AKP ភ្នំពេញ ថ្ងៃទី៣១ ខែកក្កដា ឆ្នាំ២០២៦ -- លោក Tom Andrews អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជា ក្នុងសន្និសីទសារព័ត៌មាននៅរាជធានីភ្នំពេញ នាថ្ងៃទី៣១ ខែកក្កដា ឆ្នាំ២០២៦ បានថ្លែងថា នៅពេលលោកបានធ្វើដំណើរទៅកាន់ព្រំដែនកម្ពុជា ថៃ ដើម្បីមើលឃើញផ្ទាល់ពីផលប៉ះពាល់ និងដើម្បី ជួបជាមួយប្រជាពលរដ្ឋរងគ្រោះនៅជំរំដែលជាជម្រកបណ្តោះអាសន្ន អ្វីដែលធ្វើឲ្យលោករំជួលចិត្តនោះគឺត្រង់ថា ជនរងគ្រោះគាត់តែងតែយំរៀបរាប់ប្រាប់លោកអំពីអ្វីដែលពួកគាត់បានបាត់បង់ រៀបរាប់អំពី ភូមិរបស់ពួកគាត់ត្រូវបានគេទម្លាក់គ្រាប់បែក ផ្ទះរបស់ពួកគាត់ត្រូវបានគេឈូសឆាយ ខណៈដែលប្រជាពលរដ្ឋស៊ីវិលប្រមាណជា ៦៥ម៉ឺននាក់បានជម្លៀសចេញពីតំបន់ព្រំដែនកាលពីចុងឆ្នាំកន្លងទៅ ដែលបច្ចុប្បន្ននៅសល់ជាង ២ម៉ឺននាក់ទៀត ដែលមិនទាន់បានវិលត្រឡប់ទៅផ្ទះវិញ ដោយពលរដ្ឋទាំងនេះបាននិយាយប្រាប់លោកថា ពួកគាត់មិនអាចវិលត្រឡប់ទៅផ្ទះវិញបានទេ ដោយសារតែភូមិរបស់គាត់ ដែលជាកន្លែងគាត់រស់នៅគឺកំពុងតែកាន់កាប់ដោយទាហានថៃ។

អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជារូបនេះបានបន្តថា លោកបានធ្វើដំណើរទៅដល់ជាយនៃទីប្រជុំជន ដែលជាទីកន្លែងទាហានថៃដាក់របាំង ដាក់លួសបន្លាដើម្បីរារាំងមិនឲ្យពលរដ្ឋកម្ពុជាមិនអាចទៅផ្ទះរបស់គាត់បាន ដោយលោកបានឃើញផ្ទះទាំងអស់នោះ គឺមានស្នាមធ្លុះធ្លាយ និងអ្វីៗផ្សេងទៀតរងការខូចខាត ហើយថែមទាំងបានឃើញគ្រាប់បែកមួយគ្រាប់ ដែលមិនទាន់ផ្ទុះថែមទៀតផង។ លោកថានេះហើយគឺជាបញ្ហាកង្វល់មួយ ព្រោះយោងតាមច្បាប់អន្តរជាតិគឺពលរដ្ឋភៀសសឹកជន ដែលត្រូវបានជម្លៀសចេញគឺពួកគាត់មានសិទ្ធិក្នុងការវិលត្រឡប់ទៅផ្ទះ របស់ខ្លួនវិញ ជាពិសេសកិច្ចព្រមព្រៀងឈប់បាញ់ នៅថ្ងៃទី២៧ ខែធ្នូ ឆ្នាំ២០២៥ រវាងកម្ពុជា និងថៃ គឺ មានចែងយ៉ាងច្បាស់ថា ជនស៊ីវិលគឺត្រូវបានអនុញ្ញាតឲ្យវិលត្រឡប់ទៅផ្ទះវិញ ដើម្បីប្រកបមុខរបរ ចិញ្ចឹមជីវិតដោយសុវត្ថិភាព និងដោយឥតមានការរារាំងឡើយ។

លោក Tom Andrews បានគូសបញ្ជាក់ថា ជាការចាំបាច់ណាស់ដែលភាគីកម្ពុជា និងថៃត្រូវធ្វើការរួមគ្នា ដើម្បីពន្លឿនការវិលត្រឡប់ទៅផ្ទះវិញជូនពលរដ្ឋភៀសសឹក ព្រោះពួកគាត់ត្រូវការនូវការវិលត្រឡប់ទៅ ផ្ទះរបស់ពួកគាត់វិញ ដោយលោកបានបន្ថែមថា កង្វល់ផ្នែកសិទ្ធិមនុស្សពាក់ព័ន្ធជាមួយនឹងជម្លោះនេះគឺមិនមែនមានត្រឹមតែរឿងការបាត់បង់ទីជម្រកនោះទេ។ ប្រជាជនដែលកំពុងរបស់នៅក្នុងជំរំបានបង្ហាញ ថា ពួកគាត់អត់មានការងារធ្វើទេ ពួកគាត់បានបាត់បង់ទ្រព្យសម្បត្តិ ពួកគាត់មានក្តីបារម្ភខ្លាំងណាស់៕

ដោយ៖ ចាន់ សុភឿន