មានការដឹកនាំសម្របសម្រួលដោយ លោកស្រី អន ស៊ីថា ប្រធានស្ដីទីមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ ព្រមទាំងមានការអញ្ជើញចូលរួមពីសំណាក់ លោកអភិបាលរងនៃគណៈអភិបាលក្រុងសិរីសោភ័ណ មន្ត្រីសម្របសម្រួលគម្រោង មន្ត្រីកសិកម្មសង្កាត់ អាជ្ញាធរមូលដ្ឋាន និងតំណាងភូមិ-សង្កាត់គោលដៅចំនួន៣ គឺសង្កាត់កំពង់ស្វាយ សង្កាត់ភ្នៀត និងសង្កាត់ម្កាក់។

ក្នុងឱកាសនោះ ឯកឧត្តម ស្រី វុឌ្ឍី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានលើកឡើងថា គម្រោង EMPOWER មិនមែនគ្រាន់តែជាគម្រោងជំនួយមួយរយៈនោះទេ ប៉ុន្តែជាស្ពានចម្លងដ៏សំខាន់ក្នុងការបង្កើតប្រសិទ្ធភាពសេដ្ឋកិច្ចពិតប្រាកដជូនប្រជាពលរដ្ឋ។ ការវាយតម្លៃនាពេលនេះ គឺដើម្បីធានាថា រាល់សកម្មភាព និងការជ្រើសរើសអ្នកទទួលផលត្រូវតែចំគោលដៅច្បាស់លាស់ តម្លាភាព និងឆ្លើយតបចំតម្រូវការជាក់ស្តែងរបស់អ្នកភូមិ ដើម្បីពង្រឹងភាពធន់របស់ពួកគាត់ទល់នឹងវិបត្តិផ្សេងៗ។ យើងត្រូវរួមគ្នាដោះស្រាយរាល់បញ្ហាប្រឈមចំពោះមុខឱ្យបានទាន់ពេលវេលា ដើម្បីធានាថាគម្រោងនេះសម្រេចបានលទ្ធផលអតិបរមា។

លោកស្រី អន ស៊ីថា ប្រធានស្ដីទីមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យបានបញ្ជាក់ថា មន្ទីរកសិកម្មខេត្ត និងក្រុមការងារបច្ចេកទេស ប្តេជ្ញាចិត្តយ៉ាងមុតមាំក្នុងការសហការជាមួយអាជ្ញាធរដែនដីគ្រប់លំដាប់ថ្នាក់ ដើម្បីជំរុញការអនុវត្តគម្រោង EMPOWER នេះឱ្យដើរទៅមុខដោយរលូន។ យើងនឹងពង្រឹងការផ្តល់ចំណេះដឹង បច្ចេកទេស និងការយល់ដឹងដល់ភាគីពាក់ព័ន្ធទាំងអស់ ជាពិសេសការចុះប្រមូលទិន្នន័យ និងពិនិត្យស្ថានភាពប្រជាពលរដ្ឋនៅតាមសង្កាត់គោលដៅទាំង៣ (កំពង់ស្វាយ ភ្នៀត និងម្កាក់) ឱ្យបានច្បាស់លាស់បំផុត។

នៅក្នុងជំនួបពិភាក្សាយ៉ាងស៊ីជម្រៅនេះ ភាគីពាក់ព័ន្ធបានឯកភាពគ្នាលើរបៀបវា រៈសំខាន់ៗការពិនិត្យវឌ្ឍនភាពវាយ តម្លៃលើលទ្ធផលការងារកន្លងមកក្នុងការលើកកម្ពស់ជីវភាព និងប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះរបស់ប្រជាពលរដ្ឋ។

កម្រិតកំណត់គោលដៅអ្នកទទួលផល ប្រមូលព័ត៌មានបន្ថែម និងកំណត់លក្ខណៈវិនិច្ឆ័យឱ្យបានច្បាស់លាស់ ក្នុងការជ្រើសរើសគ្រួសារទទួលផលពិតប្រាកដពីគម្រោង EMPOWER។ ការបណ្តុះបណ្តាល និងពង្រឹងកិច្ចសហការ ផ្តល់ចំណេះដឹង កសាងសមត្ថភាព និងបង្កើនការយល់ដឹងដល់អាជ្ញាធរមូលដ្ឋាន និងមន្ត្រីអនុវត្តគម្រោង ដើម្បីធ្វើការងារជាប្រព័ន្ធ។ ការដោះស្រាយបញ្ហាប្រឈម លើកយកបញ្ហារាំងស្ទះនាពេលកន្លងមកមកវះកាត់ និងស្វែងរកដំណោះស្រាយរួមគ្នា ដើម្បីធានាថាការអនុវត្តគម្រោងឈានទៅសម្រេចបានតាមគោលដៅដែលបានគ្រោងទុក។

កិច្ចប្រជុំទទួលបានលទ្ធផលផ្លែផ្កាជាវិជ្ជមាន ដោយគ្រប់ភាគីពាក់ព័ន្ធទាំងអស់បានសម្តែងនូវឆន្ទៈខ្ពស់ក្នុងការបន្តសហការគ្នាឱ្យកាន់តែជិតសិទ្ធ ដើម្បីប្រែក្លាយទិសដៅគម្រោង EMPOWER ឱ្យទៅជាផលប្រយោជន៍ជាក់ស្តែងជូនដល់ប្រជាពលរដ្ឋក្នុងក្រុងសិរីសោភ័ណ៕

ដោយ ៖ឈុនសារ៉ាត