AKP ភ្នំពេញ ថ្ងៃទី៣០ ខែកក្កដា ឆ្នាំ២០២៦ -- នាយករដ្ឋមន្ត្រីអ៊ីរ៉ាក់ លោកអាលី អាល់-ហ្សៃឌី កាលពីថ្ងៃពុធ បានបញ្ជាឱ្យមានកិច្ចប្រជុំបន្ទាន់មួយរបស់ក្រុមប្រឹក្សារដ្ឋមន្ត្រីសម្រាប់សន្តិសុខជាតិ បន្ទាប់ពីមានការវាយប្រហារតាមអាកាសរវាងអារ៉ាប៊ីសាអូឌីត និងសហរដ្ឋអាមេរិកពេញមួយយប់លើប្រទេសនេះ។

នៅក្នុងសេចក្តីថ្លែងការណ៍មួយ សារព័ត៌មាន Security Media Cell បាននិយាយថា លោក អាល់-ហ្សៃឌី ដែលជាអគ្គមេបញ្ជាការកងកម្លាំងប្រដាប់អាវុធផងដែរ បានណែនាំដល់ក្រុមប្រឹក្សាឱ្យកោះប្រជុំជាបន្ទាន់ ដើម្បីឆ្លើយតបទៅនឹងការវិវឌ្ឍសន្តិសុខ និងការទម្លាក់គ្រាប់បែកតាមអាកាសដែលប្រទេសនេះបានទទួលរងកាលពីព្រឹកព្រលឹមថ្ងៃពុធ»។

សេចក្តីថ្លែងការណ៍បាននិយាយថា សេចក្តីថ្លែងការណ៍លម្អិតដែលគូសបញ្ជាក់ពីការវិវឌ្ឍ និងសេចក្តីសម្រេច ដែលបានធ្វើឡើងក្នុងអំឡុងពេលកិច្ចប្រជុំនោះ នឹងត្រូវបានចេញផ្សាយបន្ទាប់។

សកម្មភាពនេះបានកើតឡើងបន្ទាប់ពីបញ្ជាការកណ្តាលយោធាអាម៉េរិក (CENTCOM) បាននិយាយថា កងកម្លាំងអាម៉េរិក និងអារ៉ាប៊ីសាអូឌីតបានធ្វើការវាយប្រហាររួមគ្នាយ៉ាងច្បាស់លាស់ប្រឆាំងនឹងក្រុមដែលមានសម្ព័ន្ធភាពជាមួយអ៊ីរ៉ង់នៅក្នុងប្រទេសអ៊ីរ៉ាក់ ដោយបានអះអាងថា ប្រតិបត្តិការនេះបានកំណត់គោលដៅលើទីតាំងដែលជាប់ទាក់ទងនឹងការវាយប្រហារលើកងកម្លាំងអាម៉េរិក និងហេដ្ឋារចនាសម្ព័ន្ធថាមពលរបស់អារ៉ាប៊ីសាអូឌីត។

យោងតាម ​​CENTCOM បានឱ្យដឹងថា យន្តហោះចម្បាំងអាម៉េរិក និងអារ៉ាប៊ីសាអូឌីត បានវាយប្រហារទីតាំងដឹកជញ្ជូន និងអាវុធជាច្រើនកន្លែងនៅភាគខាងកើតប្រទេសអ៊ីរ៉ាក់ ដើម្បីឆ្លើយតបទៅនឹងការវាយប្រហារដោយយន្តហោះគ្មានមនុស្សបើកជាង ៣០គ្រឿង ដែលត្រូវបានចោទប្រកាន់ថាដឹកនាំដោយកងឆ្មាំបដិវត្តន៍អ៊ីស្លាមអ៊ីរ៉ង់ (IRGC) ក្នុងរយៈពេល ៧២ម៉ោងមុន។

កងកម្លាំងចល័តប្រជាជន (PMF) ដែលជាសម្ព័ន្ធភាពនៃក្រុមប្រដាប់អាវុធនិកាយស៊ីអ៊ីតដែលគាំទ្រដោយអ៊ីរ៉ង់ បាននិយាយថា ទីស្នាក់ការកណ្តាលជាច្រើនរបស់ខ្លួនត្រូវបានវាយប្រហារនៅក្នុងការវាយប្រហារនេះដែលបណ្តាលឱ្យមានអ្នកស្លាប់ របួស និងខូចខាតទ្រព្យសម្បត្តិ៕

ដោយ៖ យា ចិន្ដាខន្ដី (ប្រភព៖ AA-AKP)