AKP ភ្នំពេញ ថ្ងៃទី៣០ ខែកក្កដា ឆ្នាំ២០២៦ -- ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បាននិយាយកាលពីពេលថ្មីៗនេះថាប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមព្រៀងផ្តល់អាជ្ញាប័ណ្ណដល់អ៊ុយក្រែន ដើម្បីផលិតប្រព័ន្ធការពារមីស៊ីល។

ថ្លែងនៅក្នុងបទសម្ភាសន៍មួយជាមួយសារព័ត៌មាន Fox News លោកហ្សេលេនស្គី បាននិយាយថា មេដឹកនាំទាំងពីរបានបង្កើនទំនាក់ទំនងទៅលើកិច្ចពិភាក្សាដែលពួកគេបានចាប់ផ្តើមក្នុងអំឡុងពេលកិច្ចប្រជុំកំពូលអង្គការណាតូកាលពីដើមខែនេះ នៅក្នុងរដ្ឋធានីអង់ការ៉ា ប្រទេសតួកគី។

លោក ហ្សេលេនស្គី បាននិយាយថា «យើងបានចាប់ផ្តើមវានៅទីក្រុងអង់ការ៉ា ដើម្បីផ្តល់អាជ្ញាប័ណ្ណដល់អ៊ុយក្រែនសម្រាប់ការផលិតប្រព័ន្ធការពារមីស៊ីល។ នេះជារឿងសំខាន់ ពីព្រោះយើងត្រូវការច្រើនជាងនេះ និងលឿនជាងមុន»។

លោកបាននិយាយថា លោក ត្រាំ បានយល់ព្រមតាមសំណើក្នុងអំឡុងពេលកិច្ចប្រជុំរបស់ពួកគេនៅឯសេតវិមាន។

លោក ហ្សេលេនស្គី បាននិយាយថា «ថ្ងៃនេះ យើងមានកិច្ចប្រជុំដ៏ល្អជាមួយលោកប្រធានាធិបតី ត្រាំ។ លោកបានទទួលយកថា លោកនឹងផ្តល់អាជ្ញាប័ណ្ណដល់យើង»។

មេដឹកនាំអ៊ុយក្រែនបានបន្ថែមថា លោកបានជួបជាមួយនាយកប្រតិបត្តិមកពីក្រុមហ៊ុនការពារជាតិធំៗរបស់សហរដ្ឋអាមេរិក ដើម្បីពិភាក្សាអំពីការផលិតរួមគ្នាដែលមានសក្តានុពល។

លោកបានប្រាប់សារព័ត៌មាន Fox News ថា «ខ្ញុំសង្ឃឹមថា យើងនឹងធ្វើការសហការគ្នាផលិត។ នេះជារឿងសំខាន់ណាស់»។

លោក​បាននិយាយ​ថា «បញ្ហា​ពិត​ប្រាកដ ​គឺ​ប្រព័ន្ធការពារ​មីស៊ីលផ្លោងនិង​មីស៊ីល​ប្រឆាំង​មីស៊ីលផ្លោង។ ជាការពិតណាស់ ខ្ញុំបានចែករំលែកអ្វីដែលយើងត្រូវការ... ខ្ញុំបានចែករំលែកវាជាមួយលោកប្រធានាធិបតីនៅថ្ងៃនេះ»៕

ដោយ៖ យា ចិន្ដាខន្ដី (ប្រភព៖ AA-AKP)