AKP ភ្នំពេញ ថ្ងៃទី២៩ ខែកក្តដា ឆ្នាំ២០២៦--សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានជួបសម្តែងការគួរសម និងពិភាក្សាការងារជាមួយឯកឧត្តម ឡេ មិញ ហ៊ុង (Le Minh Hung) នាយករដ្ឋមន្ត្រីនៃសាធារណរដ្ឋសង្គមនិយមវៀតណាម នៅរសៀលថ្ងៃទី២៨ ខែ កក្កដា ឆ្នាំ២០២៦ ក្នុងពេលដែលសម្តេចប្រធានរដ្ឋសភាដឹកនាំគណៈប្រតិភូជាន់ខ្ពស់រដ្ឋសភាកម្ពុជាបំពេញទស្សន កិច្ចផ្លូវការ និងមិត្តភាពនៅប្រទេសវៀតណាម។

សម្តេចរដ្ឋសភាធិបតី បានថ្លែងអំណរ គុណយ៉ាងជ្រាលជ្រៅចំពោះឯកឧត្តមនាយករដ្ឋមន្ត្រី ដែលបានឆ្លៀតពេលវេលាដ៏មមាញឹកទទួលស្វាគមន៍គណៈ ប្រតិភូរដ្ឋសភាកម្ពុជានៅក្នុងឱកាសនេះ។ ជំនួបនាពេលនេះ គឺជាសក្ខីភាពឆ្លុះបញ្ចាំងយ៉ាងច្បាស់ពីជម្រៅនៃ «មិត្តភាពជាប្រពៃណី ភាពជាអ្នកជិតខាងល្អ និងកិច្ចសហប្រតិបត្តិការយុទ្ធ សាស្ត្រគ្រប់ជ្រុងជ្រោយ ស្ថិតស្ថេរ និងយូរអង្វែង» រវាងប្រទេសយើងទាំងពីរ ដែលតែងតែប្រកៀកស្មារួមសុខរួមទុក្ខជាមួយគ្នាជានិច្ច ជាពិសេសក្នុងគ្រាលំបាក។

ឯកឧត្តម ឡេ មិញ ហ៊ុង សម្តែងការស្វាគមន៍យ៉ាងកក់ក្តៅចំពោះសម្តេចប្រធានរដ្ឋសភា និងគណៈប្រតិភូទាំងអស់ ដែលបានអញ្ជើញមកទស្សនកិច្ចផ្លូវការ និងមិត្តភាពនៅប្រទេសវៀតណាម។ 

ឯកឧត្តម បានបញ្ជាក់ថា វៀតណាមគាំទ្រ និងសហការឥតងាករេជាមួយកម្ពុជា ក្រោមការដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។ ឯកឧត្តមមានជំនឿមុតមាំថា ក្រោមការដឹកនាំដ៏ត្រឹមត្រូវរបស់គណបក្សប្រជាជនកម្ពុជា ដែលទទួលបានការគាំទ្រពេញទំហឹងនោះ កម្ពុជានឹងសម្រេចគោលដៅនៃការអភិវឌ្ឍជាមិនខានឡើយ។ វៀតណាមបន្តអនុវត្តឱ្យបានសម្រេចនូវការឯកភាពគ្នារវាងថ្នាក់ដឹកនាំប្រទេសកម្ពុជា និងវៀតណាម និយាយដោយឡែក និងនិយាយជារួមរវាងថ្នាក់ដឹកនាំប្រទេសទាំងបី កម្ពុជា ឡាវ និងវៀតណាម ដែលបានធ្វើឡើងកាលពីខែកុម្ភៈ ឆ្នាំ២០២៦ នៅកម្ពុជា។

សម្តេចប្រធានរដ្ឋសភា បានជម្រាបជូនឯកឧត្តមនាយករដ្ឋមន្ត្រី ពីការអះអាងជាថ្មីរបស់ឯកឧត្តមប្រធានរដ្ឋវៀតណាម ដែលសម្តេចបានជួបសម្តែងការគួរសម និងពិភាក្សាការងារកាលពីព្រឹកមិញ ដោយបានបញ្ជាក់ច្បាស់ពីកិច្ចសហប្រ តិបត្តិការប្រទេសទាំងពីរ ទាំងស្ថាប័ននីតិប្បញ្ញត្តិ និងនីតិប្រតិបត្តិ ក្នុងកម្រិតជាតិ និងក្រោមជាតិ។ 

