AKPភ្នំពេញថ្ងៃទី២៩ ខែកក្កដា ឆ្នាំ ២០២៦–ក្រុមប្រឹក្សាអភិវឌ្ឍន៍កម្ពុជា ជួបពិភាក្សាការងារជាមួយគណៈគ្រប់គ្រងជាន់ខ្ពស់នៃ ក្រុមហ៊ុន Minebea Mitsumi Inc. សំដៅបន្តពង្រឹងកិច្ចសហប្រតិបត្តិការ និងជំរុញការវិនិយោគបន្ថែមនៅកម្ពុជា។

នាព្រឹកថ្ងៃពុធ ទី២៩ ខែកក្កដា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានទទួលជួបពិភាក្សាការងារជាមួយគណៈគ្រងជាន់ខ្ពស់របស់ ក្រុមហ៊ុន Minebea Mitsumi Inc. ដឹកនាំដោយ លោក Yoshihisa Kainuma អគ្គនាយកប្រតិបត្តិ (CEO) ដោយមានការចូលរួមអមពីសំណាក់ ឯកឧត្តម ជា វុទ្ធី អគ្គលេខាធិការរង គណៈកម្មាធិការវិនិយោគកម្ពុជានៃ ក.អ.ក. ព្រមទាំងថ្នាក់ដឹកនាំ និងមន្ត្រីពាក់ព័ន្ធនៃ ក.អ.ក. មួយចំនួនផងដែរ។

ជំនួបពិភាក្សាការងារនេះត្រូវបានរៀបចំឡើងក្នុងបរិយាកាសស្និទ្ធស្នាល និងកិច្ចសហប្រតិបត្តិការខ្ពស់ ដោយផ្តោតសំខាន់លើការវាយតម្លៃខ្ពស់ចំពោះដំណើរការអាជីវកម្មនាពេលកន្លងមក និងការពិភាក្សាអំពីទិសដៅយុទ្ធសាស្ត្រ ក្នុងការបន្តពង្រីកការវិនិយោគបន្ថែមរបស់ក្រុមហ៊ុន Minebea Mitsumi នៅព្រះរាជាណាចក្រកម្ពុជា។

ជំនួបនាព្រឹកនេះ បានឆ្លុះបញ្ចាំងពីទំនាក់ទំនងកិច្ចសហប្រតិបត្តិការដ៏ជិតស្និទ្ធរវាង រាជរដ្ឋាភិបាលកម្ពុជា និងវិស័យឯកជនពីបរទេស ជាពិសេសក្រុមហ៊ុនវិនិយោគធំៗពីប្រទេសជប៉ុន។ គម្រោងក្នុងការបន្តពង្រីកការវិនិយោគរបស់ក្រុមហ៊ុន Minebea Mitsumi Inc. នឹងក្លាយជាកម្លាំងចលករយ៉ាងសំខាន់ក្នុងការជំរុញសេដ្ឋកិច្ចកម្ពុជាឱ្យឈានទៅរកការអភិវឌ្ឍប្រកបដោយចីរភាព បច្ចេកវិទ្យាទំនើប និងការទាក់ទាញវិនិយោគិនអន្តរជាតិដទៃទៀតមកកាន់កម្ពុជាបន្ថែមទៀត៕

ដោយ៖ ចរិយា ប្រភព៖ CDC