AKP កំពង់ធំ ខែកក្កដា ឆ្នាំ២០២៦–ក្រសួងបរិស្ថាន និងអង្គការអភិរក្សអន្តរជាតិកម្ពុជា (អង្គការCI) រួមជាមួយអង្គការដៃគូអភិរក្ស សហគមន៍មូលដ្ឋាន និងភាគីពាក់ព័ន្ធ នឹងរួមគ្នាប្រារព្ធទិវាមន្រ្តីឧទ្យានុរក្សឆ្នាំ២០២៦ខាងមុននេះក្រោមប្រធានបទ «មន្រ្តីឧទ្យានុរក្ស៖ អ្នកការពារធម្មជាតិក្នុងបរិបទពិភពលោកដែលកំពុងផ្លាស់ប្តូរ - សុខុមាលភាព និងការប្តេជ្ញាចិត្តដោយសុឆន្ទៈ»។ ពិធីនេះនឹងប្រព្រឹត្តិទៅនៅទីស្នាក់ការព្រះអាទិត្យ ដែលស្ថិតនៅដែនជម្រកសត្វព្រៃព្រៃឡង់ នៃខេត្តកំពង់ធំ នាថ្ងៃទី៣១ ខែកក្កដា ឆ្នាំ២០២៦ ដើម្បីសាទរនិងផ្តល់ការទទួលស្គាល់ចំពោះតួនាទីដ៏សំខាន់របស់មន្រ្តីឧទ្យានុរក្ស ដែលជាកម្លាំងជួរមុខក្នុងការការពារព្រៃឈើ សត្វព្រៃ ជីវៈចម្រុះ និងធនធានធម្មជាតិរបស់កម្ពុជា។
ទិវាមន្រ្តីឧទ្យានុរក្សពិភពលោក ប្រារព្ធជារៀងរាល់ឆ្នាំនៅថ្ងៃទី៣១ ខែកក្កដា ដើម្បីរម្លឹកនិងគោរពដល់ការលះបង់ក្នុងការបំពេញបេសកកម្មរបស់មន្រ្តីឧទ្យានុរក្សនៅទូទាំងពិភពលោក។ នៅកម្ពុជាទិវានេះក៏ជាឱកាសមួយដើម្បីបង្ហាញពីការរួមចំណែករបស់មន្រ្តីឧទ្យានុរក្ស ក្នុងការគ្រប់គ្រងតំបន់ការពារធម្មជាតិ ការទប់ស្កាត់បទល្មើសធនធានធម្មជាតិ ការតាមដានស្រាវជ្រាវជីវៈចម្រុះ ការគ្រប់គ្រងហានិភ័យនៃភ្លើងឆេះព្រៃ ការអប់រំបរិស្ថាន និងការសហការរួមជាមួយសហគមន៍មូលដ្ឋានជាដើម។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន មានប្រសាសន៍ថា៖ «មន្រ្តីឧទ្យានុរក្ស គឺជាអ្នកការពារបេតិកភណ្ឌធម្មជាតិដ៏មានតម្លៃរបស់កម្ពុជា។ ជារៀងរាល់ថ្ងៃ ពួកគាត់បំពេញបេសកកម្មដោយការលះបង់ខ្ពស់ ដើម្បីការពារព្រៃឈើ សត្វព្រៃ និងជីវៈចម្រុះ សម្រាប់ប្រជាពលរដ្ឋ និងមនុស្សជំនាន់ក្រោយ។ ក្នុងបរិបទដែលបញ្ហាបរិស្ថានកំពុងវិវឌ្ឍផ្លាស់ប្តូរឥតឈប់ឈរ ការរួមវិនិយោគលើការគាំទ្រសុខុមាលភាព ការអភិវឌ្ឍសមត្ថភាពនិងការគាំទ្រប្រតិបត្តិការរបស់មន្ត្រីឧទ្យានុរក្ស