AKP ភ្នំពេញ ថ្ងៃទី២៩ ខែកក្កដា ឆ្នាំ២០២៦ -- សេដ្ឋកិច្ចរបស់ប្រទេសម៉ាឡេស៊ីបានរក្សាសន្ទុះខ្លាំងនៅក្នុងឆមាសទីមួយនៃឆ្នាំ២០២៦ បើទោះបីជាមានបញ្ហាប្រឈមជាបន្តបន្ទាប់ពីភាពមិនប្រាកដប្រជាខាងភូមិសាស្ត្រនយោបាយ សម្ពាធពាណិជ្ជកម្ម តម្លៃថាមពលប្រែប្រួល និងការរំខានដល់ខ្សែសង្វាក់ផ្គត់ផ្គង់សកលលោកក៏ដោយ។

ថ្លែងនៅក្នុងសន្និសីទរបស់ក្រសួងសេដ្ឋកិច្ចម៉ាឡេស៊ីកាលពីពេលថ្មីៗនេះ លោករដ្ឋមន្ត្រី អាកម៉ាល់ ណាស្រ៊ុលឡា ម៉ូដ ណាសៀ បាននិយាយថាការប៉ាន់ស្មានបឋមបានបង្ហាញថា សេដ្ឋកិច្ចបានកើនឡើង ៥,៨% នៅក្នុងត្រីមាសទីពីរនៃឆ្នាំ២០២៦ ដែលជំរុញកំណើនសម្រាប់រយៈពេលប្រាំមួយខែដំបូងនៃឆ្នាំនេះ ដល់ ៥,៦% ដែលកើនឡើងពី ៤,៥% ក្នុងរយៈពេលដូចគ្នានៃឆ្នាំ២០២៥។ ការអនុវត្តនេះលើសពីការរំពឹងទុករបស់ទីផ្សារ និងលើសពីការព្យាករណ៍កំណើនពេញមួយឆ្នាំ ៤,៧% សម្រាប់ប្រទេសម៉ាឡេស៊ីនៅក្នុងទស្សនវិស័យសេដ្ឋកិច្ចពិភពលោករបស់មូលនិធិរូបិយវត្ថុអន្តរជាតិ(IMF) ដែលចេញផ្សាយនៅក្នុងខែកក្កដា ឆ្នាំ២០២៦ នេះ។

អតិផរណានៅតែស្ថិតក្រោមការគ្រប់គ្រងនៅកម្រិត ១,៩% ក្នុងខែមិថុនា ខណៈដែលលក្ខខណ្ឌទីផ្សារការងារនៅតែមានភាពធន់។ គិតត្រឹមខែឧសភា កម្លាំងពលកម្មរបស់ប្រទេសម៉ាឡេស៊ីបានកើនឡើងដល់១៧,៣៤លាននាក់ ដោយមានប្រជាជនជាង ១៦,៨២លាននាក់មានការងារធ្វើ។ អត្រាចូលរួមកម្លាំងពលកម្មមានចំនួន ៧០,៩% ខណៈដែលអត្រាគ្មានការងារធ្វើនៅតែទាបក្នុងអត្រា ៣,០%។

ការនាំចេញនៅតែបន្តជាកម្លាំងជំរុញកំណើនដ៏សំខាន់ ដោយមានការនាំចេញប្រចាំខែឈានដល់កំណត់ត្រា ១៨៤ពាន់លានរីងហ្គីត (៤៦ពាន់លានដុល្លារអាម៉េរិក) នៅក្នុងខែឧសភា ដែលគាំទ្រដោយការដឹកជញ្ជូនផលិតផលអគ្គិសនី និងអេឡិចត្រូនិច សម្ភារៈប្រើប្រាស់ក្នុងផ្ទះ ទំនិញរថយន្តនិងតម្រូវការកើនឡើងសម្រាប់ផលិតផលទាក់ទងនឹងបញ្ញាសិប្បនិម្មិត (AI)។

លោក អាកម៉ាល់ បាននិយាយថា ការពង្រីកសេដ្ឋកិច្ចនៅក្នុងត្រីមាសទីពីរ គឺផ្អែកលើមូលដ្ឋានទូលំទូលាយ ដែលដឹកនាំដោយវិស័យរ៉ែ (១០,២%) ផលិតកម្ម (៧,៥%) សំណង់ (៦,៦%) និងសេវាកម្ម (៥,៤%)។ទោះជាយ៉ាងណាក៏ដោយ វិស័យកសិកម្មបានធ្លាក់ចុះ ៣,៧% ដោយបានបញ្ជាក់ពីតម្រូវការក្នុងការផ្តល់អាទិភាពដល់សន្តិសុខស្បៀង ប្រាក់ចំណូលរបស់កសិករខ្នាតតូច និងសហគមន៍ជនបទ។

លោករដ្ឋមន្ត្រីបាននិយាយថា រដ្ឋាភិបាលម៉ាឡេស៊ីនឹងបន្តតាមដានហានិភ័យសេដ្ឋកិច្ចពិភពលោក ជាពិសេសការវិវត្តនៃតម្លៃថាមពល ទីផ្សារហិរញ្ញវត្ថុ ទំនិញ ការផ្គត់ផ្គង់ស្បៀងអាហារ និងតម្រូវការអគ្គិសនី។

ដោយសម្លឹងមើលទៅអនាគត លោកបាននិយាយថា ភាពធន់រយៈពេលវែងរបស់ប្រទេសម៉ាឡេស៊ីនឹងអាស្រ័យលើការកាត់បន្ថយភាពងាយរងគ្រោះខាងរចនាសម្ព័ន្ធ ខណៈដែលពង្រឹងសមត្ថភាពក្នុងសន្តិសុខស្បៀង ថាមពល ការនាំចេញ ភស្តុភារ និងបច្ចេកវិទ្យា៕

ដោយ៖ យា ចិន្ដាខន្ដី (ប្រភព៖ VNA)