AKP កណ្ដាល ថ្ងៃទី២៩ ខែកក្កដា ឆ្នាំ២០២៦–ដើម្បីអស់ការសង្ស័យសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបាន​បញ្ជាក់ថា គ្មានការកាត់បន្ថយ​ ឬបង្រួមក្រសួង ស្ថាប័នមកចំនួន៦ដែលមានការងារជាន់គ្នា ដូចជាការលើកឡើងលើបណ្តាញសង្គមមួយចំនួននោះទេ។

ការលើកឡើងរបស់សម្តេចធិបតី​នាយករដ្ឋមន្ត្រីបន្ទាប់ពីសម្តេចឃើញមានការចែករំលែកលើបណ្តាញសង្គមថា រាជរដ្ឋាភិបាល​នឹងធ្វើការកាត់បន្ថយឬបង្រួមក្រសួងស្ថាប័នចំនួន៦ដែលជាន់ការងារគ្នា។

ថ្លែងក្នុងពិធីចែកវិញ្ញាបនបត្រម្ចាស់ស្គាល់អចលនវត្ថុជូនប្រជាពលរដ្ឋនៅស្រុកខ្សាច់កណ្តាល​ខេត្តកណ្តាល​ នាព្រឹកថ្ងៃទី២៩​ខែកក្តដា​ឆ្នាំ២០២៦ សម្តេចធិបតីនាយករដ្ឋមន្ត្រីបានបញ្ជាក់យ៉ាងដូច្នេះថា៖«​ប៉ុន្មានថ្ងៃមកនេះមានការលើកឡើងពីការកាត់ក្រសួងបង្រួមក្រសួង​ទម្លាក់ក្រសួង​ទៅជាអគ្គនាយកដ្ឋាន​​រឿងនេះប្លែកដែរដល់ខ្ញុំជានាយករដ្ឋមន្ត្រីអត់ដឹង​តែខ្ញុំសួមបញ្ជាក់ថាអ្នកដែលបង្កើតរឿងនេះ ថាគឺគ្មានការកំណែទ្រង់គោលនយោបាយនោះទេ​​។​គឺ គ្មានការកាត់ក្រសួងស្ថាប័ននោះទេ​ ប៉ុន្តែក្រសួង ស្ថាប័ន​ និមួយៗត្រូវវិភាគមុខងា​ រអាចមានការកាត់នាយកដ្ឋាននៅខាងក្នុង ក្រសួងនោះ​ដើម្បីពង្រឹង​បង្រួមឱ្យចំការងារ»។

សម្តេចធិបតីបានបន្តថា គ្មានគោលគំនិតកាត់បន្ថយក្រសួងស្ថាប័នទេ​គឺមានតែធ្វើការពង្រឹងសមត្ថភាពឱ្យត្រូវនឹង​ការវិវត្តន៍សង្គម​បច្ចេកវិទ្យា​ ។​ ដូចជាកន្លែងខ្លះត្រូវបានបន្ថយនាយកដ្ឋានមួយចំនួនដែលមិនចាំបាច់​​ឬជាន់គ្នា។​ 

ជាមួយគ្នានោះដែរសម្តេចធិបតី​ក៏ស្នើសុំដល់មន្ត្រីសុំឱ្យមានភាពនឹងនរកុំមានភ័យព្រួយចំពោះករណីនេះ​ព្រោះថាគោលនយោបាយត្រូវបានដាក់ចេញរួចហើយ៕

ដោយ៖ ប៊ុន រិទ្ធ