គឺមានសារៈសំខាន់ក្នុងការសម្រេចចក្ខុវិស័យរបស់កម្ពុជាដើម្បីក្លាយជាប្រទេសអព្យាក្រឹតកាបូននៅឆ្នាំ២០៥០។ ក្នុងឱកាសនេះដែរ ខ្ញុំសូមថ្លែងអំណរគុណយ៉ាងជ្រាលជ្រៅអស់ពីដួងចិត្ត និងគាំទ្រយ៉ាងពេញទំហឹងដល់មន្រ្តីឧទ្យានុរក្សទាំងអស់ ដែលខិតខំបំពេញការងារប្រកបដោយសុឆន្ទៈនៅជួរមុខក្នុងបុព្វហេតុការពារធម្មជាតិ សម្រាប់ជាឧត្តមប្រយោជន៍ដល់កូនចៅយើងជំនាន់ក្រោយៗ។»

កិច្ចការអភិរក្សធម្មជាតិត្រូវបានយកចិត្តទុកដាក់យ៉ាងខ្លាំង ជាក់ស្តែងតំបន់ការពារធម្មជាតិនៅកម្ពុជាត្រូវបានបង្កើតឡើងជាបន្តបន្ទាប់ដោយកើនពី២៣ តំបន់ ក្នុងឆ្នាំ១៩៩៩ ដល់ ៧៣ តំបន់ គិតត្រឹមឆ្នាំ២០២៦នេះ ដែលមានផ្ទៃដីសរុបជាង៧លានហិកតា ស្មើនឹង៣៩ភាគរយនៃផ្ទៃប្រទេស។ តំបន់ទាំងនេះមានសារៈសំខាន់ក្នុងការរក្សាជីវៈចម្រុះ ការផ្តល់សេវាប្រព័ន្ធអេកូឡូស៊ី ការពង្រឹងភាពធន់នឹងការប្រែប្រួលអាកាសធាតុ ការគាំទ្រជីវភាពសហគមន៍ និងការអភិវឌ្ឍសេដ្ឋកិច្ចប្រកបដោយចីរភាព។ ការលើកកម្ពស់សុខុមាលភាព សុវត្ថិភាព អភិវឌ្ឍន៍សមត្ថភាព និងពង្រឹងការប្តេជ្ញាចិត្តរបស់មន្រ្តីឧទ្យានុរក្ស ជាកត្តាចាំបាច់សម្រាប់ការអភិរក្សធនធានធម្មជាតិប្រកបដោយប្រសិទ្ធភាពក្នុងពិភពលោកដែលកំពុងប្រឈមនឹងការប្រែប្រួលអាកាសធាតុ និងបញ្ហាបរិស្ថានដ៏ស្មុគស្មាញ។
ការប្រារព្ធទិវាឧទ្យានុរក្សនាថ្ងៃស្អែកនេះ នឹងមានការចូលរួមពីថ្នាក់ដឹកនាំក្រសួងបិរស្ថាន អាជ្ញាធរខេត្ត មន្រ្តីឧទ្យានុរក្សមកពីតំបន់ការពារធម្មជាតិទូទាំងប្រទេស តំណាងអង្គការដៃគូអភិរក្ស និងសហគមន៍មូលដ្ឋានផងដែរ។ ក្រសួងបរិស្ថាន កំពុងអនុវត្ត យុទ្ធសាស្រ្តចក្រាវិស័យបរិស្ថាន២០២៣-២០២៨ ដើម្បីពង្រឹងការគ្រប់គ្រងតំបន់ការពារធម្មជាតិ លើកកម្ពស់ការចូលរួមរបស់សាធារណជន និងពង្រឹងការយល់ដឹងអំពីការអភិរក្សបរិស្ថាន។ តាមរយៈកិច្ចសហការជាមួយដៃគូអភិវឌ្ឍន៍ អង្គការសង្គមស៊ីវិល សហគមន៍មូលដ្ឋាន និងជនជាតិដើមភាគតិច កម្ពុជាបន្តពង្រឹងការអភិរក្សធនធានធម្មជាតិប្រកបដោយប្រសិទ្ធភាព និងបរិយាបន្ន។

