AKP ភ្នំពេញ ថ្ងៃទី៣១ ខែកក្កដា ឆ្នាំ២០២៦--ប្រទេសឥណ្ឌាមានការរីកចម្រើនយ៉ាងឆាប់រហ័ស នឹងឈានមុខក្នុងនាមប្រទេសលំដាប់កំពូលនាំចេញ និងប្រើប្រាស់ រថយន្តអគ្គិសនី (EV) នៅលើពិភពលោក។ គិតត្រឹមដើមឆ្នាំ ២០២៥ ប្រទេសឥណ្ឌាមានយានយន្តអគ្គិសនីចុះបញ្ជីប្រើប្រាស់សរុបជាង ៥,៦ លានគ្រឿង ដែលនេះបង្ហាញពីការកើនឡើងយ៉ាងខ្លាំងបើធៀបនឹងឆ្នាំ ២០១៦ ដែលកាលនោះមានត្រឹមតែប្រហែល ៥ ម៉ឺនគ្រឿងប៉ុណ្ណោះ។ គ្រាន់តែនៅក្នុងឆ្នាំ ២០២៤ តែមួយ ការលក់រថយន្តអគ្គិសនី (EV) នៅប្រទេសឥណ្ឌាសម្រេចបានរហូតដល់ ២,០៨ លានគ្រឿង ដែលស្មើនឹងប្រហែល ១១ ភាគរយនៃការលក់ EV សរុបនៅទូទាំងសកលលោក។

ប្រទេសឥណ្ឌាកំពុងតែពន្លឿនការផ្លាស់ប្តូរទៅរកការដឹកជញ្ជូនបែបបៃតង តាមរយៈសមិទ្ធផលសំខាន់ៗដូចជា៖

ការផលិតនិងនាំចេញជាសកល៖ លោកនាយករដ្ឋមន្ត្រី ណារិនដ្រា ម៉ូឌី (Narendra Modi) បានសម្ពោធរថយន្តអគ្គិសនីយុទ្ធសាស្ត្រដំបូងបង្អស់របស់ក្រុមហ៊ុន Suzuki គឺម៉ូដែល "eVITARA" នៅរោងចក្រ Hansalpur ដើម្បីនាំចេញទៅកាន់ជាង ១០០ ប្រទេស។

ម្ចាស់ការលើការផលិតអាគុយ៖ តាមរយៈការសហការគ្នារវាងក្រុមហ៊ុន Toshiba, Denso និង Suzuki ឥណ្ឌាអាចផលិតបន្ទះអេឡិចត្រូតអាគុយ (Hybrid Battery Electrodes)នៅក្នុងស្រុក៨០% ដោយខ្លួនឯង។

គោលដៅបរិស្ថានត្រឹមឆ្នាំ ២០៣០ និង ២០៧០

សន្ទុះនៃការអភិវឌ្ឍនេះ គឺដើម្បីគាំទ្រដល់គោលដៅអាកាសធាតុដ៏ធំរបស់ឥណ្ឌា រួមមាន៖

សម្រេចឱ្យបាននូវការប្រើប្រាស់រថយន្ត EV ឱ្យបាន ៣០% នៃយានយន្តសរុប ត្រឹមឆ្នាំ២០៣០។

កាត់បន្ថយការបំភាយឧស្ម័នកាបូនឱ្យបាន ១ ពាន់លានតោន ត្រឹមឆ្នាំ២០៣០។

កាត់បន្ថយ ការបំភាយឧស្ម័នកាបូន ទាបជាង ៤៥% ត្រឹមឆ្នាំ២០៣០។

សម្រេចគោលដៅអព្យាក្រឹតកាបូន (Net-Zero) ទាំងស្រុងត្រឹមឆ្នាំ ២០៧០។

គិតត្រឹមខែកុម្ភៈ ឆ្នាំ២០២៥ ឥណ្ឌាមានរថយន្តអគ្គិសនីចុះបញ្ជីប្រើប្រាស់ប្រមាណ ៥.៦៧ លានគ្រឿង រួចមកហើយ ក្នុងចំណោមយានយន្តសរុបជិត ៣៩០ លានគ្រឿង។

កំណើនដ៏ខ្លាំងក្លានៃការប្រើប្រាស់ រថយន្តអគ្គិសនី (EV) នេះ គឺត្រូវបានគាំទ្រដោយគំនិតផ្តួចផ្តើម និងគោលនយោបាយរបស់រដ្ឋាភិបាល

ឥណ្ឌា ដូចជា៖

1.   កម្មវិធី FAME (កម្មវិធីជម្រុញការផលិត និងការប្រើប្រាស់យានយន្តអគ្គិសនី និងយានយន្ត Hybrid​ (ហាយប្រើហ្គ ជាប្រភេទយាន្តយន្តប្រើបានទាំងប្រេង និង​ អគ្គីសនី )

