AKP ភ្នំពេញ ថ្ងៃទី៣០ ខែកក្កដា ឆ្នាំ២០២៦ -- សភាមីយ៉ាន់ម៉ាបានអនុម័តច្បាប់ប្រឆាំងការឆបោកតាមអនឡាញ ដែលដាក់ចេញនូវការដាក់ទណ្ឌកម្មធ្ងន់ធ្ងរ ការគ្រប់គ្រងហិរញ្ញវត្ថុយ៉ាងឆាប់រហ័ស និងការពង្រីកអំណាចឃ្លាំមើល ខណៈដែលអាជ្ញាធរកំពុងព្យាយាមទប់ស្កាត់ឧស្សាហកម្មឆបោកតាមអនឡាញដែលមានតម្លៃរាប់ពាន់លានដុល្លារអាម៉េរិករបស់ប្រទេសនេះ។

យោងតាមកាសែត Global New Light of Myanmar ដែលគ្រប់គ្រងដោយរដ្ឋ បានឱ្យដឹងថា សេចក្តីព្រាងច្បាប់នេះត្រូវបានអនុម័តកាលពីថ្ងៃអង្គារ ក្នុងអំឡុងពេលសម័យប្រជុំរួមគ្នារបស់សភា Pyidaungsu Hluttaw នៅរដ្ឋធានីណៃពិដោរ។

ប្រធានសភា លោក អ៊ុង លីនដ្វេ បានប្រកាសថា អ្នកតាក់តែងច្បាប់បានអនុម័តច្បាប់នេះទាំងស្រុង បន្ទាប់ពីដោះស្រាយបទប្បញ្ញត្តិដែលមានការខ្វែងគំនិតរវាងសភាទាំងពីរ។

យោងតាមច្បាប់ អាជ្ញាធរត្រូវតែបង្កើតខ្សែទូរស័ព្ទទាន់ហេតុការណ៍និងប្រព័ន្ធដាក់ពាក្យបណ្តឹងតាមអនឡាញរយៈពេល ២៤ម៉ោងសម្រាប់ជនរងគ្រោះ។ នេះបើយោងតាមសេចក្តីព្រាងអត្ថបទ ដែលបានបោះពុម្ពផ្សាយនៅក្នុងខែឧសភានៅក្នុងកាសែតដែលគ្រប់គ្រងដោយរដ្ឋ។

ធនាគារអាចបង្កកគណនីឆបោកដែលសង្ស័យក្នុងរយៈពេល ១៥នាទីបន្ទាប់ពីការផ្ទៀងផ្ទាត់ ខណៈដែលគណនីគួរឱ្យសង្ស័យអាចត្រូវបានផ្អាករហូតដល់ ៧២ម៉ោង។

ជនរងគ្រោះត្រូវតែរាយការណ៍ពីករណីនេះក្នុងរយៈពេល ២៤ម៉ោងបន្ទាប់ពីនោះ មន្រ្តីប៉ូលិសត្រូវបានតម្រូវឱ្យចុះឈ្មោះរបាយការណ៍ព័ត៌មានដំបូងជាបន្ទាន់។

សេចក្តីព្រាងច្បាប់នេះក៏តម្រូវឱ្យធនាគារ អ្នកផ្តល់សេវាទូទាត់ប្រាក់តាមទូរស័ព្ទ ប្រតិបត្តិករទូរគមនាគមន៍ និងអ្នកផ្តល់សេវាអ៊ីនធឺណិត ផ្លាស់ប្តូរទិន្នន័យតាមរយៈមូលដ្ឋានទិន្នន័យកណ្តាលផងដែរ។ ប្រព័ន្ធនេះនឹងត្រួតពិនិត្យគណនីធនាគារ ស៊ីមកាត អាសយដ្ឋាន IP កំណត់ត្រាទូរស័ព្ទ និងលំហូរហិរញ្ញវត្ថុក្នុងពេលជាក់ស្តែង។

អ្នកដែលត្រូវបានកាត់ទោសពីបទប្រតិបត្តិការមជ្ឈមណ្ឌលបោកប្រាស់ការបោកប្រាស់រូបិយប័ណ្ណគ្រីបតូ ការជ្រើសរើសកម្មករ ឬការជួញដូរមនុស្សចូលទៅក្នុងប្រតិបត្តិការឆបោកតាមអនឡាញ ត្រូវប្រឈមមុខនឹងការជាប់ពន្ធនាគារចាប់ពី ១០ឆ្នាំរហូតដល់អស់មួយជីវិត។

អំពើហិង្សា ការធ្វើទារុណកម្ម ឬការឃុំខ្លួនខុសច្បាប់ដែលទាក់ទងនឹងប្រតិបត្តិការឆបោកតាមអនឡាញ អាចមានទោសជាប់ពន្ធនាគារអស់មួយជីវិត ឬទោសប្រហារជីវិត ខណៈដែលទោសប្រហារជីវិត គឺជាកាតព្វកិច្ច នៅពេលដែលទង្វើបែបនេះបណ្តាលឱ្យមានករណីស្លាប់។

ច្បាប់នេះកើតឡើងនៅពេលដែលការឆបោកតាមអនឡាញបានពង្រីកនៅទូទាំងប្រទេសមីយ៉ាន់ម៉ាដែលរងគ្រោះដោយជម្លោះ ជាកន្លែងដែលកម្មករដែលត្រូវបានជួញដូរបានរាយការណ៍ពីការរំលោភបំពាន និងការបង្ខំឱ្យធ្វើការ៕

ដោយ៖ យា ចិន្ដាខន្ដី (ប្រភព៖ AA-AKP)