សម្តេចប្រធានរដ្ឋសភា បានវាយតម្លៃខ្ពស់ចំពោះកិច្ចប្រជុំរវាង សម្តេចនាយករដ្ឋមន្ត្រី ហ៊ុន ម៉ាណែត និងឯកឧត្តមនាយករដ្ឋមន្ត្រី ឡេ មិញ ហ៊ុង កាលពីខែមិថុនា ឆ្នាំ២០២៦ ថ្មីៗនេះ ដែលបានសង្កត់ធ្ងន់លើសារៈសំខាន់យ៉ាងជ្រាលជ្រៅ និងទទួលបាននូវលទ្ធផលសំខាន់ៗ ក្នុងការពង្រឹងទំនាក់ទំនងទ្វេភាគី និងពង្រីកកិច្ចសហប្រតិបត្តិការដ៏ទូលំទូលាយលើវិស័យពាណិជ្ជកម្ម វិនិយោគ ការតភ្ជាប់ និងការផ្លាស់ប្តូររវាងប្រជាជន និងប្រជាជន។

ប្រមុខដឹកនាំប្រទេសទាំងពីរបានប្តេជ្ញាចិត្តខ្ពស់ក្នុងការធ្វើសមាហរណកម្មសេដ្ឋកិច្ច ការតភ្ជាប់ហេដ្ឋារចនាសម្ព័ន្ធ និងសន្តិសុខ សំដៅជំរុញទំនាក់ទំនងរវាងប្រជាជន និងប្រជាជន ព្រមទាំងពាណិជ្ជកម្មទ្វេភាគីឱ្យសម្រេចបានទំហំ ២០ ពាន់លានដុល្លារ នាពេលអនាគត។

ឯកឧត្តមនាយករដ្ឋមន្ត្រីវៀតណាម បានជម្រាបជូនសម្តេចប្រធានរដ្ឋសភាថា ដោយមានកិច្ចព្រមព្រៀងជាបន្តបន្ទាប់ជាមួយសម្តេចធិបតី ហ៊ុន ម៉ាណែត ឯកឧត្តមបានណែនាំក្រសួងស្ថាប័នទាំងអស់អនុវត្តជាបន្ទាន់រាល់កិច្ចព្រមព្រៀងទាំងអស់នោះ ដើម្បីបម្រើផលប្រយោជន៍ប្រទេសទាំងសងខាង។ ឯកឧត្តម បានស្នើសម្តេចប្រធានរដ្ឋសភាបន្តជំរុញលើកទឹកចិត្តឱ្យមានដំណើរទស្សនកិច្ចផ្លាស់ប្តូរបទពិសោធន៍រវាងគ្នាក្នុងជួរថ្នាក់ដឹកនាំប្រទេសទាំងពីរជាបន្តទៀត។ វៀតណាមគាំទ្រចំពោះគម្រោងលើកកម្ពស់សហគ្រាសខ្នាតតូច និងមធ្យមនៅកម្ពុជាផងដែរ។ ជាមួយគ្នានេះ ភាគីវៀតណាមក៏បានអរគុណកម្ពុជា ដែលបានគាំទ្រ និងផ្តល់កិច្ចសហការជាមួយវៀតណាម ក្នុងបេសកកម្មរុករកអដ្ឋិធាតុយុទ្ធជនវៀតណាម ដែលបានពលីនៅកម្ពុជា។

រដ្ឋសភាសូមអបអរសាទរ និងគាំទ្រចំពោះចក្ខុវិស័យរបស់ប្រមុខរដ្ឋាភិបាលប្រទេសទាំងពីរ។ វៀតណាមគឺជាដៃគូពាណិជ្ជកម្មដ៏សំខាន់មួយរបស់កម្ពុជា ហើយទំហំពាណិជ្ជកម្មទ្វេភាគីបានកើនឡើងជាលំដាប់ និងលើសពីការរំពឹងទុក។ នៅឆ្នាំ២០២៥ ទំហំពាណិជ្ជកម្មប្រទេសទាំងពីរបានកើនឡើងរហូតដល់ ១១,៣៣ ពាន់លានដុល្លារអាមេរិក ដោយឡែកនៅឆ្នាំ២០២៦ នេះ មានការរំពឹងថា នឹងកើនឡើងរហូតដល់ជាង ១២ ពាន់លានដុល្លារអាមេរិក។ កម្ពុជា-វៀតណាម បានប្តេជ្ញាចិត្តក្នុងការពង្រីកកិច្ចសហប្រតិបត្តិការ និងពន្លឿនទំហំពាណិជ្ជកម្មឱ្យឈានដល់ ២០ ពាន់លានដុល្លារអាមេរិក ក្នុងពេលខាងមុខ។