2.  កម្មវិធី PLI (ការផ្តល់ការលើកទឹកចិត្តផ្នែកហិរញ្ញវត្ថុដែលផ្សារភ្ជាប់នឹងទិន្នផលផលិតកម្ម)

3.  គម្រោង PM e-Bus Sewa (គម្រោងឡានក្រុងអគ្គិសនីសាធារណៈ)

កម្មវិធីទាំងនេះបានក្លាយជាកាតាលីករ (កម្លាំងជម្រុញ) ក្នុងការទាក់ទាញការវិនិយោគលើហេដ្ឋារចនាសម្ព័ន្ធ EV ការច្នៃប្រឌិតបង្កើតថ្មី និងការស្រាវជ្រាវ ដែលជួយជម្រុញឱ្យឥណ្ឌាខិតទៅជិតគោលដៅរបស់ខ្លួន គឺការសម្រេចឱ្យបាននូវអត្រាប្រើប្រាស់យានយន្តអគ្គិសនីឱ្យបាន ៣០ ភាគរយត្រឹមឆ្នាំ ២០៣០។

រថយន្តអគ្គិសនី (EV) មានការកើនឡើងខ្លាំងពីចំនួន ០,៧ ភាគរយក្នុងឆ្នាំ ២០២០ ទៅ ៦,៣ ភាគរយនៅក្នុងឆ្នាំ ២០២៤  ភាគរយលក់ រថយន្តអគ្គិសនី (EV) សរុបនៅក្នុងប្រទេសឥណ្ឌា ដែលនេះបានឆ្លុះបញ្ចាំងថា បច្ចុប្បន្នអត្រានៃការប្រើប្រាស់ រថយន្តអគ្គិសនី (EV) របស់ឥណ្ឌាបានកើនឡើងលើសពី ៤០ ភាគរយនៃកម្រិតមធ្យមរបស់ពិភពលោកទៅទៀត។ ទីផ្សារ រថយន្តអគ្គិសនី (EV)  របស់ឥណ្ឌាត្រូវបានគេប៉ាន់ប្រមាណថានឹងរីកចម្រើនពី ៥,២២ ប៊ីលានដុល្លារអាមេរិក ក្នុងឆ្នាំ ២០២៤ ទៅដល់ជិត ១៨,៣ ប៊ីលានដុល្លារអាមេរិក ត្រឹមឆ្នាំ ២០២៩។

បន្ថែមពីលើនេះ ប្រទេសឥណ្ឌាក៏បានក្លាយជាប្រទេសឈានមុខគេដែលជាប្រទេសប្រើប្រាស់ ប្រភេទ កង់បី ឬ PassApp អគ្គិសនី ( Three-Wheeler) ច្រើនជាងគេក្នុងសកលលោកដោយក្តោបក្តាប់ចំណែករហូតដល់ ៥៧ ភាគរយនៃការលក់សរុបនៅលើពិភពលោកក្នុងឆ្នាំ ២០២៤។

ប្រទេសឥណ្ឌាបានប្តេជ្ញាថា នឹងសម្រេចឱ្យបាននូវការប្រើប្រាស់ រថយន្តអគ្គិសនី (EV)  ឱ្យបាន ៣០ ភាគរយត្រឹមឆ្នាំ ២០៣០ បង្ហាញពីការយកចិត្តទុកដាក់ខ្ពស់លើការធ្វើដំណើរប្រកបដោយចីរភាព និងសន្តិសុខថាមពល។ ហើយការបន្តផ្តោតយកចិត្តទុកដាក់របស់រដ្ឋាភិបាលលើការគាំទ្រផ្នែកគោលនយោបាយ ការអភិវឌ្ឍហេដ្ឋារចនាសម្ព័ន្ធ (ដូចជាស្ថានីយសាកភ្លើង) និងកិច្ចសហប្រតិបត្តិការរវាងផ្នែករដ្ឋនិងឯកជន គឺពិតជាមានសារៈសំខាន់ណាស់ក្នុងការរក្សា និងជម្រុញសន្ទុះនៃការប្រើប្រាស់ រថយន្តអគ្គិសនី (EV) នេះឱ្យកាន់ទូលំទូលាយទូទាំងប្រទេស។

សរុបសេចក្តីមក៖ ជោគជ័យនៃការបង្កើតរោងចក្រផលិតផ្ទាល់ខ្លួន គួបផ្សំនឹងគោលនយោបាយច្បាស់លាស់របស់រដ្ឋាភិបាល កំពុងតែផ្លាស់ប្តូរប្រព័ន្ធដឹកជញ្ជូនរបស់ឥណ្ឌា ទៅជាបណ្តាញមួយដ៏មានចីរភាព និងត្រៀមខ្លួនរួចជាស្រេចសម្រាប់ពេលអនាគត៕

ដោយ៖ គង់ សិរីរ័ត្ន, ប្រភព៖ ស្ថានទូតឥណ្ឌាប្រចាំព្រះរាជាណាចក្រកម្ពុជា