លោក អ៊ុ សូនី នាយកប្រចាំប្រទេសនៃអង្គការអភិរក្សអន្តរជាតិ កម្ពុជា (CI)បានលើកឡើងថា៖ «ភាពជោគជ័យនៃការអភិរក្ស ចាប់ផ្តើមពីសកម្មភាពជាវិជ្ជមានរួមគ្នារបស់មនុស្ស និងធម្មជាតិ។ មន្រ្តីឧទ្យានុរក្ស គឺជាភ្នាក់ងារជួរមុខដ៏សំខាន់មួយក្នុងកិច្ចអភិរក្ស ដោយពួកគាត់បំពេញការងារក្នុងស្ថានភាពដ៏លំបាកដើម្បីរក្សាការពារធម្មជាតិ។ អង្គការCI មានមោទកភាពក្នុងការសហការជាមួយក្រសួងបរិស្ថាន ស្ថាប័ន្ធពាក់ព័ន្ធ ដើម្បីលើកកម្ពស់សុខុមាលភាព និងពង្រឹងសមត្ថភាពមន្រ្តីឧទ្យានុរក្ស ក្នុងការអនុវត្តការងារស្របតាមគោលការណ៍ច្បាប់និងសិទ្ធមនុស្ស ហើយធានាថាតំបន់ការពារធម្មជាតិរបស់កម្ពុជា នឹងបន្តមានធម្មជាតិសម្បូរបែបសម្រាប់មនុស្សជំនាន់ក្រោយ »។
ក្នុងនាមជាដៃគូអភិរក្សយូរអង្វែង អង្គការCI បន្តសហការយ៉ាងជិតស្និទជាមួយក្រសួងបរិស្ថាន សហគមន៍មូលដ្ឋាន ជនជាតិដើមភាគតិច និងដៃគូពាក់ព័ន្ធទាំងអស់ ក្នុងការពង្រឹងការគ្រប់គ្រងតំបន់ការពារធម្មជាតិ អភិរក្សជីវៈចម្រុះ កសាងភាពធន់របស់សហគមន៍ និងលើកកម្ពស់ជីវភាពប្រកបដោយចីរភាព។

អ្នកស្រី ម៉ុន ភ័ស្ត មន្រ្តីឧទ្យានុរក្សស្រ្តី បានរៀបរាប់ដោយឆន្ទៈចំពោះការប្តេជ្ញាចិត្តក្នុងការបំពេញកាត្វកិច្ចក្នុងបុព្វហេតុការពារធម្មជាតិនេះថា៖ «ការងារជាមន្រ្តីឧទ្យានុរក្ស មិនមែនគ្រាន់តែជាអាជីពឬរបរចិញ្ចឹមជីវិតនោះទេ ប៉ុន្តែជាការប្តេជ្ញាចិត្តក្នុងការចូលរួមការពារព្រៃឈើ សត្វព្រៃ និងអនាគតប្រទេសជាតិ និងកូនចៅខ្ញុំ។ ពេលល្បាតម្តងៗយើងជួបបញ្ហាប្រឈមច្រើនដែរ ប៉ុន្តែការណ៍នេះរំលឹកយើងថា អាជីពមួយនេះគឺជាការងារប្រកបដោយកិត្តិយស»។លោកស្រីបន្តថា៖ «ការទទួលស្គាល់ និងការយកចិត្តទុកដាក់ចំពោះសុខុមាលភាពរបស់យើង គឺជាកម្លាំងចិត្តដ៏សំខាន់ក្នុងការបន្តបំពេញបេសកកម្មដោយមោទនភាពដើម្បីធម្មជាតិ និងប្រជាជាតិយើង»៕
ដោយ៖ គង់ សិរីរ័ត្ន, ប្រភព៖ ក្រសួងបរិស្ថាន