សម្តេចប្រធានរដ្ឋសភា បានគូសបញ្ជាក់ថា កម្ពុជាស្វាគមន៍ និងបន្តជំរុញបង្កលក្ខណៈងាយស្រួលជូនបន្ថែមទៀតដល់វិនិយោគិនបរទេស និងអ្នកទេសចរវៀតណាម មកវិនិយោគ និងទស្សនាកម្ពុជាឱ្យបានច្រើនបន្ថែមទៀត។ សម្តេចបានស្នើឱ្យប្រទេសវៀតណាមពិនិត្យលទ្ធភាពបន្ថែមទៀតក្នុងការវិនិយោគនៅកម្ពុជា ដូចជាវិស័យកសិកម្ម អប់រំ បច្ចេកវិទ្យា និងនវានុវត្តន៍ជាដើម។

ក្រៅពីពាណិជ្ជកម្ម ឆ្លៀតក្នុងឱកាសនោះ សម្តេចរដ្ឋសភាធិបតី បានវាយតម្លៃខ្ពស់ចំពោះកិច្ចសហប្រតិបត្តិការអភិវឌ្ឍន៍ធនធានមនុស្សរវាងប្រទេសទាំងពីរ ដោយសម្តេចបានថ្លែងអំណរគុណវៀតណាម ដែលបានយកចិត្តទុកដាក់ចំពោះការរស់នៅរបស់និស្សិត និងសិក្ខាកាមកម្ពុជាដែលកំពុងសិក្សានៅវៀតណាម ហើយវៀតណាមនៅតែបន្តផ្តល់អាហារូបករណ៍ និងវគ្គបណ្តុះបណ្តាលដល់និស្សិត និងមន្ត្រីរាជការកម្ពុជា សំដៅពង្រឹងសមត្ថភាពមូលធនមនុស្សកម្ពុជា។

ជាមួយគ្នានេះ សម្តេចប្រធានរដ្ឋសភាបានលើកទឹកចិត្តឱ្យអាជ្ញាធរពាក់ព័ន្ធនៃប្រទេសទាំងពីរ បន្តចែករំលែកព័ត៌មានគ្នាឱ្យបានទាន់ពេលវេលា និងសហការចាត់វិធានការឱ្យបានម៉ឺងម៉ាត់ក្នុងការទប់ស្កាត់ឧក្រិដ្ឋកម្មឆ្លងដែន ដូចជា បទល្មើសគ្រឿងញៀន ការជួញដូរមនុស្ស និងការឆបោកតាមប្រព័ន្ធបច្ចេកវិទ្យា។ 

សម្តេចបានបន្តថា ប្រឈមនឹងឧបសគ្គពីការឈ្លានពានរបស់ប្រទេសជិតខាង ក៏ដូចជាសង្គ្រាមសកលលោក កម្ពុជាបានខិតខំពង្រឹងសាមគ្គីជាតិ និងភាពធន់ជាតិ ដើម្បីប្រែក្លាយឧបសគ្គជាឱកាសក្នុងការអភិវឌ្ឍជាតិ។ សម្តេចធិបតី ហ៊ុន ម៉ាណែត នាយករដ្ឋមន្ត្រី កំពុងជំរុញកំណើនសេដ្ឋកិច្ចជាតិ តាមរយៈការផ្តោតសំខាន់លើធនធានមនុស្ស និងការពង្រឹងសហគ្រាសខ្នាតតូច និងមធ្យមជាដើម ដើម្បីឈានឆ្ពោះទៅសម្រេចឱ្យបាននូវគោលដៅអភិវឌ្ឍន៍ឆ្នាំ២០៣០ និងឆ្នាំ២០៥០ ក្នុងការក្លាយជាប្រទេសអភិវឌ្ឍន៍។

សម្តេចរដ្ឋសភាធិបតី បានថ្លែងអំណរ គុណយ៉ាងជ្រាលជ្រៅចំពោះវៀតណាម ដែលបានគាំទ្រឱ្យមានដំណោះស្រាយជម្លោះព្រំដែនកម្ពុជា-ថៃ ដោយសន្តិវិធី និងបានចូលរួមក្នុងក្រុមអ្នកសង្កេត ការណ៍អាស៊ាន (AOT)។ សូមមិត្តវៀតណាមបន្តគាំទ្រកិច្ចខិតខំប្រឹងប្រែងរបស់កម្ពុជា ក្នុងការអនុវត្តដំណើរការសន្តិភាព ជាពិសេសការអនុវត្តកិច្ចព្រមព្រៀងឈប់បាញ់ ព្រមទាំងតួនាទីរបស់ AOT ផងដែរ។ វៀតណាមមានជំនឿនិងត្រៀមចូលរួមដើម្បីធ្វើយ៉ាងណាឱ្យកម្ពុជានិងថៃ ដោះស្រាយបញ្ហាដោយសន្តិវិធី ក្នុងពេលឆាប់ៗខាងមុខនេះ ៕

ដោយ៖ ប៊ុនរិទ្ធ